Ratan Tata / ટાટા ગ્રુપનો છે $365 બિલિયનનો કારોબાર, રતન ટાટાએ મજૂરની જેમ કામ કરીને બનાવ્યું વિશાળ સામ્રાજ્ય

ટાટા ગ્રુપના પૂર્વ ચેરમેન રતન ટાટાએ દુનિયાને અલવિદા કહી દીધું છે. તેમણે મુંબઈની બ્રીચ કેન્ડી હોસ્પિટલમાં 86 વર્ષની વયે અંતિમ શ્વાસ લીધા. તેઓ લાંબા સમયથી બીમાર હતા. 31 માર્ચ, 2024 સુધીમાં ટાટા ગ્રુપનું કુલ માર્કેટ કેપ $365 બિલિયન હતું. પરંતુ ટાટા ગ્રૂપ સાવ એમ જ આટલું વિશાળ નથી થયું. ટાટા ગ્રુપને આ મુકામ સુધી પહોંચાડવા માટે રતન ટાટાએ મજૂરની જેમ કામ કર્યું છે. 28 ડિસેમ્બર, 1937ના રોજ મુંબઈમાં જન્મેલા રતન ટાટાના પિતા નવલ ટાટા અને માતા સુની ટાટા 1948માં અલગ થઈ ગયા હતા. જે બાદ તેમની દાદીએ તેમને ઉછેર્યા હતા.

હાર્વર્ડ બિઝનેસ સ્કૂલથી કર્યો હતો અભ્યાસ

મુંબઈ અને શિમલામાં અભ્યાસ કર્યા બાદ રતન ટાટાએ હાર્વર્ડ બિઝનેસ સ્કૂલમાંથી ઉચ્ચ શિક્ષણ મેળવ્યું. જે પછી તેમણે કોર્નેલ યુનિવર્સિટીમાંથી આર્કિટેક્ચર અને સ્ટ્રક્ચરલ એન્જિનિયરિંગનો અભ્યાસ પૂર્ણ કર્યો. રતન ટાટા અમેરિકામાં કામ કરવા માંગતા હતા પરંતુ તેમની દાદીની તબિયતના કારણે તેમને ભારત આવવું પડ્યું. ભારતમાં તેમણે IBMમાં નોકરી શરૂ કરી હતી. એ સમયે ટાટા ગ્રૂપના ચેરમેન જેઆરડી ટાટાને આ વાતની જાણ થઈ તો તેઓ ખૂબ નારાજ થયા. જેઆરડી ટાટાના કહેવા પર, તેમણે પોતાનો સીવી ટાટા ગ્રૂપમાં મોકલ્યો અને એક સામાન્ય કર્મચારી તરીકે ટાટા ગ્રૂપમાં તેમની કારકિર્દી શરૂ કરી.

ટાટા સ્ટીલમાં મજૂરોની જેમ કર્યું કામ

રતન ટાટા 1962માં ટાટા ઇન્ડસ્ટ્રીઝમાં આસિસ્ટન્ટ તરીકે ટાટા ગ્રુપમાં જોડાયા હતા. પાછળથી તે જ વર્ષે, તેમણે ટાટા એન્જિનિયરિંગ અને લોકોમોટિવ કંપની (હવે ટાટા મોટર્સ તરીકે ઓળખાય છે)ના જમશેદપુર પ્લાન્ટમાં છ મહિનાની ટ્રેનિંગ લીધી. ટાટા ગ્રૂપમાં તેમની નોકરી દરમિયાન, તેમણે અન્ય કર્મચારીઓ સાથે ઝીણવટ પૂર્વક કામ શીખ્યું અને ટાટા સ્ટીલ પ્લાન્ટમાં ભઠ્ઠીઓમાં ચૂનાના પથ્થર નાખવાનું કામ કર્યું, જે સામાન્ય રીતે મજૂરો કરતા હતા. વિવિધ કંપનીઓમાં સેવા આપ્યા બાદ, તેમને 1971માં નેશનલ રેડિયો અને ઇલેક્ટ્રોનિક્સ કંપનીના ડાયરેક્ટર-ઈન્ચાર્જ તરીકે નિયુક્ત કરવામાં આવ્યા. 1981માં, તેમને ગ્રુપની અન્ય હોલ્ડિંગ કંપની ટાટા ઇન્ડસ્ટ્રીઝના ચેરમેન તરીકે નિયુક્ત કરવામાં આવ્યા, જ્યાં તેઓ તેને ગ્રૂપ રણનીતિ થિંક ટેન્ક અને ઉચ્ચ-તકનીકી વ્યવસાયોમાં નવા સાહસોના પ્રમોટર તરીકે બદલવા માટે જવાબદાર હતા.

વર્ષ 1991 માં, રતન ટાટા ટાટા ગ્રુપના ચેરમેન બન્યા અને લગભગ 21 વર્ષ સુધી સમગ્ર ગ્રુપનું નેતૃત્વ કર્યું. આ દરમિયાન, રતન ટાટાએ ટાટા ગ્રુપનું ન માત્ર યાદગાર નેતૃત્વ કર્યું પરંતુ ઉદ્યોગમાં ભારતનું નામ રોશન કર્યું. ટાટા ગ્રૂપના ચેરમેન રહીને રતન ટાટાએ જગુઆર લેન્ડ રોવર જેવી મોટી બ્રાન્ડ્સને ટેકઓવર કરી.

