કેનેડાની સંસદની ગઇકાલે યોજાયેલ ચૂંટણીમાં કોઇપણ પક્ષે બહુમતિનો જાદુઇ આંકડો પાર કર્યો નથી. કેનેડાની સંસદમાં કુલ 338 બેઠકો હોય તેમાં બહુમતિ માટે કોઇપણ પક્ષને 170ના આંકડા સુધી પહોંચવું જરૂરી છે. જો કે હાલમાં મળી રહેલા પરિણામ મુજબ વડાપ્રધાન જસ્ટિન ટ્રુડોની લિબરલ પાર્ટી 158 બેઠક જ્યારે મુખ્ય વિપક્ષી કન્જર્ટિવ પાર્ટીને 120 બેઠકો મળી હોવાના અહેવાલ પ્રાપ્ત થઇ રહ્યાં છે.
આમ 2015ની ચૂંટણીની વાત કરીએ તો લિબરલ પાર્ટીને અંદાજે 19 બેઠકનું નુકસાન જોવા મળી રહ્યું છે જ્યારે કન્જેર્ટિવ પાર્ટીને અંદાજે 25 બેઠકનો ફાયદો થઇ રહ્યો છે. જ્યારે BQ પાર્ટીને 22 બેઠકના ફાયદા સાથે 32 બેઠક મળી છે જ્યારે જગમીત સિંહની પાર્ટીને 24 બેઠક મળી છે.
જો કેનેડામાં કોઇપણ પક્ષને બહુમતિ ન મળે તો ત્યાં ગઠબંધન સરકાર બનતી નથી પરંતુ જે પક્ષને સૌથી વધુ બેઠક મળી હોય છે તે સરકાર બનાવતી હોય છે. જેને કેનેડામાં માઇનોરિટી (લઘુમતી) સરકાર કહેવાય છે. આ અગાઉ કન્જેર્ટિવ પાર્ટીના સ્ટીફન હાર્પરે બે વખત લઘુમતી સરકાર બનાવી હતી.
કેનેડા ચૂંટણી પંચ અનુસાર 338 બેઠક પર થયેલ ચૂંટણીમાં લિબરલ પાર્ટીને 33.6 ટકા મત મળ્યાં. જ્યારે મુખ્ય વિપક્ષ કન્જર્વેટિવ પાર્ટી ઓફ કેનેડાને 34.1 ટકા મત મળ્યાં છે. કેનેડામાં કોઇપણ પાર્ટીને સરકાર બનાવા માટે 170 બેઠકનો આંકડો જોઇએ.