કોલકાતામાં CBI-મમતા બેનર્જી વિવાદ: સુપ્રીમ કોર્ટમાં 5મીએ થશે સુનાવણી

પશ્ચિમ બંગાળના કોલકત્તામાં ગઈ કાલે થયેલા હાઈ વોલ્ટેજ ડ્રામાનો મામલો છેક સુપ્રીમ કોર્ટ સુધી પહોંચ્યો હતો. જેને લઇને સીબીઆઇ દ્વારા સુપ્રીમ કોર્ટમાં અરજી કરવામાં આવી હતી. સીબીઆઇ દ્વારા કરવામાં આવેલી અરજીને લઇને સુપ્રીમ કોર્ટમાં સુનાવણી ટળી છે. સીબીઆઇએ બંગાળ પોલીસ વિરુધ્ધમાં સુપ્રીમમાં અરજી કરી હતી. બંગાળ પોલીસ દ્વારા તપાસમાં અડચણ પેદા કરવાનો આરોપ લગાવામાં આવ્યો છે.

સીજેઆઇએ આવતી કાલે સુનાવણી કરવા આદેશ કર્યો છે. જો કે આ મુદ્દે સરકારી વકીલે આશંકા વ્યક્ત કરતાં જણાવ્યું કે પુરાવા નષ્ટ પણ કરી શકાય તેવી શક્યતા છે. જો કે સીજેઆઇએ આ મુદ્દે જણાવ્યું કે આજે જ સુનાવણી થાય તે જરૂરી નહીં.

સીજેઆઇએ જણાવ્યું કે પુરાવો આપો પોલીસ કમિશ્નર વિરુધ્ધ કાર્યવાહી કરીશું. જો કે સોલિસિટર જનરલે પુરાવા નષ્ટ થયાની આશંકા વ્યક્ત કરી છે. સુપ્રીમ કોર્ટે તમામ પક્ષોને પુરાવા લાવવા જણાવ્યું છે.

CJIની અધ્યક્ષતાવાળી ખંડપીઠ સમક્ષ  CBI પોતાનો મામલો રજૂ કરશે. જે અંતર્ગત સુપ્રીમ કોર્ટમાં સુનાવણી હાથ ધરાશે. મહત્વની વાત છે કે પશ્ચિમ બંગાળ સરકારના વકીલ પણ કોર્ટમાં હાજર રહી શકે છે.

ઉલ્લેખનીય છે કે ગઈ કાલે CBI અને કોલકત્તા પોલીસ વચ્ચે ભારે ઘર્ષણ થયુ હતુ. શારદા ચીટ ફંડ મામલે તપાસ કરવા પહોંચેલી CBIની ટીમ અને કોલકત્તા પોલીસ વચ્ચે ઘર્ષણ થયુ હતુ. CBIની ટીમ કોલકત્તા પોલીસ કમિશનર રાજીવ કુમારના ઘરે તપાસ માટે જઈ રહી હતી.

રાજીવ કુમારના નિવાસસ્થાને પહોંચે તે પહેલા કોલકત્તા પોલીસે CBIની ટીમની અટકાયત કરી હતી. CBIની ટીમની અટકાયત કરીને તેમની પાસેથી પેપર વર્કની માગ કરી હતી.

ઘટનાની જાણ થતા મુખ્યમંત્રી મમતા બેનરજી કમિશનરના નિવાસસ્થાને પહોંચ્યા હતા. ભારે ખેંચતાણ બાદ CBIના અધિકારીઓને મુક્ત કરવામાં આવ્યા હતા.

કોલકત્તામાં સીબીઆઇ અને પશ્વિમ બંગાળની પોલીસ વચ્ચે થયેલ ઘર્ષણ રાજકારણ સુધી પહોંચી ગયું છે. રવિવાર રાત્રે પશ્વિમ બંગાળની મુખ્યમંત્રી મમતા બેનર્જીએ મીડિયા સાથે વાતચીતમાં ભાજપ સરકાર પર આકરા પ્રહાર કર્યા હતા. ત્યારબાદ તેઓ મેટ્રો ચેનલ નજીક ધરણા પર બેસી ગયા છે. તેમની સાથે પોલીસ કમિશ્નર રાજીવ કુમાર પણ ધરણા પર બેઠા છે. મમતા બેનર્જી વડાપ્રધાન નરેન્દ્ર મોદી વિરુધ્ધ ધરણા પર બેઠા છે. મમતા બેનર્જીએ ધરણાં પરથી નિવેદન આપતાં કહ્યું કે હું બજેટ રજૂ નહિં કરુ ધરણાં કરીશ. ઉલ્લેખનીય છે કે પશ્ચિમ બંગાળમાં આજે બજેટ રજૂ થવાનું છે.