જમ્મૂ કાશ્મીર / કેન્દ્રની સીધી નજર હેઠળ 50થી વધુ અલગતાવાદી નેતાઓની જેલ બની છે શ્રીનગરની આ હોટલ

જમ્મૂ કાશ્મીરની રાજધાની શ્રીનગરની ડલ ઝીલના કિનારે સેંટૂર હોટલ છે. તેમાં 50થી વધારે અલગતાવાદી નેતાઓને રાખવામાં આવ્યા છે. તમામ નેતાઓ કેન્દ્રની સીધી વોચ હેઠળ છે. આ હોટલ તેમના માટે જેલ બની છે. નેતાઓને સોમવારે તેમના પરિવારજનો સાથે મળવા દેવામાં આવ્યા હતા. પરિવારજનો તેમના માટે કપડાં, ફળ અને સામાન લઈને આવ્યા હતા. 5 ઓગસ્ટના રોજ જમ્મૂ કાશ્મીરથી આર્ટિકલ 370 હટાવી દેવાયા બાદ આ નેતાઓને અહીં રાખવામાં આવ્યા હતા. 

સેંટૂર હોટલમાં જે નેતાઓને રાખવામાં આવ્યા હતા તેમાં સજ્જાદ લોન, ઇમરાન અંસારી, યાસિર રેસી, ઈશ્કાક જબ્બાર, અશરફ મીર, સલમાન સાગર, મુબારક ગુલ, નઈમ અખ્તર, ખુર્શીદ આલમ, વાહિદ પારા, શેખ ઈમરાન પણ સામેલ છે. નેતાઓને મળીને આવનારા એક વડીલે કહ્યું કે આ એક જેલ જેવું છે. અમને આનંદ છે કે અમારો દીકરો ઠીકઠાક છે.

વડીલે કહ્યું અમને થોડીવાર માટે હોટલ રૂમની બહાર ગેલેરીમાં જવા માટેની પરમિશન આપવામાં આવી હતી. મારા દીકરાએ જણાવ્યું કે તેમની દેખરેખ કરવામાં આવે છે પણ તેમને એ વાતની જાણકારી નથી કે બહાર શું થઈ રહ્યું છે. જે લોકો મળવા આવી રહ્યા છે તે લોકો અને ન્યૂઝ પેપર્સ જ તેમની સૂચનાના સ્ત્રોત છે. હોટલમાં રાખવામાં આવેલા નેશનલ કોન્ફરન્સ, પીડીપી અને કોંગ્રેસના વરિષ્ઠ નેતાઓને બહારની ઘટનાઓની જાણકારી મળી રહે છે. 

હોટલમાં કોઈ ટીવી નથી, ફક્ત છાપાંનો સહારો

એક નેતાના નજીકના સહયોગીએ જણાવ્યું કે નેતાજી ઘાટીમાં રાજનીતિની સ્થિતિને લઈને ચિંતિત છે. અમે તેમને માટે કેટલોક સામાન લઈને ગયા હતા પણ સુરક્ષાકર્મીઓએ સિગરેટના પેકેટ લઈ જવાની અનુમતિ આપી નહીં. ઉલ્લેખનીય છે કે ગયા અઠવાડિયે રાજ્ય પ્રશાસને એક આદેશ જાહેર કર્યો હતો કે જેલમાં બંધ નેતાઓને તેમના પરિવારજનો સાથે મળવાની પરમિશન અપાશે. સુરક્ષાકર્મીએ કહ્યું કે નેતાઓને જેલની જેમ જ રહેવાની અનુમતિ આપવામાં આવી છે. હોટલમાં કોઈ ટીવી નથી. તેઓ બુક્સ કે પેપર વાંચવામાં પોતાને વ્યસ્ત રાખે છે. 

ફોટો સૌજન્ય- તમામ તસવીરો સેંટૂર હોટલની અધિકૃત વેબસાઈટ પરથી લેવામાં આવી છે.