ટાટા ગ્રુપના ચેરમેન રહેવા દરમિયાન તેઓ ટાટા મોટર્સ, ટાટા સ્ટીલ, ટાટા કન્સલ્ટન્સી સર્વિસિસ, ટાટા પાવર, ટાટા ગ્લોબલ બેવરેજિસ, ટાટા કેમિકલ્સ, ઈન્ડિયન હોટેલ્સ અને ટાટા ટેલિસર્વિસિસ સહિતની મોટી ટાટા કંપનીઓના ચેરમેન હતા. તેઓ ભારત અને વિદેશની વિવિધ સંસ્થાઓ સાથે પણ જોડાયેલા હતા. રતન ટાટા મિત્સુબિશી કોર્પોરેશન અને જેપી મોર્ગન ચેઝના આંતરરાષ્ટ્રીય સલાહકાર બોર્ડમાં પણ હતા. તેઓ સર રતન ટાટા ટ્રસ્ટ અને એલાઈડ ટ્રસ્ટ અને સર દોરાબજી ટાટા ટ્રસ્ટ અને એલાઈડ ટ્રસ્ટના અધ્યક્ષ હતા. તેઓ ટાટા ઇન્સ્ટિટ્યૂટ ઓફ ફંડામેન્ટલ રિસર્ચની મેનેજમેન્ટ કાઉન્સિલના અધ્યક્ષ હતા. તેમણે કોર્નેલ યુનિવર્સિટી અને યુનિવર્સિટી ઓફ સધર્ન કેલિફોર્નિયાના ટ્રસ્ટીઓના બોર્ડમાં પણ સેવા આપી હતી.

ઘર-ઘરમાં ટાટા

રતન ટાટાનું ટાટા ગ્રુપ મીઠું બનાવવાથી લઈને વિમાન ઉડાવવા સુધીનું કામ કરે છે. રતન ટાટાના કારણે જ આજે ભારતમાં દરેક ઘરમાં ટાટાની કેટલીય પ્રોડક્ટનો ઉપયોગ થઈ રહ્યો છે. રતન ટાટાએ દેશને એવી-એવી પ્રોડક્ટ્સ આપી, જેનો ઉપયોગ ભારતના ઉચ્ચ વર્ગથી લઈને નીચલા વર્ગ સુધી દરેક વ્યક્તિ કરી રહ્યા છે.

પરોપકાર અને સામાજિક કાર્ય

રતન ટાટા તેમના પરોપકારી અને સામાજિક સેવા કાર્ય માટે વ્યાપકપણે પ્રશંસા કરવામાં આવે છે. તેમના નેતૃત્વ હેઠળ, ટાટા ટ્રસ્ટ અને ટાટા ફાઉન્ડેશને શિક્ષણ, આરોગ્ય, ગ્રામીણ વિકાસ અને તકનીકી નવીનતાઓના ક્ષેત્રોમાં મોટું યોગદાન આપ્યું છે. જેમ કે -

શિક્ષણમાં યોગદાન - રતન ટાટાનું માનવું છે કે શિક્ષણ એ સમાજના વિકાસની ચાવી છે. તેમણે દેશભરમાં શાળાઓ અને કોલેજોની સ્થાપનામાં યોગદાન આપ્યું છે. તેમણે અનેક શિષ્યવૃત્તિઓ પણ શરૂ કરી જેનો લાખો વિદ્યાર્થીઓએ લાભ લીધો છે.

આરોગ્ય સેવા - ટાટા ટ્રસ્ટ દ્વારા ઘણી આરોગ્ય સેવાઓ અને હોસ્પિટલોમાં રોકાણ કરવામાં આવ્યું છે. તેમણે કેન્સર સંશોધન, એઇડ્સની સારવાર અને ગ્રામીણ વિસ્તારોમાં આરોગ્ય સેવાઓની પહોંચ સુધારવામાં વિશેષ કાર્ય કર્યું છે. ટાટા ઇન્સ્ટિટ્યૂટ ઑફ સોશિયલ સાયન્સ (TISS) અને ઇન્ડિયન ઇન્સ્ટિટ્યૂટ ઑફ સાયન્સ (IISc) જેવી અગ્રણી શૈક્ષણિક સંસ્થાઓને સમર્થન આપ્યું.

આ પણ વાંચો: સફળ બિઝનેસમેનને પ્રેમમાં મળી હતી નિષ્ફળતા, વાંચો રતન ટાટાના જીવનના રોચક કિસ્સા

તેમના પરોપકાર માટે વિદેશમાં પણ પ્રખ્યાત રહ્યા રતન ટાટા

રતન ટાટા વિદેશમાં પણ તેમના પરોપકાર માટે ઓળખાય છે. ટાટા ગ્રૂપે, રતન ટાટાના નેતૃત્વ હેઠળ, ભારતમાં સ્નાતક વિદ્યાર્થીઓને નાણાકીય સહાય પૂરી પાડવા માટે કોર્નેલ યુનિવર્સિટી ખાતે $28 મિલિયન ટાટા શિષ્યવૃત્તિ ફંડની સ્થાપના કરી. 2010 માં, ટાટા ગ્રૂપે હાર્વર્ડ બિઝનેસ સ્કૂલ (HBS) ખાતે એક એક્ઝિક્યુટિવ સેન્ટર બનાવવા માટે $50 મિલિયનનું દાન આપ્યું હતું, જ્યાં તેઓએ સ્નાતક તાલીમ મેળવી હતી, તેને ટાટા હોલ નામ આપવામાં આવ્યું. 2014 માં, ટાટા જૂથે IIT-બોમ્બેને રૂ. 95 કરોડનું દાન આપ્યું હતું અને મર્યાદિત સંસાધનો ધરાવતા લોકો અને સમુદાયોની જરૂરિયાતોને અનુરૂપ ડિઝાઇન અને એન્જિનિયરિંગ સિદ્ધાંતો વિકસાવવા માટે ટાટા સેન્ટર ફોર ટેકનોલોજી એન્ડ ડિઝાઇન (TCTD) ની રચના કરી હતી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