ભારત સહિત મોટા ભાગના દેશોમાં કોવિડને લગતા નિયંત્રણો હટાવી દેવામાં આવ્યા તો હવે વિશ્વના આ દેશમાં કોરોનાએ મચાવ્યો હાહાકાર
કોરોના વાયરસનો હાહાકાર ફરી એકવાર સામે આવ્યો
અમેરિકામાં કોરોનાના નવા પ્રકારે ચિંતા વધારી
બાળકોમાં સંક્રમણના કેસમાં ઝડપથી વધારો થયો
છેલ્લા 4 અઠવાડિયામાં 1 લાખ 30 હજાર બાળકોને કોરોના
કોરોના વાયરસનો હાહાકાર ફરી એકવાર સામે આવ્યો છે. વાત જાણે એમ છે કે, વિશ્વભરમાં કોરોના મહામારીને લઈને હજુ પણ યુદ્ધ ચાલી રહ્યું છે. ભારત સહિત મોટા ભાગના દેશોમાં કોવિડને લગતા નિયંત્રણો હટાવી દેવામાં આવ્યા છે, પરંતુ સરકાર તેને રોકવા માટે દરેક પગલા લઈ રહી છે. આ દરમિયાન અમેરિકાથી આવી રહેલા સમાચારોએ દરેક માટે ચિંતાનો માહોલ ઉભો કર્યો છે. અમેરિકામાં કોરોનાના નવા પ્રકારને કારણે બાળકોમાં સંક્રમણના કેસમાં ઝડપથી વધારો થયો છે.
એક અમેરિકન રિપોર્ટ અનુસાર છેલ્લા 4 અઠવાડિયામાં 1 લાખ 30 હજાર બાળકોમાં કોરોના સંક્રમણ જોવા મળ્યું છે. આ આંકડો વધે તેવી શક્યતા છે. અમેરિકામાં પુખ્ત વયના લોકોની સાથે બાળકોને પણ કોરોનાની રસી આપવામાં આવી છે, તેમ છતાં ત્યાં બાળકોમાં કોરોના સંક્રમણના વધુ કેસ જોવા મળી રહ્યા છે. માહિતી અનુસાર કોવિડ-19ની શરૂઆતથી અત્યાર સુધીમાં દેશમાં લગભગ 1.53 કરોડ બાળકોના કોરોના ટેસ્ટ પોઝિટિવ જોવા મળ્યા છે. રિપોર્ટ અનુસાર લગભગ 80 ટકા અમેરિકન લોકો કે જેમને પહેલાથી કોવિડ છે, તેઓ ફરી એકવાર આ પ્રકારથી સંક્રમિત થઈ શકે છે.
ભારતમાં કોરોનાની સ્થિતિ કેવી ?
મંગળવારે એટલે કે 21 ફેબ્રુઆરીના કેન્દ્રીય સ્વાસ્થ્ય મંત્રાલયના અપડેટ ડેટા અનુસાર ભારતમાં 95 નવા કોરોના વાયરસ કેસ નોંધાયા છે. આ સાથે હવે સક્રિય કેસોની સંખ્યા વધીને 1,921 થઈ ગઈ છે. સવારે 8 વાગ્યે મંત્રાલયના અપડેટ ડેટામાં કહેવામાં આવ્યું છે કે. મૃત્યુઆંક 5,30,761 છે. મંત્રાલયે કહ્યું કે, વાયરસના કેસોની સંખ્યા 4.46 કરોડ નોંધાઈ છે, જ્યારે રાષ્ટ્રીય કોવિડ 19 રિકવરી રેટ 98.81% નોંધવામાં આવ્યો છે. તો વળી ચેપમાંથી સાજા થનારા લોકોની સંખ્યા વધીને 4,41,42,460 થઈ ગઈ છે.
મંત્રાલયની વેબસાઇટ અનુસાર દેશવ્યાપી રસીકરણ અભિયાન હેઠળ, દેશમાં અત્યાર સુધીમાં કોવિડ રસીના કુલ 220.63 કરોડ ડોઝ આપવામાં આવ્યા છે. આ સાથે, કેન્દ્રીય સ્વાસ્થ્ય મંત્રાલયના જણાવ્યા અનુસાર, ભારત કોરોના પર નજર રાખશે. દેશમાં આવતા તમામ મુસાફરોમાંથી 2 ટકા કોવિડ-19 માટે રેન્ડમ ટેસ્ટિંગ કરવામાં આવશે, નવી માર્ગદર્શિકા 13 ફેબ્રુઆરીથી અમલમાં આવી છે. વર્લ્ડ હેલ્થ ઓર્ગેનાઈઝેશન (WHO)ના ડેટા અનુસાર, છેલ્લા દોઢ મહિનામાં નોંધાયેલા કોરોનાના કેસોમાં ઘટાડો થયો છે.