વિવાદ / નવી શિક્ષણ નીતિનો દક્ષિણમાં વિરોધ, કેન્દ્રે કર્યો ડ્રાફ્ટમાં બદલાવ

દક્ષિણ રાજ્યોમાં આ નીતિને લઇને વિવાદ પેદા થયા બાદ કેન્દ્ર સરકાર તેમા બદલાવનો નિર્ણય લીધો છે. આપને જણાવીએ કે રવિવારે કેન્દ્ર સરકારે પોતાના બચાવમાં કહ્યું હતું કે, કોઇપણ રાજ્ય પર હિન્દી થોપવામાં આવશે નહીં. 

સ્કૂલોમાં ત્રિભાષા ફોર્મૂલા સંબંધિત નવી શિક્ષણ નીતિના ડ્રાફ્ટ પર વિવાદ સર્જાયા બાદ કેન્દ્રીય માનવ સંશાધન વિકાસ મંત્રી રમેશ પોખરિયાલ 'નિશંક' એ સ્પષ્ટ કર્યું હતું કે સરકાર પોતાની નીતિ હેઠળ તમામ ભારતીય ભાષાઓના વિકાસ માટે પ્રતિબદ્ધ છે. અને કોઇ પ્રદેશ પર કોઇપણ ભાષા થોપવામાં નહીં આવે. નિશંકે સ્પષ્ટ કર્યું હતું કે, અમને નવી શિક્ષણ નીતિનો ડ્રાફ્ટ મળ્યો છે. આ એક રિપોર્ટ છે. તેના પર લોકોનો અને વિભિન્ન પક્ષકારોના સૂચન ધ્યાને લેવાશે'. 

રમેશ પોખરિયાલે કહ્યું કે, અમારી સરકાર, તમામ ભારતીય ભાષાઓનું સન્માન કરે છે. અમે તમામ ભાષાઓના વિકાસ માટે પ્રતિબદ્ધ છીએ. કોઇ પ્રદેશ પર કોઇપણ ભાષા થોપવામાં નહીં  આવે. આ અમારી નીતિ છે, તેથી તેના પર વિવાદનો કોઇ પ્રશ્ન જ નથી. નિશંકે કહ્યું કે, કેટલાક લોકો આ મામલે રાજનીતિક વિવાદ પેદા કરવાની કોશિશ કરી રહ્યા છે. 

આપને જણાવી કે શુક્રવારે કે. કસ્તૂરીરંગન સમિતિએ નવી શિક્ષણ નીતિનો ડ્રાફ્ટ સરકારને સોંપ્યો હતો. જે હેઠળ નવી શિક્ષણ નીતિમાં ત્રણ ભાષા પ્રણાલીને લઇને કેન્દ્રના પ્રસ્તાવ પર વિવાદ થયો છે. ડ્રાફ્ટને લઇને તમિલનાડુમાં વિરોધ કરાઇ રહ્યો છે.

હિન્દી ભાષા પર દક્ષિણ ભારતમાં વિરોધ

બિન હિન્દી ભાષી રાજ્યોમાં હિન્દી ભણાવાના પ્રસ્તાવ રજૂ કરતા શિક્ષણ નીતિના ડ્રાફ્ટથી વિવાદ સર્જાયો છે. રવિવારે કેન્દ્ર સરકારે પોતાનો બચાવ કરતા કહ્યું હતું કે કોઇપણ રાજ્ય પર હિન્દી થોપવામાં નહીં આપે. નાણા મંત્રી નિર્મલા સીતારમણ અને વિદેશ મંત્રી એસ જયશંકરે આ મામલે પોતાના ટ્વિટર પર સંદેશ આપ્યો અને વિશ્વાસ અપાવતા જણાવ્યું કે આ ડ્રાફ્ટને અમલમાં લાવતા પહેલા તેની સમીક્ષા કરવામાં આવશે. 

