રક્ષાબંધને ભાઈને રાખડી બાંધવાની તૈયારીઓ દરેક બહેને અત્યાર સુધીમાં કરી લીધી હશે. પરંતુ તમે વિચાર્યું છે કે રાખડી બાંધતી સમયે ભાઈને શું ખવડાવશો. જો હજુ સુધી તમે આ માટેનો પ્લાન નથી કર્યો તો તમે ઘરે જ આ પારંપરિક મીઠાઈ બનાવી શકો છો. આ એક રીતે નારિયેળના લાડુના જેવી જ વાનગી છે. જેમાં થોડો ટ્વિસ્ટ લાવીને તમે તેના ખાસ કોકોનટ રોલ બનાવી શકો છો. તેનાથી તમને બહારની મીઠાઈનો ડર પણ રહેશે નહીં અને તમારી રક્ષાબંધન સારી રીતે ઉજવાશે. તો કરી લો ફટાફટ સરળ ચીજોથી મીઠાઈ તૈયાર.
સામગ્રી
1 વાટકી નારિયેળની છીણ
અડધી વાટકી મિલ્ક પાવડર
જરૂર અનુસાર ઉકાળેલું ઠંડુ કરેલું દૂધ
અડધી વાટકી બૂરું ખાંડ
ચપટી એલચી પાવડર
ચપટી લાલ રંગ
રીત
કોકોનટ રોલ બનાવવા માટે સૌ પહેલાં તો નારિયેળના છીણમાં મિલ્ક પાવડર, બૂરું ખાંડ, એલચી પાવડર મિક્સ કરો. તેનું મિશ્રણ બનાવી લો. હવે તેના એકસરખા ભાગ કરી લો. એક ભાગમાં લાલ રંગ અને જરૂર પ્રમાણેનું દૂધ ઉમેરીને તેને સારી રીતે મિક્સ કરો અને તેનું એક મિક્ષણ તૈયાર કરો. તેને થોડું મસળો એટલે તે ચીકણું અને લોટ જેવું બનશે.
હવે એક થોડી જાડી પ્લાસ્ટિકની થેલી લો અને તેની પર આ મિશ્રણમાંથી લોટને ગોળ ગોળ કરતાં જાવ અને રાખો. તેને હાથથી થોડો ચપટો કરો. હવે ઉપર લાલ રંગનું મિશ્રણ રાખો. તેની ઉપર ફરીથી પ્લાસ્ટિકની થેલી રાખો. તેને વણી લો. હળવા હાથે તેને વણો. હવે આ ગોળને પેપરની જેમ ગોળ ગોળ વાળો. અન્ય એક પ્લેટમાં થોડું નારિયેળનું છીણ લઈને તેમાં આ રોલને હળવા હાથે ફેરવો. જેથી તેની પર કોકોનટ છીણ ચોંટી જશે અને તેનો લૂક મસ્ત લાગશે. હવે તેને 2 કલાક ફ્રિઝમાં રહેવા દો. ફ્રિઝથી કાઢીને તેને 1-1 ઈંચના ગોળાકારમાં કાપી લો, તૈયાર છે તમારી રક્ષાબંધનની કોકોનટ રોલની મીઠાઈ. જે શુદ્ધ હોવાથી સૌ કોઈ તેનો સ્વાદ માણી શકશે.
નોંધ- અહીં તમે લાલ રંગને બદલે ચોકલેટ અને કોકો પાવડર મિક્સ કરીને તેને બ્રાઉન કલરનું પણ કરી શકો છો. નારિયેળ સાથે ચોકલેટ પણ સારો ટેસ્ટ આપે છે.