દુનિયાની સૌથી વેલ્યુએબલ એડટેક કંપની બાયજુસે પોતાના કર્મચારીઓને છટણી કરવાની ચાલુ કરી દીધું છે, ત્યારે કંપનીએ 2500 થી વધુ કર્મચારીઓની હકાલપટ્ટી કરી છે.
22 અબજ ડોલરની કિંમતના સ્ટાર્ટઅપે કર્મચારીઓની હકાલપટ્ટી કરી
બાયજુસે 2,500 કર્મચારીઓની છટણી કરી
Toppr માંથી સૌથી વધુ 1200 કર્મચારીઓની રજા
માંગમાં ઘટાડો થતા છટણી કરવી પડી
દુનિયાની સૌથી વેલ્યુએબલ એડટેક કંપની બાયજુસમાં બધુ બરાબર નથી ચાલી રહ્યું. બાયજુ રવીન્દ્રનની આગેવાની હેઠળની યુનિકોર્ન કંપનીએ 2,500થી વધુ કર્મચારીઓની છટણી કરી છે. સૂત્રોએ માહિતી આપી છે કે, 22 અબજ ડોલરની કિંમતના આ સ્ટાર્ટઅપે ગ્રુપની અનેક કંપનીઓના કર્મચારીઓને છૂટા કરી દીધા છે. લોકડાઉન દરમિયાન એડટેક સેવાઓની માંગમાં મોટો ઉછાળો આવ્યો હતો, પરંતુ હવે તેમની માંગમાં નોંધપાત્ર ઘટાડો થયો છે. તાજેતરના મહિનાઓમાં, આ ક્ષેત્રની કંપનીઓએ હજારો કર્મચારીઓની છટણી કરી છે. બાયજુસે Toppr, વ્હાઇટહેટ જુનિયર અને સેલ્સ અને માર્કેટિંગ, ઓપરેશન્સ, કન્ટેન્ટ અને ડિઝાઇન ટીમોમાંથી ફુલ-ટાઇમ અને કોન્ટ્રાક્ટ કર્મચારીઓને કાઢી મુક્યા છે.
1500 થી વધુ કર્મચારી છુટા કર્યા
સૂત્રોના જણાવ્યા અનુસાર બાયજુસે 27 અને 28 જૂને Toppr અને વ્હાઇટહટ જુનિયરના 1500થી વધુ કર્મચારીઓને છૂટા કર્યા છે. આ બંને કંપનીઓ છેલ્લા બે વર્ષમાં બાયજુસે ખરીદી હતી. તે જ સમયે, કંપનીએ તેની કોર ઓપરેશન ટીમોને 29 જૂને લગભગ 1000 કર્મચારીઓને ઇ-મેઇલ મોકલ્યા છે. એક સૂત્રએ જણાવ્યું હતું કે, કન્ટેન્ટ અને ડિઝાઇન ટીમને સૌથી વધુ અસર થઈ છે. Toppr લર્નિંગ પ્લેટફોર્મ પરથી 1200 કર્મચારીઓને છૂટા કરવામાં આવ્યા છે. 300 થી 350 જેટલા કાયમી કર્મચારીઓને બરતરફ કરવામાં આવ્યા છે જ્યારે 300 જેટલા કર્મચારીઓને નોકરી મુકવાનું કહેવામાં આવ્યું છે. સાથે જ કોન્ટ્રાક્ટ પર નોકરી પર રાખવામાં આવેલા 600 કર્મચારીઓને નોકરીમાંથી કાઢી મૂકવામાં આવ્યા છે. તેનો કોન્ટ્રાક્ટ ઓક્ટોબર-નવેમ્બરનો સુધીનો હતો.
