કેન્દ્ર સરકાર યુવતીઓની લગ્ન કરવાની ઉંમરને લઇ મહત્વનો નિર્ણય લઇ શકે છે. જેમાં કેન્દ્ર સરકાર યુવતીઓની લગ્ન કરવાની ઉમર વધારી શકે છે. આ માટે કેન્દ્ર સરકારે એક ટાસ્ક ફોર્સની રચના પણ કરી લીધી છે. સરકારે જયા જેટલીની આગેવાનીમાં ટાસ્ક ફોર્સની રચના કરી છે. ટાસ્ક ફોર્સનું મુખ્ય કામ એ વાતની સમીક્ષા કરવાનું હશે કે લગ્ન અને માતા બનવા માટે મહિલા અને તેના બાળકના સ્વાસ્થ્ય અને પોષણ સાથે કેટલો સંબંધ હોય છે. સાથે માનવામાં આવી રહ્યું છે કે કેન્દ્ર દ્વારા બનવાયેલી ટાસ્ક ફોર્સ મહિલાઓના લગ્નની ઉંમરની સમીક્ષા પણ કરશે.
કેન્દ્ર સરકાર લઇ શકે છે મોટો નિર્ણય
વધી શકે છે યુવતીઓની લગ્ન કરવાની ઉમર
કેન્દ્રએ કરી છે ટાસ્ક ફોર્સની રચના
ટાસ્ક ફોર્સને કહેવામાં આવ્યું છે કે તેઓ યુવતીઓની વચ્ચે હાયર એજ્યૂકેશને પ્રોત્સાહન આપવાની ભલામણ પણ કરે. આ ટાસ્ક ફોર્સ 31 જુલાઈએ પોતાનો રિપોર્ટ રજૂ કરશે. નાણામંત્રી નિર્મલા સીતારમણે પોતાના બજેટ ભાષણમાં કહ્યું હતું કે મહિલાની માતા બનવાની યોગ્ય ઉંમર વિશે સલાહ આપવા માટે ટાસ્ક ફોર્સ બનાવવામાં આવશે. હાલના સમયમાં સ્ત્રીઓની લગ્ન કરવાની ઉમર 18 વર્ષ અને પુરુષો માટે 21 વર્ષ નક્કી છે.
ખાસ ટાસ્ક ફોર્સમાં આ સભ્યો છે સામેલ
ટાસ્ક ફોર્સ 31 જુલાઈએ પોતાનો રિપોર્ટ રજૂ કરશે. ટાસ્ક ફોર્સમાં જયા જેટલી ઉપરાંત ડૉ. વી. કે. પૉલ, સભ્ય (સ્વાસ્થ્ય) નીતિ આયોગ, ઉચ્ચ શિક્ષાના સચિવ, સ્કૂલ શિક્ષા, સ્વાસ્થ્ય, મહિલા તથા બાળ વિકાસ ઉપરાંત શિક્ષાવિદ નજમા અખ્તર, વસુધા કામત અને દીપ્તી શાહ સામેલ છે.
શું છે કેસ?
સુપ્રીમ કોર્ટના ઓક્ટોબર 2017માં આવેલો એક ચુકાદો સરકારની આ કવાયતનું કારણ હોઈ શકે છે. કોર્ટે કહ્યું હતું કે વૈવાહિક બળાત્કાર (marital rape)થી મહિલાઓને બચાવવા માટે બાળ વિવાહ સંપૂર્ણપણે ગેરકાયદેસર માનવું જોઇએ. સુપ્રીમ કોર્ટે લગ્ન માટે લઘુત્તમ ઉંમર વિશે નિર્ણય લેવાનું કામ સરકાર પર છોડ્યું હતું. બીજી તરફ, કહેવામાં આવી રહ્યું છે કે જો માતા બનવાની કાયદેસર ઉંમર 21 વર્ષ નક્કી થાય તો બાળકને જન્મ આપવાની ક્ષમતાવાળા વર્ષોની સંખ્યા આપ મેળે ઘટી જશે.