વિરોધ / આજે રાજ્યસભામાં રજૂ થશે 3 કૃષિ બિલ, ખેડૂતો આરપારની લડાઈનાં મૂડમાં, સરકારની સમસ્યા વધી

• આજે કૃષિ સંબંધિત 3 બિલ રાજ્યસભામાં રજૂ થશે
• રાજ્યસભાનું ગણિત સરકારની તરફેણમાં છે
• સરકારને કૃષિ બિલ પસાર કરાવવા 122 મતની જરૂર પડશે
• હાલ રાજ્યસભામાં 86 સાંસદો સાથે ભાજપ સૌથી મોટો પક્ષ છે

આજે રાજ્યસભામાં બિલ પર ચર્ચા અને મતદાન થશે.  રાજ્યસભાનું ગણિત સરકારની તરફેણમાં છે.  NDAના જ સહયોગી અકાલી દળનો વિરોધ બીજા પક્ષ પર અસર કરી શકે છે.સરકારને કૃષિ બિલ પસાર કરાવવા 122 મતની જરૂર પડશે.  ઉલ્લેખનીય છે કે હાલ રાજ્યસભામાં 86 સાંસદો સાથે ભાજપ સૌથી મોટો પક્ષ છે.

સરકારને BJD, AIADMK, TRS, YSR કોંગ્રેસ અને TDPના મતની આશા છે. જો કે આ તમામ પાર્ટી ભાજપના ગઠબંધનનો હિસ્સો નથી. BJD પાસે 9, AIADMK પાસે 9, TRS પાસે 7 સભ્યોનું સંખ્યાબળ છે. YSR કોંગ્રેસ પાસે 6 અને TDP પાસે એક સભ્યનું સંખ્યાબળ છે. ભાજપના ગઠબંધનના પક્ષો પણ બિલના કારણે નારાજ છે. શિરોમણી અકાલી દળ બિલ વિરુદ્ધ મતદાન કરશે.

ઉલ્લેખનીય છે કે ખેડૂતો સાથે જોડાયેલા 3 વટહુકમોને લઈને વિરોધ પ્રદર્શન થઈ રહ્યું છે. આ બિલના વિરોધમાં કેબિનેટ મંત્રિમંડળમાંથી હરસિમરત કૌરે રાજીનામું આપી દીધું છે. ખેડૂતો આરપારની લડાઈ માટે તૈયાર છે. પંજાબના ખેડૂતોએ બંધનું એલાન આપ્યુ છે. ખેડૂત સંગઠનો દ્વારા 25 સપ્ટેમ્બરના બંધ પાડવાનું એલાન કરવામાં આવ્યું છે. 24થી 26 સપ્ટેમ્બર દરમિયાન રેલ ચક્કાજામ પણ કરવામાં આવશે. 

બીજ તરફ ફતેહગઢ સાહેબથી કોંગ્રેસના ધારાસભ્ય કુલજીત નાગરાએ કૃષિ વિધેયકના વિરોધમાં પદ પરથી રાજીનામુ આપી દીધું છે. તેમણે ટ્વીટ કરીને  આ જાણકારી આપી હતી.હરિયાણા, પંજાબ, ઉત્તર પ્રદેશ અને રાજસ્થાનના ખેડૂત કૃષિ ક્ષેત્ર સાથે જોડાયેલા 3 વટહૂકમના વિરોધમાં આ પ્રદર્શન થઈ રહ્યું છે. અત્રે નોંધનીય છે કે કેન્દ્રીય કૃષિ મંત્રી નરેન્દ્ર સિંહ તોમર દ્વારા સોમવારના રોજ 3 બિલ કિસાન ઉપજ વેપાર અને વાણિજય (સંવર્ધન અને સુવિધા) અધ્યાદેશ, આવશ્યક વસ્તુ (સંશોધન) અધ્યાદેશ, મૂલ્ય આશ્વાસન તેમજ કૃષિ સેવા પર ખેડૂત (સશક્તિકરણ અને સંરક્ષણ) સમજુતિ અધ્યાદેશ 2020 પાસ કર્યાં છે. આ ત્રણેય વટહૂકમ આવ્યા બાદ સતત ખેડૂતોનો વિરોધ કરી રહ્યાં છે.