વર્લ્ડ ચેમ્પિયનશિપ / સિન્ધુ વર્લ્ડ નંબર-2 શટલરને હરાવી સેમીફાઇનલમાં પહોંચી

સિન્ધુએ એક કલાક 10 મિનિટમાં મુકાબલો જીત્યો. આ જીતની સાથે જ સિન્ધુએ યિંગ વિરુદ્ધ પોતાનો કરિયરનો રેકોર્ડ 5-10 કરી લીધો છે. પહેલા ગેમમાં સિન્ધુ સરળતાથી પોઇન્ટ ગુમાવ્યા હતા. ભારતીય ખેલાડીએ એક સમયે 4-11થી અને પછી 9-14થી પાછળ ચાલી રહી હતી. સિન્ધુ 12-21થી પહેલી ગેમ હારી બેઠી. 

2017 અને 2018માં સિલ્વર અને 2013 અને 2014માં બ્રોન્ઝ મેડલ જીતી ચૂકેલી સિન્ધુએ બીજી ગેમમાં વાપસી કરી અને યિંગને જબરજસ્ત ટક્કર આપી. બંને ખેલાડીઓ એક સમયે 8-8થી અને પછી 12-12થી બરાબરી પર હતી. ત્યારબાદ સિન્ધુએ 18-16થી ગેમમાં પકડ બનાવી. 

અહીં યિંગ ફરી 18-18થી બરાબરી પર આવી ગઇ. બાદમાં બંને ખેલાડીઓ 21-21થી બરાબરી પર હતી. પરંતુ સિન્ધુએ અહીંથી સતત બે પોઇન્ટ લઇને 23-21થી બીજી ગેમ જીતી લીધી અને મેચને ત્રીજી ગેમ સુધી લઇ જવામાં સફળ રહી.

થર્ડ ગેમમાં સિન્ધુ એક સમયે 5-8થી પાછળ હતી. પરંતુ ત્યારબાદ સિન્ધુએ 14-14 અને પછી 19-19થી સ્કોર બરાબરી પર લાવી દીધો. ભારતીય ખેલાડીઓએ ત્યારબાદ સતત બે પોઇન્ટ લઇને સેમીફાઇનલ માટે સ્થાન પાક્કુ કરી લીધું.