સ્માર્ટ ફોન યુઝર્સની જાસૂસીની મોટી ઘટના સામે આવી છે, જેમાં આઇફોનની સાથે જ એન્ડ્રોઇડ સ્માર્ટ ફોન યુઝર્સનો ડેટા ચોરી થઇ રહ્યો છે. આ ડેટા ચોરીમાં વર્ચ્યુઅલ પ્રાઇવેટ નેટવર્ક અને મોબાઇલ એડ બ્લોકિંગ એપ્સનો ઉપયોગ કરવામાં આવી રહ્યો છે. રિસર્ચરે આવી 20 એપ્સની ઓળખ કરી છે. યુઝર્સની જાસૂસી કરનારી આ એપ્સને સેન્સર ટાવરે ડેવલપ કરી છે. સ્માર્ટ ફોનમાં તે કોઇ પણ સામાન્ય એપની જેમ કામ કરતાં જોવા મળે છે, પરંતુ તે સ્માર્ટ ફોનની એક્ટિવિટી પર નજર રાખે છે.
આઇફોનની સાથે એન્ડ્રોઇડ સ્માર્ટ ફોન યુઝર્સનો ડેટા થઇ રહ્યો છે ચોરી
દુનિયાભરમાં 3.5 કરોડથી વધુ વખત ડાઉનલોડ કરાઇ છે સેન્સર ટાવર એપ્સને
ગૂગલ અને એપલે કાર્યવાહી શરૂ કરી, તેના એપ સ્ટોર પર પણ છે નકલી એપ
એક રિપોર્ટ મુજબ આ સેન્સર ટાવર એપ્સને દુનિયાભરમાં 3.5 કરોડથી વધુ વખત ડાઉનલોડ કરાઇ છે. આ એપ્સ એન્ડ્રોઇડ અને આઇઓએસ ડિવાઇસથી સેન્ડ અને રિસિવ થતાં ડેટાને એક્સેસ કરીને એપ ડેવલોપર સુધી મોકલવામાં આવે છે. આ નકલી એપ સરળતાથી યુઝર્સને થર્ડ પાર્ટી રૂટ સર્ટિફિકેટ ઇન્સ્ટોલ કરવા માટે મનાવી લે છે, જેથી ગૂગલ પ્લે અને એપલ પ્લે સ્ટોરની સિક્યોરિટીમાં ઘૂસીને યુઝર્સની જાસૂસી થઇ શકે.
રિસર્ચરે જે એપને બ્લેક લિસ્ટ કરી છે તે યુઝર્સની જાણકારીમાં ન આવે તે રીતે પ્રાઇવેટ વેબ એક્ટિવિટીને ક્રેક કરે છે. આ એપ યુઝર્સને એવી પણ જાણકારી થવા દેતા નથી કે તેને સેન્સર ટાવરે ડેવલપ કરી છે. ચિંતાની વાત એ છે કે તેમાંથી ઘણી એપ હજુ પણ ગૂગલ અને એપલ પ્લે સ્ટોર પર હાજર છે. રિસર્ચરે જે એપ્સની ઓળખ કરી છે તેમાં એડ બ્લોક ફોક્સ, એડ બ્લોક વાઇફાઇ, એડ બ્લોક મોબાઇલ, હોટસ્પોટ વીપીએન, ફ્રી એન્ડ અનલિમિટેડ વીપીએન, વાઇફાઇ બુસ્ટર સામેલ છે.
આ રિપોર્ટ બાદ ગૂગલ અને એપલે આ એપ્સ વિરુદ્ધ એક્શન લેવાનું શરૂ કર્યું છે. બંને કંપનીઓએ પોતપોતાના એપસ્ટોરથી ઘણી બધી એપ્સ હટાવી લીધી છે અને યુઝર્સની જાસૂસી કરનાર એપ્સની તપાસ પણ શરૂ કરી દીધી છે.