રાજ્યમાં શિક્ષણમાં ચાલી રહેલા કાળા કારોબારનો પર્દાફાશ થયો છે. વીટીવી દ્વારા રજૂ કરવામાં આવેલા અહેવાલની અસર થઈ છે. વડોદરામાંથી વિદ્યાર્થીઓ વગર ચલાવવામાં આવતી શાળા ઝડપાઈ છે. જીવન સંસ્કાર શાળામાં વિદ્યાર્થીઓ માત્ર ચોપડા પર જ નોંધાયા છે. આ સ્કૂલમાં છેલ્લા 5 વર્ષથી માત્ર ચોપડા પર જ વિદ્યાર્થીઓને દર્શાવવામાં આવતા હતા. મળતી માહિતી મુજબ 5 વર્ષથી DEO કચેરીને અંધારામાં રાખીને શાળાને ગ્રાન્ટ આપવામાં આવતી હતી. આ મામલે DEO કચેરી દ્વારા રિપોર્ટ તૈયાર કરીને શિક્ષણ બોર્ડમાં મોકલવામાં આવ્યો હતો. ત્યારે હવે સમગ્ર મામલે પર્દાફાશ થયો છે. મહત્વનુ છે કે, 2 દિવસ પહેલા વીટીવી દ્વારા રાજ્યમાં 2 હજાર સ્કૂલો માત્ર કાગળ પર ચલાવવામાં આવતા હોવાનો અહેવાલ રજૂ કરાયો હતો. સ્કૂલ અને ટ્યુશન સંચાલકોની મિલીભગત ચાલતી હોવાનુ સામે આવ્યુ. ટ્યુશન ક્લાસમાં ભણીને શાળાઓમાં પરીક્ષા આપવાનું રાજ્યોમાં કૌભાંડ સામે આવ્યુ. આ મામલે શિક્ષણ બોર્ડના સભ્યએ જ ઘટસ્ફોટ કર્યો હતો. શિક્ષણ બોર્ડના સભ્યએ રાજ્યમાં 2500થી વધુ ભૂતિયા શાળાઓ હોવાનો આક્ષેપ કર્યો હતો. ત્યારે હવે રાજ્યમાં પ્રથમ એક સ્કૂલ વડોદરામાંથી ઝડપાઈ છે. આગામી દિવસોમાં રાજ્યમાં આ પ્રકારની વધુ સ્કૂલ ઝડપાય તેવી શક્યતા છે.