એ...એ...એ...ખાબક્યુ: સુરતમાં અચાનક ત્રીજા માળેથી પડ્યું એમ્બ્રોડરીનું મશીન અનેકના જીવ બચ્યાં

સુરતઃ હીરાનગરી સુરત હીરા સાથે ટેક્ષ્ટાઇલ ક્ષેત્રે પણ આગવી ઓળખ ધરાવે છે. મોટા પ્રમાણમાં લોકો એમ્બ્રોડરીના બિઝનેસ સાથે જોડાયેલા છે. ત્યારે હવે એમ્બ્રોડરીના પણ અનેક કિસ્સાઓ સામે આવી રહ્યા છે. જેમાં એક દુર્ઘટના ઘટતા ઘટતા રહી ગઇ... કહેવત છે ને કે આયુષ્યથી વધુ કે ઓછુ કોઇ નથી જીવી શકતું. એક વીડિયો તમને બતાવવા જઇ રહ્યા છીએ જેમાં કેટલાક લોકોને 'રામે રાખ્યા' એમ કહો તો ખોટું નથી. સુરતમાં એક એમ્બ્રોડરીનું મશીન ક્રેઇન દ્વારા નીચે ઉતારતા સમયે ત્રીજા માળેથી પડ્યું હતું.

આ મશીનને ક્રેન મારફતે ખસેડવામાં આવી રહ્યું હતું ત્યારે દુર્ઘટના ઘટી હતી. ગજેરા સર્કલ નજીક બીજા માળેથી એમ્બ્રોડરીનું મશીન નીચે પટકાયુ હતુ. ક્રેઇનની મદદથી મશીન નીચે ઉતારવામાં આવી રહ્યું હતું. મશીન જ્યારે નીચે પડ્યું ત્યારે 2 યુવક નીચે ઉભા હતા. 2 રાહદારીઓ પસાર થઇ રહ્યા હતા અને એક રિક્ષા પણ પસાર થઇ રહી હતી. 



જોકે નીચે ઉભેલા યુવકોનો કુદરતી રીતે બચાવ થયો હતો. સમગ્ર ઘટનામાં કોઈ જાનહાની થઈ નથી. જોકે એક યુવકને ઈજા પહોંચી છે. ઈજાગ્રસ્ત યુવકને સારવાર માટે સ્મીમેર હોસ્પિટલમાં ખસેડવામાં આવ્યો છે.

ઉલ્લેખનીય છે કે થોડા દિવસ અગાઉ સહારા દરવાજા નજીક સિદ્ધિવિનાયક પાસે એક એમ્બ્રોડરી મશીન નીચે ઉતારતા સમયે ઊંધુ વળી ગયું હતું. જેને લઇને મશીન નીચે પટકાયું જેમાં ત્રણ વાહનો અને કારનો કચ્ચરઘાણ નીકળી જવા પામ્યો હતો. જો કે સદનસીબે કોઇ જાનહાની થવા પામી ન હતી.