લોકસભા ચૂંટણી બીજા તબક્કામાં પ્રવેશી રહી છે. રાજ્યમાં દરેક પક્ષોનાં નેતાઓ પ્રચાર કાર્ય માટે ગામ, મહોલ્લાઓ અને શેરીઓ ખૂંદી રહ્યાં છે. પરંતુ તેમનો આ પ્રચાર રથ ભાવનગર જિલ્લાનાં ઘોઘા તાલુકા બાડી અને પાડવા ગામે અટકી જશે તેવું લાગી રહ્યું છે. કેમ કે, આ ગામનાં લોકો જમીન સંપાદનનાં એ નિર્ણયને ભૂલી શક્યાં નથી. એટલે જ ગામલોકોએ નેતાઓનાં ચૂંટણી પ્રચાર વિરુદ્ધ નેતાઓનાં વિરોધમાં પ્રચાર કરવાનું શરૂ કરી દીધું છે.
દેશમાં લોકસભા ચૂંટણી યોજાઈ રહી છે. લોકસભાની ચૂંટણીએ બીજા તબક્કામાં પ્રવેશ કરી લીધો છે. મહત્વનું છે કે રાજ્યમાં મતદાન યોજાવાને હવે ગણતરીનાં દિવસો બાકી રહ્યાં છે. રાજ્યમાં નેતાઓ જોરશોરથી પ્રચારકાર્યમાં લાગી ગયાં છે. પરંતુ તેમનો આ પ્રચાર રથ ભાવનગર જિલ્લાનાં ઘોઘા તાલુકા બાડી અને પાડવા ગામે સફળતાપૂર્વક પ્રચાર કરી શકશે કે કેમ તે વિશે શંકા ઊભી થવા લાગી છે. કેમ કે, લોકસભા ચૂંટણી ટાણે જ બાડી અને પાડવા ગામનાં લોકોએ સરકાર સામે વિરોધનું શસ્ત્ર ઉગામ્યું છે.
સરકારને ભીંસમાં લેવા માટે કહો કે, સરકારને યાદ અપાવવા કહો. ગામજનોએ જમીન સંપાદન સામેનાં અસંતોષનું જિન ફરી બોટલમાંથી બહાર કાઢ્યું છે. નેતાઓ જ્યારે પ્રચાર કાર્યમાં લોકસંપર્ક કરી રહ્યાં છે તેવાં જ સમયે આ ગામનાં લોકોએ ભાજપ અને કોંગ્રેસ બન્ને પક્ષનાં નેતાઓ વિરુદ્ધ પ્રચાર શરૂ કરી દીધો છે. ઘોઘા તાલુકાનાં જમીન સંપાદનમાં અસર પામેલાં 12 ગામનાં ખેડૂતોએ લોકોને સરકાર વિરૂદ્ધ મતદાન માટે અપીલ કરવા મીટિંગનો દોર શરૂ કર્યો છે.
ખેડૂતોનાં આ રોષનું કારણ ભાવનગરમાં પાડવા ગામે પાવર પ્લાન્ટ સ્થાપવામાં આવ્યો છે તે છે. ભાવનગર જિલ્લાનાં પડવા ગામે ગુજરાત પાવર કોર્પોરેશન દ્વારા 500 મેગાવોટનો પાવર પ્લાન્ટની સ્થાપના કરવામાં આવી છે. અહીં સ્થપાયેલાં પ્લાન્ટ માટે નજીકથી જ લિગ્નાઇટ મળી શકે તે માટે સરકારે 20 વર્ષ પહેલાં ઘોઘા તાલુકાનાં 12 ગામોની દસ હજાર વીઘા જમીન સંપાદન કરી હતી. જેનાં માટે ખેડૂતોને વીઘા દીઠ રૂપિયા 2 લાખનું વળતર ચુકવ્યું હતું.
જો કે, સરકારી નિયમ મુજબ અહીં નક્કી કરેલાં સમયગાળામાં કંપનીએ કામ કરી દેવું જોઈએ પણ કંપનીએ 20 વર્ષ સુધી કામ શરૂ ન કરતાં ખેડૂતો પોતાની જમીન પરત માગી રહ્યાં છે. આ માટે ખેડૂતોએ અનેક વખત ધરણાં, પ્રદર્શનો અને આક્રમક દેખાવો પણ કરી ચૂક્યાં છે. પરંતુ સરકારે અને કંપનીનાં માણસોએ દર વખતે બળપ્રયોગ કરીને ખેડૂતોને ખદેડી મૂક્યાં છે. પરંતુ હવે જ્યારથી લોકસભા ચૂંટણી જાહેર થઈ છે. આ ગામનાં ખેડૂતોએ સરકારને ભીંસમાં લેવાનો વ્યૂહ રચ્યો છે.
ખેડૂતોએ ગુજરાત અને કેન્દ્રની ભાજપ સરકાર સામે બાયો ચડાવી છે. આ 12 ગામનાં ખેડૂતો જ્યારથી લોકસભાની ચૂંટણી જાહેર થઈ છે ત્યારથી સરકારની વિરુદ્ધમાં મતદાન કરવા લોકોને સમજાવવા ભાવનગર જિલ્લાનાં ગામડાંઓ ખૂંદી વળ્યાં છે. ભાવનગર જિલ્લામાં છેલ્લાં 2 વર્ષથી અલગ-અલગ મુદ્દાને લઇને જિલ્લામાં ખેડૂતો આંદોલન ચલાવી રહ્યાં છે. વિપક્ષ માત્ર આશ્વાસન સિવાય કશું આપી શક્યો નથી અને સત્તાધારી પક્ષ ખેડૂતની સમસ્યા ઉકેલવામાં રસ ધરાવતી નથી. ત્યારે આગામી દિવસોમાં આવનારી ચૂંટણીમાં તેનાં ઘેરા પડઘાં પડશે તેમ મનાઈ રહ્યું છે.