પોલીસ કંટ્રોલરૂમમાં ફોન કરીને પોલીસ કર્મચારીઓને બીભસ્ત ગાળો ભાંડતા યુવકની માધવપુરા પોલીસે ધરપકડ કરી છે. કોઇપણ કારણ વગર આ યુવક પોલીસ કંટ્રોલરૂમમાં ફોન કરીને મહિલા પોલીસ કર્મચારી તેમજ અન્ય પોલીસ કર્મચારીઓને બીભસ્ત ગાળો બોલતો હતો. એક જ મહિનામાં પાંચ કરતાં વધુ વખત યુવકે એકજ નંબર પરથી ફોન કરીને ગાળો આપતા ગઇ કાલે તેના વિરુદ્ધમાં માધવપુર પોલીસ સ્ટેશનમાં ગુનો દાખલ થયો છે.
આસિસ્ટન્ટ સબ ઇન્સ્પેક્ટર હરકેશકુમારે માધવપુરા પોલીસ સ્ટેશનના સંજય મૂછડિયા વિરુદ્ધમાં બીભસ્ત ગાળો બોલવા મામલે ફરિયાદ કરી છે. ફરિયાદમાં જણાવ્યા અનુસાર ગઇ કાલે પોલીસ કંટ્રોલરૂમમાં રાતે પોણા નવ વાગ્યાની આસપાસ એક યુવક બીભસ્ત ગાળો બોલતો હતો. પોલીસ કંટ્રોલરૂમમાં ફરજ બજાવતી મહિલા પોલીસ કર્મચારી ફાલ્ગુનીબહેને ફોન ઉપાડતાં યુવકે ગાળો બોલવાની શરૂ કરી દીધી હતી.
આ ઉપરાંત આજ યુવકે તારીખ ૨૧ના રોજ પોલીસ કંટ્રોલરૂમમાં બે ફોન કર્યા હતા અને મહિલા પોલીસ કર્મચારી ધર્મિષ્ઠાબહેનને અને અસ્મિતાબહેનને બીભસ્ત ગાળો બોલ્યો હતો. તારીખ ૧૬ અને ૨૬ના રોજ પોલીસ કર્મચારી અજયસિંહ અને હસમુખભાઇને પણ ફોન કરીને ગાળો બોલ્યો હતો.
વારાફરતી પોલીસ કંટ્રોલરૂમમાં એક જ નંબરથી ફોન કરીને વગર કારણે પોલીસ કર્મચારીઓને ગાળો બોલતા યુવક વિરુદ્ધમાં પોલીસ તપાસ શરૂ કરી હતી. મોબાઇલ નંબરના આધારે તપાસ કરતાં જણાવા મળ્યુ હતું કે ફોન કરનાર યુવકનું નામ સંજય પાલજિતભાઇ મૂછડિયા છે અને તે એલિસબ્રિજના આંબાવાડી વિસ્તારમાં આવેલ સ્વાગત ફ્લેટમાં રહે છે. પોલીસે આ મામલે ગુનો દાખલ કરીને તેની ધરપકડ કરી છે.