શહેરના વસ્ત્રાપુર વિસ્તારમાં ગઇકાલે બપોરે એક યુવકે પોતાના પિતાની વેવલી સ્કોટ(રીવોલવર)થી લમણે ગોળી મારીને આત્મહત્યા કરી લેતા ચકચારમચી ગઇ છે. પપ્પા તમારી રીવોલવર હું રાખીશ અને મારા નામે લાયસન્સ કરાવી લઇશ તેમ કહીને તેને બાથરુમમાં જઇને પોતાનું જીવન ટુંકાવ્યુ છે. પત્નિ સાથે છુટાછેડા થઇ જતા યુવકે છેલ્લા ધણા દિવસથી ડીપરેશનમાં હતો.
પોલીસ સુત્રોના જણાવ્યા અનુસાર સનરાઇઝ પાર્ક સોસાયટીમાં રહેતા ઉજવલસીંગ ઢીંગરાના 44 વર્ષિય પુત્ર ગુરમીતસીંગ ઢીંગરાએ લમણે રીવલવરથી ગોળી મારીને આત્મહત્યા કરી લીધી છે. ગુરમીતસીંગ ઢીંગરા રોયલ એન્ફીલન્ડના વર્ક શોપમાં નોકરી કરે છે અને તેના પિતા ઉજવસીંગ ઢીંગરા પાસે લાયસન્સ વાળી રીવોલવર છે. ઇલેકશન હોવાથી ઉજવસીંગે વસ્ત્રારપુર પોલીસ સ્ટેશનમાં રીવોલવર જમા કરાવી હતી. ગઇકાલે ઉજવલસીંગ પોલીસ સ્ટેશનથી રીવોલવર લઇને ઘરે ગયા હતા.
ઉજવલસીંગે રીવોલવર તેમના પુત્ર ગુરમીતસીંગને આપી હતી અને તીજોરીમાં મુકી દેવાનું કહ્યુ હતું. ઉજવલસીંગે રીવોલવર આપતા ગુરમીતસીંગે કહ્યુ હતુંકે પપ્પા તમારી રીવોલવર હું રાખીશ અને મારા નામે લાયસન્સ કરાવી લઇશ. ગુરમીતસીંગની વાત સાંભણીને ઉજવલસીંગ જતા રહ્યા હતા. થોડાક સમય પછી ઉજવલસીંગના પૌત્ર રાયબીરનો ફોન આવ્યો હતો અને જણાવ્યુ હતુંકે પિતાજી બાથરુમમાં ગયા છે અને ગોળી મારી તેવો અવાજ આવ્યો છે.
ઉજવલસીંગ તરતજ પોતાના ઘરે પહોચી ગયા હતા અને બાથરુમનો દરવાજો ખોલીને જોયુ હતું તો ગુરમીતસીંગ લોહીથી લથપથ હાલતમાં જમીન પર પડ્યા હતા અને તેમના હાથમાં રીવોલવર હતી. ગુરમીતસીંગે પોતાના લમણે ગોળી મારીને આત્મહત્યા કરી હતી. ઇજાગ્રસ્ત ગુરમીતસીંગને સારવાર માટે હોસ્પિટલમાં ખસેડવામાં આવ્યો હતો જ્યા તેમનું સારવાર દરમિયાન મોત થયુ હતું. થોડાક સમય પહેલા ગુરમતીસીંગના છુટાછેડા થયા હતા જેના કારણે કે ડીપરેશનમાં આવી ગયા હતા જેની સારવાર પણ ચાલતી હતી. પત્નિના વિરહમાં ગુરમીતસીંગે આત્મહત્યા કરી લીધી છે.