ક્રાઇમ / 'અમદાવાદ' કે 'ગુંડાવાદ'! બોપલમાં વેપારીને ઉઘરાણી માટે માર માર્યો, પેન્ટ ઉતારીને ઇલેક્ટ્રીક કરંટ આપ્યો બાદમાં ઉઠાવી ગયા

• બોપલમાં મોબાઈલના વેપારીને ઈલેકટ્રીક કરંટ આપીને માર માર્યો
• રૂ 1.90 લાખની ઉઘરાણી કરવા માર્યો માર
• પોલીસે 7 લોકો વિરૂધ્ધ નોંધી ફરિયાદ

અમદાવાદના બોપલમાં સેલિબ્રેશન સેન્ટરમાં મોબાઈલની દુકાન ચલાવતા નરેન્દ્ર ગુપ્તા નામના વેપારીની દુકાનમાં ઘુસીને સાત લોકોએ માર માર્યો. વેપારી પાસેથી રૂ.1.90 લાખની ઉઘરાણી કરવા આવેલા શખ્સોએ માર મારીને વેપારીનુ પેન્ટ કાઢીને ઈલેક્ટ્રીક કરંટ આપ્યા હતા. ત્યાર બાદ વેપારીને ઉઠાવીને ગાડીમાં લઈ જતા સીસીટીવી ફુટેજ સામે આવ્યા. મહત્વનુ છે કે આ ફુટેજમાં પોલીસની હાજરી પણ જોવા મળી છે. આરોપીઓ વેપારીનુ અપહરણ કરીને લઈ ગયા અને ગાડીમાં પણ માર માર્યો હોવાનો આક્ષેપ કર્યો છે. ત્યારે પોલીસની હાજરીમા જ આરોપીઓએ વેપારીને માર મારીને રૂ.2.50 લાખ ઓનલાઈન ટ્રાજેક્શન કરીને ખંડણી માંગી હોવાની વેપારીએ ફરિયાદ નોંધાવી છે.

પોલીસે 7 લોકો સામે નોંધી ફરિયાદ

બોપલમાં જાહેરમાં વેપારીને ઈલેકટ્રીક કરંટ આપીને ઉઠાવીને અપહરણ કરીને માર મારવાની ઘટનાએ ફરી અમદાવાદની સલામતીને લઈને સવાલ ઉઠાવ્યો છે. 1.90 લાખની ઉઘરાણીના બહાને અઢી લાખ રૂપિયા પડાવ્યા હોવાનો આરોપ વેપારીએ લગાવ્યો છે. આ ઘટનાને લઈને બોપલ પોલીસે આરોપી આશિષ, હૈદર, ચિરાગ, મેહુલ મકવાણા, તુષાર, અંકિત અને જગુ નામના  સાત વ્યકિત વિરૂધ્ધ ફરિયાદ નોંધી છે.

પોલીસની હાજરીમાં વેપારીને માર મારવામાં આવ્યો

વેપારીને માર મારવાના કેસમા પોલીસની હાજરીને લઈને સવાલ ઉઠી રહ્યા છે. કારણ કે આરોપી ફરાર છે. જો પોલીસની હાજરી હતી તો વેપારીની આવી હાલતમાં પોલીસે કેમ મદદ કરી નહિ. આ પોલીસ જવાન કોણ હતા. તે મુદ્દે પોલીસે તપાસ  શરૂ કરી છે. એટલુ જ નહિ વેપારીને મારનાર સાત આરોપીને પકડવા જુદી-જુદી ટીમો બનાવીને શોધખોળ શરૂ કરવામા આવી છે.