શહેરના સોલા વિસ્તારમાં આવેલા એક બંગલોમાં ગુપ્ત ભોંયરું બનાવીને છુપાવેલા દારુના જથ્થાને સ્ટેટ મોનિટરિંગ સેલની ટીમે ઝડપી પાડતાં ચકચાર મચી ગઇ છે. પોલીસે બંગલાના માલિક કુંતલ ભટ્ટની દારૂની ૫૮૧ બોટલ સાથે ધરપકડ કરી છે.
ગુજરાતમાં ઘુસાડવામાં આવતા દારૂને લઇને રાજ્યના પોલીસ વડાએ દારૂ જુગારના અડ્ડાઓ નાબૂદ કરવા માટે આદેશ આપ્યા છે. જેમાં લોકલ પોલીસ, એજન્સી, આ સિવાય એલ.સી.બી. અને ક્રાઈમ બ્રાન્ચ અને પીસીબીને પણ રેડ કરવાના આદેશ આપવામાં આવ્યા છે. ડીજીપી શિવાનંદ ઝાના આદેશ બાદ અમદાવાદના તમામ વિસ્તારોમાં ખાસ ડ્રાઇવ શરૂ કરવામાં આવી હતી.
સ્ટેટ મોનિટરિંગ સેલને બાતમી મળી હતી કે સોલા ખાતે આવેલી ગ્રીનવૂડ સોસાયટીના એક બંગલોમાં જંગી દારૂનો જથ્થો છુપાવેલો છે. બાતમીના આધારે સ્ટેટ મોનિટરિંગ સેલના અધિકારીઓએ ગ્રીનવૂડ બંગલોમાં દરોડા પાડ્યાે હતાે. દરોડા દરમિયાન બંગલોમાંથી દારૂની બોટલ પણ મળી નહીં ત્યારે બાતમીદારે અધિકારીને ચોક્કસ બાતમી આપી હતી કે બંગલોના એક રૂમમાં વોર્ડરોબની નીચે એક ભોયરું બનાવ્યું છે કે જેમાં દારૂ સંતાડાયો છે.
બાતમીદારની બાતમીના આધારે ટીમે વોર્ડરોબની નીચે તપાસ કરી તો તેમાં એક ભોયરું હતું. જેમાં ૫૮૧ નંગ દારૂની બોટલ સંતાડી હતી. દારૂ છુપાવવા માટે બંગલાના માલિક કુંતલ ભટ્ટે સ્પેશિયલ જગ્યા બનાવી હતી. પોલીસે કુંતલની પૂછપરછ કરતાં રાજસ્થાનથી દારૂ લાવ્યો હોવાનું પ્રાથમિક તપાસમાં ખૂલ્યું છે. કુંતલે પોતાના ઘરમાં વોર્ડરોબની નીચે સવા પાંચ ફૂટ ઊંડું આઠ ફૂટ લાંબું અને ચાર ફૂટ પહોળું ભોયરું બનાવ્યું હતું.
જેમાં તે દારૂ સંતાડતો હતો. કુંતલ વોર્ડરોબનો દરવાજો ખોલ્યા બાદ તેની બાજુમાં પડેલ ડ્રેસિંગ ટેબલ હટાવીને ભોંયરામાં જતો હતો અને દારૂની બોટલો કાઢતો હતો. ભોંયરાની જાણ કુંતલ અને તેના કેટલાક મળતિયાઓને હતી. પોલીસને કુંતલ પાસેથી ૧.૭૨ લાખની કિંમતનો ૫૮૧ બોટલ વિદેશી દારૂ જથ્થો મળી આવ્યો છે. સોલા પોલીસે તેની વિરુદ્ધમાં ગુનો દાખલ કરીને તપાસ શરૂ કરી છે.
પોલીસ સૂત્રો પાસેથી મળેલી વિગત અનુસાર કુંતલ દારૂની ડિલિવરી જાતે જ કરતો હતો અને તેના વિશ્વાસુ હોય તેવા ગ્રાહકને માલ આપતો હતો. રથયાત્રા નજીક આવતી હોવાથી તેને દારૂનો સ્ટોક કરીને રાખ્યો હતો. જેથી તે ઊંચા ભાવે વેચી શકે. કુંતલ ક્યાંથી દારૂ લાવતો હતો અને અમદાવાદમાં કોને કોને વેચતો હતો તેની તપાસ પોલીસે શરૂ કરી છે. પ્રાથમિક વિગતમાં કુંતલ પહેલાં પણ દારૂના કેસમાં ઝડપાયો હોય તેવું પોલીસ સૂત્રો દ્વારા જાણવા મળ્યું છે.
કુંતલે પોલીસ સમક્ષ કબૂલાત કરી છે કે અંદાજે ૧૦૦ પેટી છુપાવી શકાય તેટલું મોટું ભોયરું તેણે બનાવડાવ્યું હતું. એક વ્યકિત ભોંયરામાં ઊતરી શકે તેટલી નાનકડી જગ્યા હતી. ઉલ્લેખનીય છે કે સ્ટેટ મોનિટરિંગ સેલને બાતમી મળી હતી કે, સેટેલાઇટ જેવા પોશ વિસ્તારમાં આવેલ શ્યામલ સર્કલ પાસેના બીજલ બંગલોઝના એક મકાનમાં દારૂનો વિશાળ પ્રમાણમાં જથ્થો પડ્યો છે. બાતમીના આધારે સ્ટેટ મોનિટરિંગ સેલની ટીમે એપ્રિલ મહિનામાં દરોડો પાડીને બિયર તેમજ વિદેશી દારૂની ૧૧૦ પેટીનો જથ્થો જપ્ત કર્યો હતો. ઘટનાની જાણ સેટેલાઇટ પોલીસને થતાં તે પણ તાત્કાલીક ઘટના સ્થળે પહોંચી ગઈ હતી અને તપાસનો ધમધમાટ શરૂ કર્યો હતો.