વલસાડના વાપીના સેલવાસમાં એક ચાલતી કારમાં આગ લાગતા સમગ્ર વિસ્તારમાં અફરા તફરીનો માહોલ સર્જાયો. વિનોબા ભાવે હોસ્પિટલ માર્ગ પર આ આગની ઘટના બની હતી. કારમાં આગ લાગતા જોતજોતામાં સમગ્ર આગ બળીને ખાખ થઈ ગઈ. પણ સદનસીબે દુર્ઘટનામાં કોઈ જાનહાનિ થઈ નથી. પણ ફાયર વિભાગે ભારે જહેમત બાદ આગ પર કાબૂ મેળવ્યો હતો.
ઉલ્લેખનીય છે કે સુરતથી એક પરિવાર અહીં હરવા ફરવા માટે આવ્યું હતુ ત્યારે આ ઘટના બની હતી. શોર્ટ સર્કિટના કારણે આ આગ લાગી હોવાનું હાલ સામે આવ્યું છે. જોકે, ફાયર વિભાગે આગ પર કાબૂ મેળવતા સ્થાનિકો સહિત કાર માલિકે રાહતના શ્વાસ લીધા હતા.
ઉલ્લેખનીય છે કે, ઉનાળો જામ્યો છે અને કાર સળગવાની ઘટના પણ વારંવાર બની રહી છે ત્યારે વધુ એક ઘટના સેલવાસમાં બની હતી. અચાનક કારમાં આગ ભભૂકી ઉઠતા ગાડીમાં સવાર લોકોના જીવ પડીકે બંધાયા હતા.
જો કે, કાર ચલાવનારની સમય સૂચકતાને કારણે તેણે ગાડી પર કંટ્રોલ કરીને રસ્તાની એકબાજુએ ઉભી રાખી દેતા, સવાર તમામ લોકો કાર બહાર નીકળી ગયા હતા. પરંતુ આગ વિકરાળ હોવાને કારણે સમગ્ર કાર બળીને ખાખ થઇ ગઇ હતી.