The National Education Policy as submitted to the Minister HRD is only a draft report. Feedback shall be obtained from general public. State Governments will be consulted. Only after this the draft report will be finalised. GoI respects all languages. No language will be imposed

— Dr. S. Jaishankar (@DrSJaishankar) June 2, 2019

આપને જણાવી કે મોદી સરકારના આ બંને મંત્રી તમિલનાડુથી છે.  નવી શિક્ષણ નીતિના આ ડ્રાફ્ટનો સૌથી વધુ વિરોધ તમિલનાડુમાં થઇ રહ્યો છે. તેથી મોદી સરકારના આ મંત્રીઓએ ટ્વિટ તમિલમાં કર્યા છે. ઉપરાષ્ટ્રપતિ એમ.વેંકૈયા નાયડૂએ પણ લોકોને અપીલ કરી હતી કે નવી શિક્ષણ નીતિના ડ્રાફ્ટનું અધ્યયન, વિશ્લેષણ અને ચર્ચા કરવી જોઇએ પરંતુ ઉતાવળમાં કોઇ પરિણામ પર ન પહોંચવું જોઇએ. 

કેબિનેટના મંત્રીનો બચાવ 

આ મામલે વિવાદ વધતો જોઇ નાણા મંત્રી નિર્મલા સીતારમણે ટ્વિટ કરી લખ્યું- 'જનતાનું સૂચન સાંભળ્યા બાદ ડ્રાફ્ટ પોલિસી લાગૂ થશે. તમામ ભારતીય ભાષાઓને પોષિત કરવા માટે જ પીએમ મોદીએ એક ભારત શ્રેષ્ઠ ભારત યોજના લાગૂ કરી હતી. કેન્દ્ર તમિલ ભાષાના સન્માન અને વિકાસ માટે સમર્થન આપશે. 

સ્થાનિય નેતાઓમાં વિરોધના સૂર

બીજી તરફ એએનઆઇ એજન્સી મુજબ, શશિ થરૂરે કહ્યું હતું કે, 'દક્ષિણમાં ઘણી જગ્યાએ હિન્દી બીજી ભાષા તરીકે પ્રયોગ કરવામાં આવે છે. પરંતુ ઉત્તરમાં કોઇ મલયાલમ અથવા તમિલ નથી શીખતું.'

તમિલનાડુ ઉપરાંત હવે મહારાષ્ટ્રમાં પણ વિરોધના સૂર ઉઠ્યા છે. મહારાષ્ટ્ર નવનિર્માણ સેનાના એક નેતાએ નિવેદન આપ્યું છે કે, હિન્દી કોઇ રાષ્ટ્રીય ભાષા નથી. એમએનએસના સત્તાવાર ટ્વિટર એકાઉન્ટ પર એમએનએસ નેતા અનિલ શિદોરે કહ્યું કે, 'હિન્દી એક રાષ્ટ્રીય ભાષા નથી. તેને અમારા માથા પર ન થોપો'. આ ટ્વિટ મરાઠી ભાષામાં કરવામાં આવ્યું છે. 

"हिंदी ही राष्ट्रभाषा नाही. उगाच ती लादून आमची माथी भडकावू नका." - मनसे नेते अनिल शिदोरे#HindiImposition pic.twitter.com/wxja0RpCBT

— MNS Adhikrut (@mnsadhikrut) June 2, 2019

દક્ષિણ ભારતના નેતાઓમાં ડ્રાફ્ટને લઇને વિરોધના સૂર સતત વધી રહ્યા છે. પૂર્વ  નાણા મંત્રી પી. ચિદમ્બરમ અને ડીએમકે નેતા એમકે સ્ટાલિનના નિવેદનો બાદ હવે કર્ણાટકના સીએમ એચડી કુમારસ્વામી અને કોંગ્રેસ નેતા શશિ થરૂર હિન્દીને દક્ષિણ ભારત પર થોપવા વિરુદ્ધ ચેતવણી ઉચ્ચારી ચુક્યા છે.