છટણી કેમ થઈ રહી છે
બાયજુસે ગયા વર્ષે 150 મિલિયન ડોલરમાં Toppr ખરીદ્ય હતો. કંપનીનું કહેવું છે કે તેણે Topprના એકીકરણની પ્રક્રિયા પૂર્ણ કરી લીધી છે અને તેના લગભગ 80 ટકા કર્મચારીઓને જાળવી રાખ્યા છે. અધિગ્રહણની પ્રક્રિયા પૂર્ણ થયા બાદ Topprના સેલ્સ અને માર્કેટિંગ વિભાગના કર્મચારીઓને યથાવત્ રાખવામાં આવ્યા છે જ્યારે બાકીના કર્મચારીઓને નોકરીમાંથી કાઢી મૂકવામાં આવ્યા છે. આ પહેલા વ્હાઈટહટ જૂનિયરે લગભગ 300 ફૂલ ટાઈમ કર્મચારીઓને નોકરીમાંથી કાઢી મૂક્યા હતા. બાયજુસે ઓગસ્ટ 2020 માં વ્હાઇટહટ જુનિયરને 300 મિલિયન ડોલરમાં ખરીદી હતી. મોટા ભાગના છૂટા કરાયેલા કર્મચારીઓ કોડ ટીચિંગ અને સેલ્સ ટીમના છે. જેમાંથી 80 કંપનીની બ્રાઝીલ ઓફિસમાં કામ કરતા હતા. બાયજુએ ગયા વર્ષે એપ્રિલમાં બ્રાઝિલમાં પગ મૂક્યો હતો.
એક મહિનાનો પગાર ચૂકવ્યો
કંપનીના પ્રવક્તાના જણાવ્યા અનુસાર, વ્હાઈટહટ જુનિયરનું ધ્યાન યુવા વિદ્યાર્થીઓને ગુણવત્તાયુક્ત શિક્ષણ પ્રદાન કરવા તેમજ મજબૂત બિઝનેસ બનાવવા પર છે. અમે તે મુજબ અમારી વ્યૂહરચના બનાવી રહ્યા છીએ. કંપનીનું કહેવું છે કે નોકરીમાંથી કાઢી મુકાયેલા કર્મચારીઓને એક મહિનાનો પગાર આપવામાં આવ્યો છે. કોર્પોરેટ બાબતોના મંત્રાલયને આપવામાં આવેલી જાણકારી અનુસાર કંપનીને નાણાકીય વર્ષ 2021માં 1690 કરોડ રૂપિયાનું નુકસાન થયું છે. આ સમયગાળા દરમિયાન કંપનીની આવક 483.9 કરોડ રૂપિયા રહી હતી જ્યારે કુલ ખર્ચ વધીને 2175.2 કરોડ રૂપિયા થયો હતો.
બીજી ઘણી કંપનીઓએ પણ હકાલપટ્ટી કરી
બ્લૂમબર્ગના એક રિપોર્ટ અનુસાર બાયજુસે આકાશ એજ્યુકેશનલ સર્વિસીસ લિમિટેડની ચૂકવણીમાં વિલંબ કર્યો છે. કંપનીએ એપ્રિલ 2021 માં તેને 950 મિલિયન ડોલરમાં ખરીદ્યો હતો. છેલ્લા કેટલાક મહિનાઓમાં, Unacademy Group, Lido Learning, Vedantu સહિતની ઘણી એડટેક કંપનીઓએ તેમના કર્મચારીઓને મોટા પ્રમાણમાં છૂટા કર્યા છે. મે મહિનામાં એડટેક યુનિકોર્ન વેદાંતુએ 624 કર્મચારીઓની છટણી કરી હતી. એ જ રીતે, FrontRow એ પણ 145 કર્મચારીઓને છુટા કર્યા હતા, જે તેના કુલ કાર્યબળના લગભગ 30 ટકા છે. જૂનમાં, ઈન્ફોઈઝથી રોકાણ ધરાવતી સ્ટાર્ટઅપ કંપની Udayyએ કામગીરી બંધ કરવાની જાહેરાત કરી હતી.