રાજકોટમાં એક અજીબોગરીબ કિસ્સો સામે આવ્યો છે. ટીકટોકનું વળગણ યુવકને ભારે પડ્યુ છે. ઇન્દ્રજીતસિંહ નાથુભા જાડેજા નામના યુવકે ટીકટોકનો વીડિયો બનાવવા જાહેરમાં કાર સળગાવી દીધી. અને કાર સળગાવ્યા બાદ ટીકટોક માટે વીડિયો પણ બનાવ્યો હતો.
રાજકોટ શહેરના કોઠારિયા રોડ પર સોમવારે બપોરે ફાયરબ્રિગેડ સ્ટેશન સામે જ એક વ્યક્તિએ ટિકટોક વીડિયો બનાવવા માટે પોતાની કારને આગ ચાંપી દીધી હતી. જે વીડિયો સોશિયલ મીડિયામાં વાયરલ થયો છે. વીડિયો વાયરલ થતા પોલીસે કાર સળગાવનાર યુવકની ધરપકડ કરી લીધી છે.
જીપને સળગાવવાની ઘટનાથી લોકોમાં નાસભાગ મચી ગઇ હતી, જીપની પેટ્રોલ ટેન્ક ફાટે તો મોટી દુર્ઘટના થવાની ભીતિ પણ સર્જાઇ હતી. સદનસીબે સામે જ ફાયર સ્ટેશન હોવાથી ઝડપથી જીપની આગને કાબૂમાં લેવામાં આવી હતી. સ્થળ પર હાજર કેટલાક લોકોએ મોબાઇલમાં શૂટિંગ ઉતારી તેને વાઇરલ કરતા દેકારો મચી ગયો હતો. ભક્તિનગર પોલીસે ઇન્દ્રજીતસિંહને અટકાયતમાં લઇ પૂછપરછ શરૂ કરી હતી. પોતાની જ જીપને આગ ચાંપનાર ઇન્દ્રજીતસિંહ ઓટોપાર્ટસની દુકાન ચલાવતો હોવાનું પોલીસ સૂત્રોએ જણાવ્યું હતું.
ત્યારે ટીકટોક પાછળ પાગલ આજની યુવા પેઢી માટે આંખ ઉઘાડનાર કેસ છે. હાલ ટીકટોકમાં ફેમસ થવા માટે ટીકટોક સ્ટાર બનવા માટે લોકો કેટલી હદે પહોંચી શકે છે તેનું આ એક ઉદાહરણ છે. ત્યારે વીટીવી લોકોને આવું ન કરવા અપીલ કરે છે.