ભારતીય પ્રતિસ્પર્ધા આયોગ (સીસીઆઇ)એ રિલાયન્સ ઇન્ડસ્ટ્રીઝ અને ફ્યૂચર ગ્રૂપની ડીલને મંજૂરી આપતાં હવે અમેરિકાની દિગ્ગજ ઈ-કોમર્સ કંપની એમેઝોનને મોટો ઝટકો લાગ્યો છે.
અત્રે ઉલ્લેખનીય છે કે રિલાયન્સ ગ્રૂપે ઓગસ્ટમાં ફ્યૂચરના રિટેલ, હોલસેલ, વેરહાઉસિંગ અને લોજિસ્ટિક બિઝનેસ અધિગ્રણ કરવા માટે રૂ. ૨૪,૭૧૩ કરોડની ડીલ કરી હતી. એમેઝોન આ ડીલનો વિરોધ કરી રહી છે અને સિંગાપોરની આર્બિટ્રેશન કોર્ટ (લવાદી અદાલતે)એ એમેઝોનની તરફેણમાં ચુકાદો સંભળાવ્યો હતો.
જોકે સીસીઆઇએ ટ્વિટ કરીને જણાવ્યું છે કે ફ્યૂચર ગ્રૂપના રિટેલ, હોલસેલ, લોજિસ્ટિક અને વેરહાઉસિંગ બિઝનેસના રિલાયન્સ રિટેલ વેન્ચર્સ લિમિટેડ અને રિલાયન્સ રિટેલ એન્ડ ફેશન લાઇફસ્ટાઇલ લિમિટેડ દ્વારા ટેકઓવર (અધિગ્રહણ) કરવાની ડીલને મંજૂરી આપવામાં આવી છે. સીસીઆઇ બજારમાં અયોગ્ય બિઝનેસ પ્રવૃત્તિઓ પર નજર રાખવા અને પ્રતિસ્પર્ધા ટકાવી રાખવા માટે નિયામક (રેગ્યુલેટર)ની ભૂમિકા ભજવે છે.
ફ્યૂચર-રિલાયન્સ ડીલની વિરુદ્ધ એમેઝોન કાનૂની લડત લડી રહી છે. ફ્યૂચર ગ્રૂપ અને એમેઝોન વચ્ચેનાે મામલો હાલ દિલ્હી હાઈકોર્ટમાં પણ વિચારાધીન છે. એમેઝોન દ્વારા આ ડીલમાં દખલગીરી કરવા સામે રોક લગાવવાની માગણી કરતી ફ્યૂચર ગ્રૂપની પિટિશન પર દિલ્હી હાઈકોર્ટે પોતાનો ચુકાદો શુક્રવારે અનામત રાખ્યો હતો. અદાલતે સંબંધિત પક્ષકારોને તેમની પ્રતિક્રિયા લેખિતમાં આપવા માટે ૨૩ નવેમ્બર સુધીનો સમય આપ્યો છે. એમેઝોને આ ડીલ સામે સેબી સમક્ષ પણ ફરિયાદ કરી છે. સિંગાપોરની આર્બિટ્રેશન કોર્ટે પોતાના વચગાળાના ચુકાદામાં ફ્યૂચર ગ્રૂપ અને મૂકેશ અંબાણીના નેતૃત્વમાં રિયાલન્સ ઇન્ડસ્ટ્રીઝ વચ્ચે ૨૪,૭૧૩ કરોડની ડીલની સમીક્ષા કરીને તેના પર રોક લગાવી હતી.
રિલાયન્સ ઇન્ડસ્ટ્રીઝની સબસિડિયરી કંપની રિલાયન્સ રિટેલ વેન્ચર્સ લિમિટેડ (આરઆરવીએલ)એ આ વર્ષે ઓગસ્ટમાં ફ્યૂચર ગ્રૂપના રિટેલ એન્ડ હોલસેલ બિઝનેસ અને લોજિસ્ટિક એન્ડ વેરહાઉસિંગ બિઝનેસને ટેકઓવર કરવાની જાહેરાત કરી હતી. તેનાથી દેશનાં ૪૨૦ શહેરમાં પથરાયેલ ફ્યૂચર ગ્રૂપના બિગ બાઝાર, ઈઝિડે અને એફબીબીના ૧૮૦૦થી વધુ સ્ટોર્સ સુધી રિલાયન્સ ગ્રૂપની પહોંચ બનશે, પરંતુ અમેરિકાની ઈ-કોમર્સ કંપની એમેઝોને રિલાયન્સ ઇન્ડસ્ટ્રીઝ લિમિટેડ (આરઆઇએલ) અને ફ્યૂચર ગ્રૂપ વચ્ચે થયેલી આ ડીલ સામે સવાલ ઉઠાવ્યા હતા. એમેઝોનનો આક્ષેપ છે કે ફ્યૂચર ગ્રૂપે કોન્ટ્રેક્ટના નિયમોનો ભંગ કર્યો છે. આ સંદર્ભમાં એમેઝોને ફ્યૂચર ગ્રૂપના પ્રમોટર્સને લીગલ નોટિસ પણ બજાવી હતી.
ગઈ સાલ એમેઝોને ફ્યૂચર ગ્રૂપની એક નોન-લિસ્ટેડ કંપની ફ્યૂચર કૂપોન્સ લિમિટેડમાં ૪૯ ટકા સ્ટેક ખરીદ્યો હતો. સાથે જ ગ્રૂપની લિસ્ટેડ કંપની ફ્યૂચર રિટેલ લિમિટેડમાં રાઇટ ટૂ ફર્સ્ટ રિફ્યુઝલની પણ ડીલ કરી હતી.
આ ડીલનો અર્થ એ છે કે ફ્યૂચરમાં સ્ટેક ખરીદવા માટે પ્રથમ રાઇટ્સ એમેઝોનને મળશે અને તેના ઇનકાર બાદ જ ફ્યૂચર આ સ્ટેક અન્ય કોઈને વેચી શકે છે. એમેઝોનનો દાવો છે કે ફ્યૂચર કૂપોન્સ સાથે થયેલી તેની ડીલ ગ્રૂપને ફ્યૂચર રિટેલમાં કોઈ ટ્રાન્ઝેક્શન કરતાં અટકાવે છે.