રાજ્યમાં મહાનગરપાલિકા, તાલુકા અને જિલ્લા પંચાયતની પેટા ચૂંટણીના આજે પરિણામ જાહેર થઇ રહ્યા છે. જેમાં ભાજપે કોંગ્રેસનો સફાયો કર્યો છે.
ગાંધીનગર મહાનગરપાલિકાના વોર્ડ નંબર-3ની પેટા ચૂંટણીમાં ભાજપના પ્રણવ પટેલનો 648 મતથી વિજય થયો છે. તો અરવલ્લીના ભિલોડા તાલુકા પંચાયતની પેટા ચૂંટણીમાં ભાજપનો વિજય થયો છે. ખેરાડી બેઠક પર ભાજપ ઉમેદવાર જીવા વણકરનો વિજય થયો છે.
બીજી તરફ નવસારી ખેરગામ જિલ્લા પંચાયતમાં ભાજપના પ્રશાંત પટેલનો 2314 મતથી વિજય થયો છે. જ્યારે અમરેલીના રાજુલા તાલુકા પંચાયતની બે બેઠકોનું પરિણામ જાહેર થયુ છે. રાજુલાની ધારેશ્વર બેઠકના ભાજપના ઉમેદવારની જીત થઈ છે.
જ્યારે જામનગરની ચેલા જિલ્લા પંચાયતની પેટા ચૂંટણીમાં ભાજપનો વિજય થયો છે. કોંગ્રેસના ગઢમાં ગાબડું પાડીને ભાજપે સત્તા મેળવી છે. ભાજપના રમેશ સિંચે કોંગ્રેસના અમિત પરમારને 1283 મતથી હરાવ્યા છે.
તો મહીસાગરના કડાણા તાલુકા પંચાયતની પેટા ચૂંટણીમાં ભાજપની જીત થઈ છે. બન્ને બેઠકો પર ભાજપના ઉમેદવારો વિજેતા થયા છે. ભગલીયા બેઠક પરથી ભુપતભાઇ માલિવાડ અને સરસવા ઉત્તર બેઠકથી કનુભાઈ હરિજનની જીત થઈ છે.
જ્યારે તાપીની નિઝર તાલુકા પંચાયતની બેઠકની પેટાચૂંટણીના પરિણામ જાહેર થયા છે. શાલેની બે બેઠક પર ફરી એક વખત ભાજપની જીત થઈ છે. ભાજપના ઉમેદવાર અનિલભાઈ ગામીતનો 1139 મતે વિજય થયો છે. તો કચ્છની ચાર તાલુકા પંચાયતની પાંચ બેઠકો પરના પણ પરિણામ જાહેર થઇ ગયા છે. જેમાં 5 સીટોમાં 3 ભાજપ, એક કોંગ્રેસ અને એક અપક્ષના ફાળે ગઇ છે.