કોમનવેલ્થ ગેમ્સ 2022માં ભારતમાંથી 200થી વધુ ખેલાડીઓની મોટી ટીમ મોકલવામાં આવી, ખેલાડીઓ માટે ભોજનના ધાંધીયા તો પીવી સિંધુમાં જોવા મળ્યા કોરોનાના લક્ષણો
કોમનવેલ્થ ગેમ્સ 2022 આજથી એટલે કે 28 જુલાઈથી શરૂ
બર્મિંગહામમાં યોજાનારી આ ગેમ્સ 8 ઓગસ્ટ સુધી ચાલશે
કોમનવેલ્થમાં ભાગ લેવા પહોંચેલા ખેલાડીઓ માટે ભોજનના ધાંધીયા
પીવી સિંધુમાં જોવા મળ્યા કોરોનાના લક્ષણો
કોમનવેલ્થ ગેમ્સ 2022 આજથી એટલે કે 28 જુલાઈથી શરૂ થઈ રહી છે. ઈંગ્લેન્ડના બર્મિંગહામમાં યોજાનારી આ ગેમ્સ 8 ઓગસ્ટ સુધી ચાલશે. કોમનવેલ્થ ગેમ્સ 2022માં ભારતમાંથી 200થી વધુ ખેલાડીઓની મોટી ટીમ મોકલવામાં આવી છે, આ વખતે કોમનવેલ્થ ગેમ્સમાં મહિલા ક્રિકેટનો પણ સમાવેશ કરવામાં આવ્યો છે. આ તરફ હવે કોમનવેલ્થમાં ભાગ લેવા પહોંચેલા ખેલાડીઓ માટે ભોજનના ધાંધીયા હોવાનું સામે આવ્યું છે. આ સાથે પીવી સિંધુની તબિયત લથડી હોવાનું પણ સામે આવ્યું છે.
ખેલાડીઓ માટે ભોજનના ધાંધીયા
બર્મિંગહામમાં કોમનવેલ્થ માટે પહોંચેલી ભારતીય મહિલા ક્રિકેટ ટીમની ખેલાડીઓએ પણ કેટલીક ફરિયાદો કરી છે, સૂત્રોએ જણાવ્યું કે, મોટાભાગની ખેલાડીઓએ એક જ રૂમ શેર કરવો પડે છે. વળી, જમવા માટે હોટેલ (સ્પોર્ટ્સ વિલેજ)ની બહાર જવું પડે છે. સૂત્રો મુજબ ટીમે ખેલાડીઓ માટે અલગ રૂમની માંગણી કરી હતી. પરંતુ અત્યાર સુધી ભારતીય ઓલિમ્પિક એસોસિએશન (IOA) એ ફક્ત શેર કરેલા રૂમ આપ્યા છે. ખેલાડીઓને અહીં ખાવાનું પણ મળતું નથી. મોટાભાગના ખેલાડીઓ બહાર જઈને પોતાનો ખોરાક લઈ રહ્યા છે. તેમણે કહ્યું કે અત્યાર સુધી માત્ર કેપ્ટનને જ અલગ રૂમ આપવામાં આવ્યો છે.
બે વખતની ઓલિમ્પિક મેડલ વિજેતા અને બેડમિન્ટન સ્ટાર પીવી સિંધુને આઈસોલેશનમાં રાખવામાં આવી હતી. તેના પ્રારંભિક કોવિડ ટેસ્ટમાં કોરોનાના કેટલાક લક્ષણો જોવા મળ્યા હતા. સૂત્રોએ જણાવ્યું કે, તેની સાથે આવેલા અન્ય ખેલાડીઓની પણ તપાસ કરવામાં આવી હતી. જ્યારે કેટલાક હળવા લક્ષણો જોવા મળ્યા હોઇ ત્યારે તેમને સાવચેતી તરીકે એકાંતમાં રાખવામાં આવ્યા હતા. પરંતુ તેણે તેની બીજી ટેસ્ટ ક્લીયર કરી લીધી છે. બીજો ટેસ્ટ સંપૂર્ણપણે નેગેટિવ હતો, જેના કારણે હવે દરેક ટીમ સાથે છે.
સિંધુ અને મનપ્રીત ભારતના ધ્વજ ધારક હશે
આ વખતે ઓપનિંગ સેરેમની માટે પીવી સિંધુની સાથે હોકી ટીમના કેપ્ટન મનપ્રીત સિંહને ધ્વજ વાહક બનાવવામાં આવ્યા છે. ભારત ઘણીવાર કોમનવેલ્થ ગેમ્સમાં સારું પ્રદર્શન કરે છે અને ટોપ-3માં સ્થાન મેળવે છે. આવી સ્થિતિમાં આ વખતે પણ ભારત અહીં ઈતિહાસ રચે તેવી આશા છે. નીરજ ચોપરા અને મેરી કોમની ગેરહાજરીમાં આ વખતે કોમનવેલ્થ ગેમ્સમાં ભારતને પીવી સિંધુ, મીરાબાઈ ચાનુ, રવિ દહિયા, નિખત ઝરીન, મનિકા બત્રા સહિત અન્ય ઘણા ખેલાડીઓ પાસેથી ગોલ્ડ મેડલની આશા છે.