કાર્યવાહી / મુન્દ્રા પોર્ટથી 3000 કિલો કથિત ડ્રગ્સ ઝડપાવા મામલે NIAને મળી વધુ એક સફળતા

• મુંદ્રા પોર્ટ પરથી ડ્રગ્સ ઝડપાવવાનો મામલો
• NIAએ વધુ એક વિદેશી નાગરિકની કરી ધરપકડ કરી
• ડ્રગ્સ મોકલવામાં સંડોવણી બદલ કરાઇ ધરપકડ

મુન્દ્રા પોર્ટ પરથી 30 હજાર કરોડના ડ્રગ્સ ઝડપાવવાનો મામલે NIAએ વધુ એક વિદેશી નાગરિકની કરી ધરપકડ કરી છે. ડ્રગ્સ મોકલવામાં સંડોવણી બદલ અફઘાનિસ્તાનના નાગરિકની NIAએ ધરપકડ કરી છે.

28 વર્ષીય અફઘાન નાગરિક શોભન આર્યાફર ઝબ્બે 
રાષ્ટ્રીય તપાસ એજન્સીના એક અધિકારીએ જણાવ્યું કે મુંદ્રા પોર્ટ ડ્રગ્સ કેસની તપાસ દરમિયાન દક્ષિણ દિલ્હીના નેબ સરાઈમાં રહેતા 28 વર્ષીય અફઘાન નાગરિક શોભન આર્યાફરની આજે ધરપકડ કરવામાં આવી હતી. NIAને આ કેસની તપાસ દરમિયાન ખબર પડી કે શોભન ડ્રગની દાણચોરીમાં સામેલ છે અને તે આ ડ્રગના કન્સાઈનમેન્ટ વિશે પણ જાણતો હતો અને આ સમગ્ર ષડયંત્રમાં તેની પણ મહત્વની ભૂમિકા હતી. નેશનલ ઈન્વેસ્ટિગેશન એજન્સીએ આ પહેલા પણ નેબ સરાઈ સહિત ઘણી જગ્યાએ દરોડા પાડ્યા હતા.

 

પોલીસને તપાસમાં શું મળ્યા હતા ઈનપુટ
મુંદ્રા પોર્ટ પર પકડાયેલા ડ્રગ્સ મામલે ઘણા બધા નવા ખુલાસા સામે આવ્યા હતા. ભારતના ઈતિહાસમાં ડ્રગ્સનો સૌથી મોટો 30 હજાર કરોડની જથ્થો ગુજરાતમાંથી પકડાયો છે જેમા NIA, ATS અને ED તપાસમાં જોતરાયેલી છે. સમગ્ર કેસમાં ઈરાની આરોપીએ શ્રીલંકામાં પણ ડ્રગ્સ મોકલ્યું હોવાનું સામે આવી રહ્યું છે જેમા શ્રીલંકા પોલીસે ગુજરાત ATSનો સંપર્ક કર્યો હતો. તો આ કેસમાં રડારમાં આવેલા ચેન્નાઈનાં દંપત્તિએ આ પહેલા જુલાઇ મહિનામાં પણ ડ્રગ્સ મંગાવ્યું હોવાનું સામે આવ્યું છે, સમગ્ર કેસમાં ચેન્નાઈનાં કપલ અને અફઘાનિસ્તાનનાં ડ્રગ માફિયા વચ્ચે અમિત નામના વ્યક્તિની ભૂમિકા હોવાનું સામે આવી રહ્યું છે, અમિત મૂળ દિલ્હીનો છે. આ સિવાય કસ્ટમ હાઉસનાં જ એક એજન્ટનો પણ આ કાળા કારોબારમાં રોલ હોવાનું ખૂલ્યું છે જેનું નામ કુલદીપ સિંહ છે. તપાસનો ધમધમાટ ચાલુ રાખતા NIAએ વધુ એક અફઘાનિસ્તાનના નાગરિકની ધરપકડ કરી છે.

ગુજરાતનો લાંબો દરિયા કાંઠો ડ્રગ્સ માફિયાઓ માટે મોકળો માર્ગ
થોડા સમય પહેલા જ કચ્છના મુન્દ્રા બંદરો ત્રણ હજાર કરોડથી વધુનો ડ્રગ્સ ઝડપાયું હતું.ડ્રગ્સ માફિયાઓ માટે ગુજરાતનો દરિયો ડ્રગ્સની હેરાફેરી માટે હાલ તો સુરક્ષિત હોય તેમ લાગી રહ્યું છે. દેશના ભવિષ્ય યુવાધનનો બરબાદ કરનારા આ કાળા કારોબારને રોકવો અત્યંત જરૂરી છે. ત્યારે કેટલાક સવાલો ઉદભવી રહ્યા છે કે સુરક્ષા એજન્સીઓની ચાંપતી નજર હોવા છતાં કેવી રીતે થઈ જાય છે ડ્રગ્સની એન્ટ્રી?, ડિલરો પર તવાઈ તો ગુજરાતમાં કેવી રીતે ઘૂસે છે નશીલા પદાર્થ?.કોણ ગુજરાતના યુવાધનને ડ્રગ્સના રવાડે ચડાવી રહ્યું છે?