15મી ઓગસ્ટે દેશભરમાં રાષ્ટ્રધ્વજ લહેરાવાય તે તો જાણે સ્વાભાવિક વાત થઇ, પરંતુ ઇસ્લામમાં પવિત્ર મનાતા મક્કામાં પણ જ્યારે તિરંગો લહેરાય અને રાષ્ટ્રગીત ગવાય તે આપણે સૌએ ગૌરવ લેવા જેવી વાત છે.
દેશના લાખો મુસ્લિમો દર વર્ષે હજ યાત્રા કરવા મક્કા મદીના જાય છે, પરંતુ આ વખતે હજ માટે ગયેલા લોકોએ મક્કામાં તિરંગો લહેરાવીને 15મી ઓગસ્ટની ઉજવણી કરી હતી.
દર 36 વર્ષે સળંગ ત્રણ વર્ષ સુધી ઓગસ્ટ માસમાં હજ પઢવી શક્ય બનતી હોય છે. તેવો યોગ આ વર્ષે પણ સર્જાયો હતો. ઇસ્લામિક કેલેન્ડરના આખરી માસ ધુ અલ- હિજ્જા(Dhu al-Hijjah)માં હજની યાત્રા થતી હોય છે.
કચ્છના થોડા મુસ્લિમો હજ પઢવા મક્કા ગયા હતા. ત્યાં તેઓએ સ્વતંત્રતા દિને હેડ કોન્સ્ટેબલ ઓસમાણ હિંગોરાની આગેવાની તળે ધ્વજારોહણ કરીને રાષ્ટ્રગીત પણ ગાયું હતું. 15મી ઓગસ્ટના રોજ મક્કામાં હોવાથી રાષ્ટ્રપ્રેમથી પ્રેરીત થઇને ત્યાં ઉપસ્થિત ભારતીય મુસ્લિમોએ સ્વતંત્રતા દિવસની ભાવભેર ઉજવણી કરી હતી. સૌએ મીઠું મોં પણ કર્યું હતું. આ પ્રસંગે ઉપસ્થિતજનોએ કચ્છમાંથી દુષ્કાળ જાય અને ભારતવર્ષમાં શાંતિ જળવાઇ રહે તે માટે દુઆ કરી હતી.
મક્કામાં હજ પઢવાને મુસ્લિમ લોકો ખૂબ પવિત્ર માને છે. જીવનમાં ઓછામાં ઓછી એક વાર તો હજ યાત્રા કરવાની દરેક મુસ્લિમ બિરાદરની અંતરેચ્છા હોય છે. આ વર્ષે સાઉદી અરબમાં ઉપસ્થિત કચ્છી મુસ્લિમ લોકોની હજ પઢવાની ઇચ્છા તો પૂર્ણ થઇ જ સાથે સાથે વિદેશમાં રાષ્ટ્રીય પર્વ ઉજવવા મળ્યું હતું. આથી આ લોકોમાં બેવડી ખૂશીની લાગણી ફેલાઇ હતી.