એક તરફ દેશમાં કોરોના વાયરસને કારણે છૂટછાટ સાથેનું લૉકડાઉન ચાલી રહ્યું છે. ત્યારે ડાયમંડ નગરી ગણાતા સુરતના 2 પોલીસકર્મીઓની દાદાગીરીનો વીડિયો સોશિયલ મીડિયામાં વાયરલ થઇ રહ્યો છે. આ વીડિયોમાં 2 પોલીસકર્મી એક વ્યક્તિને ઢોર માર મારી રહ્યા છે. જો કે, ત્યારબાદ બંન્નેને સસ્પેન્ડ કરવામાં આવ્યા હોવાનું જાણવા મળ્યું છે.
સુરતના ખટોદરા પોલીસ સ્ટેશનના બે પોલીસકર્મીઓની દાદાગીરી
પ્રાપ્ત થતી જાણકારી પ્રમાણે, વાઈરલ થઇ રહેલા સીસીટીવી વીડિયોમાં રાતના સમયે શોપિંગ સેન્ટરના વોચમેનને બે બાઈક સવાર પોલીસ દ્વારા અટકાવવામાં આવે છે. ત્યારબાદ એક પોલીસ જવાન તે ગાર્ડને પકડી રાખે છે અને બીજો પોલીસ જવાન તેને રીઢા ગુનેગારની જેમ દંડા વડે માર મારે છે.
સોશિયલ મીડિયામાં વાયરલ થયો વીડિયો
આ સમગ્ર ઘટનાક્રમ દરમિયાન અન્ય એક યુવક આવે છે. તેની પૂછપરછ કરી પોલીસ જવાન તેને બાઈક પાછળ બેસાડી લઈ જાય છે. આ ઘટનાનો વીડિયો હાસ સોશિયલ મીડિયામાં વાયરલ થઇ રહ્યો છે.
એક શોપિંગ કોમ્પલેક્ષના વોચમેનને કારણ વગર માર મારવાની ઘટનાએ સુરતમાં ચકચાર મચાવતા પોલીસના ઉચ્ચ અધિકારી હરકતમાં આવ્યા હતા અને બંન્ને પોલીસકર્મી સામે લાલઆંખ કરીને તાત્કાલિક અસરથી સસ્પેન્ડ કર્યા હતા.