કેટલાક લોકો તકનો લાભ લેવામાં માહિર હોય છે. જો કે, આપણે હકારાત્મક સેન્સમાં આ વાત નથી કરી રહ્યા. ક્યારેક માર્ગ અકસ્માત સર્જાય ત્યારે પણ કેટલાક લોકો તેમાંથી લાભ શોધતા હોય છે. આવો જ એક વાયરલ વીડિયો સામે આવ્યો છે. સુરતના પીપોદરા હાઈવે પર દારૂભરેલી ગાડીનો અકસ્માત થયો હતો. આ દરમિયાન લોકોએ અકસ્માતમાં ઘવાયેલા લોકોની મદદ કરવાના બદલે દારૂની લૂંટ ચલાવી હતી. વીડિયો તો જૂનો છે પરંતુ તે માનવીની માનસિકતા છતી કરી રહ્યો છે.
સુરતમાં દારૂભરેલી કાર ઘૂસી ગઈ ટ્રક પાછળ
લોકોએ ચલાવી દારૂની લૂંટ
અકસ્માતગ્રસ્ત કારમાં દારૂની પેટીઓ ભરેલી હતી
સુરત જિલ્લાના માંગરોળ તાલુકાના પીપોદરા નજીક પસાર થતા નેશનલ હાઈવે પરના અકસ્માતના દર્શ્યો સામે આવ્યા છે. જેમાં નેશનલ હાઈવે પર એક સ્કોર્પિયો કાર પોતાની આગળ ચાલી રહેલા ટ્રક પાછળ ધૂસી ગઈ હતી. આ અકસ્માતમાં કારનો કચ્ચરઘાણ વળી ગયો હતો. આ દુર્ઘટનામાં કારચાલક ઘટના સ્થળે જ મૃત્યુ થયું હતું. આ દુર્ઘટના સમયે ઘટનાસ્થળે લોકોની ભીડ ઉમટી હતી. પરંતુ કોઈને બચાવવા ઉમટી નહીં લૂંટ ચલાવવા માટે. હકીકત એ હતી કે અકસ્માતગ્રસ્ત કારમાં દારૂની પેટીઓ ભરેલી હતી. કેટલાક લોકોએ આ અકસ્માતનો ફાયદો ઉઠાવ્યો હતો.
કેમ કે, દારૂના આ જથ્થાનું કોઈ રણીધણી ન હતું. પોલીસ આવે તે પહેલા આ લોકો બધો જથ્થો ઘરભેગો કરવા માગતા હતા. ઘટનાસ્થળે પોલીસ આવે તે પહેલા લોકોએ દારૂની લૂંટ શરૂ કરી હતી. જેને જેટલી મળે તેટલી બોટલ લઈને ભાગવા લાગ્યા હતા. અકસ્માતગ્રસ્ત કારમાંથી દારૂની લૂંટાલૂંટના આ દ્રશ્યો અકસ્માતમાંથી પણ રોકડી કરી લેવાની માનવીની મનોવૃત્તિને દર્શાવી રહ્યા છે.