અમદાવાદના આનંદનગર વિસ્તારમાં આવેલી એક ઓફિસમાં દારૂની મહેફિલ માણતાં ઇન્ટરનેશનલ કોલ સેન્ટરના કિંગ નીરવ રાયચૂરા અને સંતોષ સોઢા સહિત ત્રણ લોકો ઝડપાતાં ચકચાર મચી ગઇ છે. પોલીસને ઓફિસથી 27 લાખ રૂપિયાનાં બિગ ડેડી લખેલાં સોનાનાં પેન્ડન્ટ સાથે 39.25 લાખ રૂપિયાનું સોનું અને ખાલી દારૂની બોટલો તેમજ શંકાસ્પદ વ્યવહાર થયેલા હોય તેવી ડાયરીઓ મળી આવી છે.
નીરવના મોબાઇલથી ક્રિપ્ટો કરન્સી અને દારૂની હેરફેરનું રહસ્ય ખૂલ્યું
સાગર ઉર્ફે સેંગી ઠાકરના ગુરુ છે નીરવ અને સંતોષ
આનંદનગર પોલીસને બાતમી મળી હતી કે રમાડા હોટલની સામે આવેલી સફલ પ્રોફિટેર કોમ્પ્લેક્સમાં સી/2 નંબરની ઓફિસમાં દારૂની મહેફિલ ચાલી રહી છે. બાતમીના આધારે પોલીસની ટીમે ઓફિસમાં દરોડો પાડ્યો તો ત્રણે યુવકો દારૂની મહેફિલ જમાવીને બેઠા હતા. આનંદનગર પોલીસે નીરવ હર્ષદભાઇ રાયચૂરા (રહે. રિવેરા ગ્રીન્સ, શાંતિપુરા સર્કલ, સાણંદ હાઇવે) સંતોષ સોઢાભાઇ ચોસલા (રહે. ગાલા સ્વિંગ, સાઉથ બોપલ) અને રાહુલ ધરમીશ પૂરબિયા (રહે. કર્ણાવતી ગુજરાત હાઉસિંગ બોર્ડનાં મકાન. આનંદનગર) ધરપકડ કરી હતી.
આનંદનગર પોલીસે ઓફિસની તલાશી લેતાં તેમાંથી દારૂની 11 ખાલી બોટલો તેમજ હુક્કાની સામગ્રી, 30.25 લાખ રૂપિયાનાં સોનાનાં દાગીના તેમજ ડાયરીઓ મળી આવી છે. નીરવ રાયચૂરા અને સંતોષ સોઢા બંને જણા ઇન્ટરનેશનલ કોલ સેન્ટરના કિંગ કહેવામાં આવે છે. પોલીસ સૂત્રોનાં જણાવ્યા અનુસાર નીરવ રાયચૂરા ઇન્ટરનેશલ કોલ સેન્ટરના કેસમાં પાંચ કરતાં વધુ કેસોમાં ઝડપાઇ ચુક્યો છે. જ્યારે સંતોષ સોઢાનો ભાવનગરમાં સારો દબદબો રહ્યો છે.
નીરવના મોબાઇલથી ક્રિપ્ટો કરન્સી અને દારૂની હેરફેરનું રહસ્ય ખૂલ્યું
પોલીસે નીરવની ધરપકડ કરી. જેમાં તેના બે આઇફોન પોલીસે કબજે કર્યા હતા. પોલીસ એક આઇફોન ચેક કરતાં દારૂની હેરફેરની વાતચીતના મેસેજ મળી આવ્યા છે, જ્યારે બીજા મોબાઇલ ફોનને ચેક કરતાં તેમા ક્રિપ્ટો કરન્સીની ડેટ અને ચેટિંગ મળી આવ્યા છે. જ્યારે મોબાઇલ ફોનમાં સટ્ટો રમાડતા હોવાના પણ પુરાવા પોલીસને મળી આવ્યા છે.
ડાયરીમાં શંકાસ્પદ વ્યવહારની ડિટેલ
ઓફિસની તલાશી લેતાં આનંદનગર પોલીસને કેટલીક ડાયરીઓ મળી આવી છે. જેમાં કરોડો રૂપિયાના વ્યવહારની ડિટેલ લખી હોવાનું સામે આવ્યું છે. આ વ્યવહાર કોલ સેન્ટરના છે કે પછી ક્રિપ્ટો કરન્સીના છે કે ક્રિકેટ સટ્ટાના છે તેના પર તપાસ કરવામાં આવશે.
બિગ ડેડી લખેલાં 27 લાખ રૂપિયાનાં પેન્ડન્ટ સાથે 39.25 લાખના દાગીના જપ્તઃ નીરવ રાયચૂરા અને સંતોષ સોઢા સોનું પહેરવાના શોખીન છે. કોલ સેન્ટરની આંધળી કમાણીથી તેમને લાખો રૂપિયાનું સોનું વસાવ્યું છે. પોલીસે ઓફિસમાં સર્ચ કર્યું તો બિગ ડેડી લખેલાં 27 લાખ રૂપિયાનાં પેન્ડન્ટ સહિત 39.25 લાખ રૂપિયાનું સોનું જપ્ત કર્યું છે.
સાગર ઉર્ફે સેંગી ઠાકરના ગુરુ છે નીરવ અને સંતોષ
વિદેશી નાગરિકોને વિશ્વાસમાં લઇને ઠગાઇ કરવાનું કોલ સેન્ટર નીરવ રાયચૂરા અને સંતોષ સોઢાએ શરૂ કર્યું હતું. જેમાં સાગર ઉર્ફે સેંગી ઠાકર કામ કરતો હતો. સાગરની ફાવટ આ ગેરકાયદે ધંધામાં એવી આવી ગઇ કે તેણે નીરવ અને સંતોષ સાથે ભાગીદારી કરીને ધંધો શરૂ કર્યો હતો.