અમદાવાદ / નેટ બેન્કિંગ ન ચાલતાં કંટાળેલા ગ્રાહકે બેન્કની ઓફિસથી એવી વસ્તુ ઘરે લાવ્યો કે, પોલીસની મદદ લેવી પડી

• મકરબાની બેન્ક ઓફ બરોડાનો બનાવ, ગ્રાહક સામે ફરિયાદ
• બેન્કના ખાતાધારક સીપીયુ ઉઠાવીને જતા રહેતાં મામલો પોલીસ સ્ટેશન સુધી પહોંચ્યો

1 જૂનના રોજ બેન્ક ઓફ બરોડામાં એસ.પી. જ્વેલર્સના નામથી ખાતું ધરાવતા સુજય શાહ આવ્યા હતા અને બૂમાબૂમ કરવા લાગ્યા હતા. સુજય શાહની બૂમો સાંભળીને મેનેજર વિનિતભાઈ તેમની કેબિનમાંથી બહાર આવ્યા હતા અને મામલો શાંત પાડવાની કોશિશ કરી હતી. 

સુજય બેન્કમાં બૂમો પાડીને કહેતા હતા કે તેઓએ છેલ્લા અનેક દિવસથી મોબાઈલ બેન્કિંગ અને નેટ બેન્કિંગ ચાલુ કરવા ઇ-મેઇલ કર્યો છે પણ બેન્ક તરફથી કોઈ જવાબ આપવામાં આવતો નથી. આવેશમાં આવેલા સુજય બેન્કનું સીપીયુ લઈ જતા રહ્યા હતા. આ સીપીયુમાં લોન અને ગ્રાહકોનાં ખાતાનો ડેટા હતો, જેથી મેનેજરે તેમની રિજિયોનલ ઓફિસમાં આ અંગે જાણ કરી હતી. 

સુજય શાહ પરત બેન્કમાં સીપીયુ મૂકીને જતા રહેતાં બેન્ક મેનેજર વિનિતભાઇએ આનંદનગર પોલીસ સ્ટેશનમાં ફરિયાદ કરી છે. પોલીસે ચોરીનો ગુનો દાખલ કરીને તપાસ શરૂ કરી છે.