જન્મદિવસ પર તલવારથી કેક કાપીને સેલિબ્રેટ કર્યા બાદ તે વીડિયો વાઈરલ કરવાનો એક નવો ટ્રેન્ડ શરૂ થતાં પોલીસ એક્શનમાં આવી ગઇ છે.
મોડી રાત્રે કરફ્યુ હોવા છતાંય લોકો પોલીસના ડર વગર બિન્દાસ રીતે જાહેરમાં તલવાર વડે કેક કાપી રહ્યા છે અને વીડિયો સોશિયલ મીડિયામાં વાઈરલ કરી રહ્યા છે. ગઇ કાલે વસ્ત્રાલ વિસ્તારમાં તલવાર વડે કેક કાપતો વીડિયો સોશિયલ મીડિયામાં વાઈરલ થયો હતો.
જેમાં બર્થડે બોય જે તલવાર લઇને કેક કાપી રહ્યો છે તેની સાથે પોલીસકર્મીઓએ ફોટો પણ પડાવ્યો હોવાનાં દ્શ્યો આ વીડિયોમાં જોવા મળ્યાં હતાં. વીડિયો વાઈરલ થયા બાદ પોલીસ હકરતમાં આવી હતી અને પોલીસ કર્મચારીઓના બચાવવાની લાયમાં માત્ર પાંચ લોકો વિરુદ્ધ ગુનો દાખલ કરીને તેમની ધરપકડ કરવામાં આવી હતી.
રામોલ વિસ્તારમાં આવેલ માધવ ફાર્મની પાછળ નારાયણી બંગલોઝમાં રહેતા વિશાલ ઉર્ફે મોન્ટુ પંડ્યા સહિત પાંચ લોકો વિરુદ્ધ રામોલ પોલીસે જાહેરનામા ભંગ બદલ ગુનો નોંધીને તપાસ શરૂ કરી છે. વસ્ત્રાલ વિસ્તારમાં પોલીસની હાજરીમાં તલવાર વડે યુવકે કેક કાપી હોવાનો એક વીડિયો સોશિયલ મીડિયામાં વાઈરલ થયો હતો.
વાઈરલ થયેલા વીડિયોની તપાસ કરતાં તે વસ્ત્રાલના જ એક ફાર્મ હાઉસમાં મોડી રાત્રે કરફ્યુનો ભંગ કરી જન્મદિવસની ઉજવણીનો હોવાનું સામે આવતાં પોલીસ હરકતમાં આવી હતી. પોલીસે માધવ ફાર્મ પાછળ આવેલા નારાયણી બંગલોઝમાં રહેતા વિશાલ ઉર્ફે મોન્ટુ પંડ્યા સામે પોલીસ કમિશનરના જાહેરનામાના ભંગ બદલ ગુનો નોંધ્યો હતો.
ગુનો દાખલ થાય તે પહેલાં રામોલ પોલીસે હદનો વિવાદ ઊભો કરીને સમગ્ર ઘટનાને દબાવવાનો પ્રયત્નો કર્યા હતા અને દોષનો ટોપલો બીજા પોલીસ સ્ટેશનના માથે નાખવાની કોશિશ કરી હતી. કેટલાક પોલીસ કર્મચારી બર્થડે પાર્ટીમાં હાજર હોવાના કારણે પોલીસે મામલો દબાવવા માટેનો ભરપુર પ્રયાસ કર્યો હતો. છેવટે ઉચ્ચ અધિકારીઓએ લાલ આંખ કરતાં રામોલ પોલીસે વિશાલ ઉર્ફે મોન્ટુ પંડ્યા, બ્રિજેશ મહેતા, આશિષ દેસાઈ, વિપુલ દેસાઈ અને રાજન રબારીની ધરપકડ કરી હતી.
વીડિયોમાં દેખાતા શખ્સ વિશાલ પંડ્યા અને પોલીસ સ્ટેશનના કર્મીઓએ સાથે ફોટો પડાવ્યો હતો છતાં રામોલ પોલીસે ઘટનાને દબાવવાનો પ્રયાસ કર્યો હતો. એક તરફ પોલીસ કમિશનર સંજય શ્રીવાસ્તવ જાહેરનામું બહાર પાડે છે કે તલવાર, લાકડી અને ડંડા જેવાં હથિયારનો ઉપયોગ કરવો જાહેરનામાનો ભંગ ગણાશે. ત્યાં તેમની જ પોલીસ આવા છાકટા લોકોને ખભો આપવાનું કામ કરી રહી છે.
હાલ પોલીસે આરોપીઓની ધરપકડ તો કરી છે અને તલવાર પણ કબજે લીધી છે. પણ જે વીડિયો વાઈરલ થયો તેમાં ૨૦થી વધુ કેક હતી અને દસથી વધુ લોકો હાજર હતા છતાંય પોલીસે માત્ર પાંચ લોકોની ધરપકડ કરી છે. પોલીસ કર્મચારીઓને બચાવવા માટે રામોલ પોલીસે ભીનું સંકેલી લીધું હોય તેવું લાગી રહ્યું છે.
ઉલ્લેખનીય છેકે લોકડાઉન સમયે બાપુનગરમાં જાહેર રોડ પર બર્થડે સેલિબ્રેશન કરવામાં આવ્યું હતું. જેમાં દેવ બાદશાહ નામના યુવકે તલવારથી ૧૧ કેક કટિંગ કરીને બંદૂકથી હવામાં ફાયરિંગ કર્યું હતું. આ વીડિયો વાઈરલ થતાં જ પોલીસે બર્થડે બોય દેવ સહિત નવની ધરપકડ કરી તલવાર અને એરગન કબજે કર્યાં છે.