બિઝનેસ / આ કારણે ભારતીય શેરબજારમાં આવી તોફાની તેજી, માર્કેટ ફરી 5 ટ્રિલિયન ડૉલરને પાર

Stock Market : ભારતીય શેરબજારને લઈ મોટી અપડેટ સામે આવી છે. વાસ્તવમાં હાલની સ્થિતિએ શેરબજારમાં ઉપર તરફનો ટ્રેન્ડ ચાલુ છે. લાંબા ઘટાડા પછી ગયા અઠવાડિયે બજારે ગતિ પકડવાનું શરૂ કર્યું અને સોમવારે આ જોવા મળ્યું. ગ્રીન ઝોનમાં ખુલ્યા પછી સેન્સેક્સ અને નિફ્ટીએ જોરદાર ઉછાળો નોંધાવ્યો. મુંબઈ સ્ટોક એક્સચેન્જના 30 શેરવાળા સેન્સેક્સમાં ટ્રેડિંગ દરમિયાન 1000 પોઈન્ટનો ઉછાળો જોવા મળ્યો જ્યારે નેશનલ સ્ટોક એક્સચેન્જના નિફ્ટીમાં 300 પોઈન્ટથી વધુનો વધારો નોંધાયો. બજારમાં આ ઉછાળાને કારણે લગભગ 3 મહિના પછી BSE માર્કેટ કેપ ફરી એકવાર $5 ટ્રિલિયનના આંકને પાર કરી ગયું.

એક અઠવાડિયામાં બોમ્બે સ્ટોક એક્સચેન્જ (BSE) માં રોકાણકારોની સંપત્તિમાં જબરદસ્ત વધારો જોવા મળ્યો છે અને તેની બજાર મૂડી 3 મહિનામાં પહેલી વાર 5 ટ્રિલિયન ડોલરના આંકને પાર કરી ગઈ છે. નોંધનીય છે કે, અગાઉ BSE એ 20 જાન્યુઆરી 2025ના રોજ આ સીમાચિહ્ન હાંસલ કર્યું હતું. આ આંકડો ભારતને અમેરિકા, ચીન, જાપાન અને હોંગકોંગની સાથે આટલી ઊંચી માર્કેટ કેપ ધરાવતા થોડા દેશોમાં સ્થાન આપે છે. 7 એપ્રિલથી BSE માર્કેટ કેપ ઘટીને $4.5 ટ્રિલિયન થયા પછી બજારમાં સતત સુધારો જોવા મળ્યો છે.

બજારમાં આ તેજી યુએસ રાષ્ટ્રપતિ ડોનાલ્ડ ટ્રમ્પના નિર્ણય પછી જોવા મળી રહી છે જેમાં તેમણે પારસ્પરિક ટેરિફના અમલીકરણને 90 દિવસ માટે મુલતવી રાખ્યું છે. આ પછી લાર્જ કેપ, મિડકેપ અને સ્મોલ કેપ સહિત તમામ શ્રેણીઓમાં વધારો જોવા મળ્યો છે. 7 એપ્રિલથી સેન્સેક્સ અને નિફ્ટી બંને સૂચકાંકોમાં લગભગ 9% નો વધારો નોંધાયો છે. આ સમયગાળા દરમિયાન BSE મિડ અને સ્મોલકેપ ઇન્ડેક્સ અનુક્રમે 9.4% અને 10.6% વધ્યા છે, જ્યારે નિફ્ટી બેંક 11% અને BSE PSU ઇન્ડેક્સ 10% વધ્યા છે.

જોકે અહીં એ નોંધવું જોઈએ કે તાજેતરના ઝડપી સુધારા છતાં, BSE સેન્સેક્સ અને NSE નિફ્ટી હજુ પણ તેમના 52-સપ્તાહના ઉચ્ચ સ્તરથી 7 ટકાથી વધુ નીચે છે. જ્યારે BSE મિડકેપ અને સ્મોલકેપ સૂચકાંકો તેમના ઉચ્ચ સ્તરથી અનુક્રમે 13.8 % અને 15.8% ઘટ્યા છે.

વધુ વાંચો : શેરબજાર માટે સોમવાર શુભ રહ્યો, સેન્સેક્સ-નિફ્ટીમાં આટલા પોઈન્ટનો ઉછાળો

અમેરિકા-ભારત વેપાર વાટાઘાટો પર નજર

ભલે શેરબજારમાં તેજી પરત આવવાથી રોકાણકારોને રાહત મળી હોય પરંતુ ટેરિફ પર વૈશ્વિક તણાવ વચ્ચે રોકાણકારો ભારત અને અમેરિકા વચ્ચે ચાલી રહેલી વેપાર વાટાઘાટો પર નજર રાખી રહ્યા છે. ખાસ કરીને અમેરિકાના ઉપરાષ્ટ્રપતિ જેડી વાન્સની ભારત મુલાકાત દરમિયાન થયેલી ચર્ચાઓ પર જેમાં તેઓ વડા પ્રધાન નરેન્દ્ર મોદી સાથે વેપાર બાબતો પર ચર્ચા કરી શકે છે. દરમિયાન ક્રૂડ ઓઇલના ભાવમાં ઘટાડો થવાથી ફુગાવાના દબાણમાં પણ ઘટાડો થયો છે જેના કારણે વેપાર સંતુલનમાં સુધારો થયો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