સુવિધા / સુરક્ષા દળો માટે મોદી સરકારનો મોટો નિર્ણય, 35 લાખ કર્મીઓને મળશે આ લાભ

• કેન્દ્રીય અર્ધલશ્કરી દળના જવાનો માટે મોદી સરકારનો નિર્ણય
• જવાનો અને તેના પરિવારોને હોસ્પિટલમાં કેશલેસ સારવાર મળશે
• આયુષ્માન ભારત યોજના હેઠળ આ સુવિધાનો લાભ લઇ શકાશે

અમે સુરક્ષાકર્મીઓનું ધ્યાન રાખ્યું છે: અમિત શાહ

ગૃહમંત્રી અમિત શાહે એનએસજીના જવાનોને આયુષ્માન કાર્ડ સોંપી આ યોજનાની શરૂઆત કરી હતી. ગૃહ મંત્રાલયે 31 ડિસેમ્બર સુધી કેન્દ્રીય અર્ધસૈનિક દળના 35 લાખ જવાનોને આયુષ્માન કાર્ડ આપવાનું લક્ષ્ય રાખ્યું છે. ગૃહ મંત્રાલય અંતર્ગત સાત કેન્દ્રીય અર્ધસૈનિક દળ આવે છે. જેમાં એનએસજી, આસામ રાઈફલ્સ, આઈટીબીપી, એસએસબી, સીઆઈએસએફ, બીએસએફ અને સીઆરપીએફ સામેલ છે. આ બધા માટે આયુષ્માન સીએપીએફ યોજનાની રાષ્ટ્રીય સ્તર પર શરૂઆત કરતા અમિત શાહે કહ્યું કે મોદી સરકારે હંમેશા સુરક્ષાકર્મીઓના હિત વિશે ધ્યાન રાખ્યું છે અને આ તેનો જ એક ભાગ છે. તેમણે કહ્યું કે આ યોજના હેઠળ કેન્દ્રીય અર્ધસૈનિકદળોના બધા કર્મચારીઓ તેના આશ્રિતો કવર થઇ જશે. આ યોજનાને ગૃહ મંત્રાલય, સ્વાસ્થ્ય મંત્રાલય અને નેશનલ હેલ્થ ઓથોરિટીએ સંયુક્ત રીતે તૈયાર કર્યુ છે.

ગૃહ મંત્રાલયે એક ટોલ ફ્રી હેલ્પલાઈન નંબર જાહેર કર્યો

આયુષ્માન સીએપીએફ યોજના હેઠળ લાભાર્થીઓને સારવાર દરમ્યાન કોઈ પણ પ્રકારની મુશ્કેલી ના સર્જાય. જેના માટે ગૃહ મંત્રાલયે એક ટોલ ફ્રી હેલ્પલાઈન નંબર જાહેર કર્યો છે. આ સાથે ઓનલાઈન ફરિયાદની પ્રણાલી તૈયાર કરી છે. જેથી લાભાર્થીઓ પર આવતી મુશ્કેલીઓને તાત્કાલિક દૂર કરી શકાય. ઉલ્લેખનીય છે કે, અમિત શાહે આ વર્ષે જાન્યુઆરીમાં આસામમાંથી આ યોજનાનો પાયલટ પ્રોજેક્ટ શરૂ કર્યો હતો. ત્યારબાદ ડિસેમ્બર સુધી આઝાદીના અમૃત મહોત્સવ હેઠળ 7.5 લાખ કાર્ડ સોંપવાની તૈયારી હતી. જોકે, બાદમાં તેને વધારીને બધા 35 લાખ કર્મચારીઓને આપવાનો નિર્ણય કરવામાં આવ્યો.