વિરાટ કોહલીની આ ભૂલને લીધે જો રુટ અને સેમ બિલિંગ્સ ફાવી ગયા, જોના લીધે ટીમ ઈન્ડિયા સામે પહાડ જેટલો સ્કોર કરવામાં ઈંગ્લેન્ડની ટીમ સફળ રહી.
ચેન્નઈની પીચ સ્પીનર માટે મદદરુપ પણ અશ્વિને ઓછી બોલિંગ આપી
કુલદીપને ટીમ ઈલેવનમાં સમાવેશ ના કરાયો
ઇશાંતની બોલિંગ દમ વગરની સાબીત થઈ
મહેમાન ટીમે ભરપૂર ફાયદો ઉઠાવ્યો
ચેન્નઈ ટેસ્ટમાં ગઈ કાલે પ્રથમ દિવસે ભારતના બોલર્સ સંપૂર્ણપણે નિષ્ફળ રહ્યા અને બેટિંગ માટે સારી પીચ પર ઈંગ્લેન્ડના બેટ્સમેનોને કોઈ મુશ્કેલી પડી નહીં. ટેસ્ટ મેચના પ્રથમ દિવસે ભારતીય બોલર્સ માત્ર ત્રણ વિકેટ ઝડપી શક્યા હતા, જેના કારણે ટીમ ઇન્ડિયા બેકફૂટ પર ધકેલાઈ ગઈ. ગઈ કાલે ટીમ ઇન્ડિયાના કેપ્ટન વિરાટ કોહલીએ કેટલીક ભૂલો કરી, જેનો મહેમાન ટીમે ભરપૂર ફાયદો ઉઠાવ્યો.
કુલદીપને ટીમમાં સામેલ ના કરાયો
કોહલીએ અંતિમ ઈલેવનમાં કુલદીપ યાદવને ના સમાવીને મોટી ભૂલ કરી. ચેન્નઈની પીચ સ્પિનર માટે ઘણી મદદગાર રહેતી હોય છે અને કુલદીપ બોલને ટર્ન કરાવી શકે છે. કુલદીપ કદાચ ઈંગ્લેન્ડ માટે મુસીબત બની શક્યો હોત. કુલદીપના સ્થાને ટીમમાં સામેલ કરવામાં આવેલા શાહબાઝ નદીમે ગઈ કાલે પ્રથમ દિવસે સારી બોલિંગ કરી નહોતી અને ઘણા નો-બોલ પણ ફેંક્યા હતા અને તે ખર્ચાળ પણ સાબિત થયો હતો.
અશ્વિન પાસે ઓછી ઓવર બોલિંગ કરાવી
કોહલીનો એક નિર્ણય બહુ જ આશ્ચર્યજનક રહ્યો. જ્યારે વોશિંગ્ટન સુંદર અને નદીમને અંગ્રેજ બેટ્સમેનો ફટકારી રહ્યા હતા ત્યારે વિરાટે યોગ્ય રીતે અશ્વિનનો ઉપયોગ કર્યો નહીં. કોહલીએ અશ્વિન પાસે બહુ ઓછી ઓવર બોલિંગ કરાવી. વિરાટે ટી-ટાઇમ બાદ લગભગ દોઢ કલાક સુધી અશ્વિનને બોલિંગ આપી નહીં. કોમેન્ટ્રેટરોએ પણ વિરાટના નિર્ણય અંગે સવાલો ઉઠાવ્યા હતા.
રૂટ-સિબલીને સેટ થવાની તક આપી
વિરાટના પ્લાનિંગમાં થોડી ગરબડ નજરે પડી હતી, જેના કારણે રૂટ અને સિબલીને સેટ થવાની પૂરતી તક મળી ગઈ અને આ બંનેએ ત્રીજી વિકેટ માટે ૨૦૦ રનની ભાગીદારી નોંધાવી દીધી. કોહલીએ વોશિંગ્ટન સુંદર અને નદીમ ખર્ચાળ સાબિત થઈ રહ્યા છતાં તેઓ પાસે જ વધુ બોલિંગ કરાવી, જેના કારણે રૂટ અને સિબલીને બેટિંગ કરવામાં કોઈ મુશ્કેલી પડી નહોતી.
ઇન ફોર્મ સિરાઝના સ્થાને ઈશાંતની પસંદગી
કેપ્ટન વિરાટે ઓસ્ટ્રેલિયામાં શાનદાર પ્રદર્શન કરનારા ફાસ્ટ બોલર મોહંમદ સિરાઝને બહાર બેસાડીને ઈશાંતને ટીમમાં સામેલ કર્યો. ઓસ્ટ્રેલિયા પ્રવાસ દરમિયાન સિરાઝે ૧૩ વિકેટ ઝડપી હતી. ઈજા બાદ પાછા ફરેલા ઈશાંતની બોલિંગ દમ વગરની નજરે પડી. સિરાઝે ઓસ્ટ્રેલિયામાં જૂના બોલથી પણ શાનદાર બોલિંગ કરી હતી અને તે ઈશાંત કરતાં વધુ સારો બોલર સાબિત થઈ શક્યો હોત, પરંતુ ટીમની પસંદગીમાં વિરાટથી આ મોટી ચૂક થઈ ગઈ.