સ્માર્ટફોન યુઝર્સ પર ફરી એકવાર મોટો ખતરો આવી ગયો હોય એવું લાગી રહ્યું છે. જેથી આ મામલાની ગંભીરતાને જોતા સીબીઆઈએ દેશભરમાં એલર્ટ જારી કર્યું છે. સીબીઆઈએ આ એલર્ટમાં તમામ રાજ્યોની પોલીસ અને કાનૂની સંસ્થાઓને એક મેલવેયર (વાયરસ) પર નજર રાખવા કહ્યું છે. આ ખતરનાક વાયરસ કોરોના વાયરસ અપડેટથી જોડાયેલો હોવાનું સામે આવ્યું છે.
કોરોના સંકટમાં હવે મોબાઈલ હેકિંગનો ખતરો વધ્યો
હેકર્સ મોબાઈલમમાં આવો મેસેજ મોકલી યુઝર્સને ફસાવે છે
જો યુઝરના મોબાઈલમાં વાયરસ ઈન્સ્ટોલ થઈ જાય તો બધો ડેટા ચોરી લે છે
સીબીઆઈને મળી જાણકારી
મંગળવારે સીબીઆઈએ એક નિવેદનમાં કહ્યું, અમને ઈન્ટરપોલ પાસેથી કેટલાક ઈન્પુટ મળ્યાં છે. જેના આધારે બેંકિંગ ટ્રોજન 'Cerberus'ને લઈને એલર્ટ જાહેર કરવું પડ્યું છે. આ વાયરસના કામ કરવાની રીતને સમજાવતા સીબીઆઈએ કહ્યું કે, 'Cerberus' કોરોના મહામારીનો ખોટી રીતે ફાયદો ઉઠાવીને યુઝર્સને બનાવટી મેસેજ મોકલે છે.
લિંક પર ક્લિક કરતાં જ ઈન્સ્ટોલ થઈ જાય છે વાયરસ
આજકાલ યુઝર્સ કોરોના વિશે વધુ માહિતી મેળવવા માચે ઓનલાઈન આર્ટિકલ્સ અને રિસર્ચ પેપર્સ વધુ વાંચી રહ્યાં છે. કોરોના પ્રત્યે ડર અને ઉત્સુકતાને જોતા હેકર્સ યુઝપ્સને ટેક્સ્ટ મેસેજ દ્વારા એક લિંક મોકલી રહ્યાં છે. આ લિંકમાં કોરોના વાયરસથી જોડાયેલી જાણકારી આપવાની વાત કહેવામાં આવે છે. હેકર્સની આ યુક્તિથી અજાણ યુઝર્સ લિંક પર ક્લિક કરી દે છે અને આ ખતરનાક મેલવેયર વાયરસ ફોનમાં ઈન્સ્ટોલ થઈ જાય છે.
રિમોટ સર્વર પર જાય છે ડેટા
એક્સપર્ટ અને બ્લોગર્સએ 'Cerberus'ને ખતરનાક જણાવતા યુઝર્સને સાવધાન રહેવાની સલાહ આપી છે. એવું કહેવાય છે કે જો એકવાર ફોનમાં આ ઈન્સ્ટોલ થઈ જાય તો ઘણો ડેટા ચોરી કરી શકે છે. એવામાં યુઝર્સના પર્સનલ ડેટાની સાથે અન્ય અગત્યનો ડેટા પણ ખતરામાં પડી શકે છે. એક્સપર્ટનું કહેવું છે કે, હેકર્સ આ ડેટાને ચોરીને તમામ જાણકારી કોઈ રિમોટ સર્વર પર મોકલે છે.
બેંક બેલેન્સ ખાલી થવાનું ડર
સીબીઆઈ મુજબ 'Cerberus' યુઝર્સની બેંકિંગ ડિટેલ્સની સેફ્ટી માટે પણ બહુ મોટા ખતરા સમાન છે. સીબીઆઈએ ચેતવણી આપતા કહ્યું કે, આ ટ્રોઝન યુઝરના ફાઈનાન્શિયલ ડેટા જેમ કે, ક્રેડિટ કાર્ડ અને ડેબિટ કાર્ડ નંબર અને અન્ય ડિટેલ્સ ચોરી કરવા પર ફોકસ કરે છે. આ સિવાય તેઓ ખૂબ ચાલાકીથી યુઝર્સને તેમની જાળમાં ફસાવીને પર્સનલ ઈન્ફર્મેશન અને ટૂ-ફેક્ટર ઓથેન્ટિકેશન ડીટેલ્સને એક્સેસ કરી લે છે.