સુરત: શહેરમાં અકસ્માતના બનાવોમાં વધારો થઈ રહ્યો છે. છેલ્લા 1 અઠવાડિયામાં 2 અકસ્માતની ઘટનાઓ સામે આવી છે. શહેરના અડાજણ વિસ્તારમાં 8 દિવસ પહેલા કાર ચાલકે બાઈક સવારને અડફેટે લીધો હતો. બેફામ આવી રહેલી કાર બાઈક ચાલકને ટક્કર મારીને ડિવાઈડર પર ચડી હતી.
આ ઘટનામાં બાઈક સવાર દંપતીને ઈજા પહોંચી હતી. તો બીજી તરફ સરથાણા વિસ્તારના સીમાડા નાકા પાસે પુર ઝડપે આવી રહેલા ડમ્પરે બાઈક સવારને અડફેટે લીધો હતો. આ અકસ્માતમાં આધેડ અને બાળકનું ઘટના સ્થળે મોત નિપજ્યુ હતું. ત્યારે હવે પોલીસે CCTVના આધારે તપાસ શરૂ કરી છે.
સુરતમાં બેફામ કારનો વીડિયો આવ્યો સામે
અડાજણ વિસ્તારમાં 8 દિવસ પહેલા કાર ચાલકે બાઈક સવારને ટક્કર મારી હતી. આ ઘટનાના CCTV સામે આવ્યા છે. CCTVમાં દેખાઈ રહ્યુ છે કે બેફામ આવી રહેલી કારે બાઈક સવારને અડફેટે લીધા હતા. ત્યાર બાદ કાર ડિવાઈડર પર ચડી હતી.
આ ઘટનામાં બાઈકસવાર દંપતીને ઈજા પહોંચી હતી. ત્યાર બાદ ઈજાગ્રસ્તોને સારવાર માટે ખાનગી હોસ્પિટલમાં ખસેડવામાં આવ્યા હતા. ત્યારે હવે પોલીસે CCTVના આધારે કારચાલક સામે ગુનો નોંધી તપાસ હાથ ધરી છે.