ક્રિકેટ / ટીમ ઈન્ડિયાની લાજ બચાવતા એકલા બુમરાહના સૌથી વધુ રન, 7 દિગ્ગજો માત્ર 21 રન બનાવી શક્યા

રસપ્રદ રીતે ભારત તરફથી જસપ્રિત બુમરાહે સૌથી વધુ રન બનાવ્યા. તેણે 55 રનની શાનદાર ઇનિંગ્સ રમી હતી. 

આ સિવાય આજની ઈનિંગમાં ભારત તરફથી શુભમન ગિલે 43 અને પૃથ્વી શોએ 40 રન બનાવ્યા હતા. ટીમ ઈન્ડિયાના બાકી દિગ્ગજો નિષ્ફળ ગયા હતા. ભારત અને ઑસ્ટ્રેલિયા વચ્ચે પ્રથમ ટેસ્ટ મેચ 17 ડિસેમ્બરથી એડિલેડમાં રમાશે. આવામાં પ્રેક્ટિસની દ્રષ્ટિએ, આ વોર્મ-અપ મેચને ખૂબ જ મહત્વપૂર્ણ માનવામાં આવી રહી છે.

બેટ વડે પણ બુમ-બુમ બુમરાહ

ટીમ ઈન્ડિયાના 9 બેટ્સમેન માત્ર 123 રનમાં આઉટ થયા હતા. પરંતુ આ પછી, જસપ્રિત બુમરાહે મોરચો સંભાળતાની સાથે જ ઑસ્ટ્રેલિયા-Aના બોલરોની ખબર લીધી હતી. તેણે 57 બોલમાં 55 રનની અણનમ ઇનિંગ્સ ફટકારી હતી. આ દરમિયાન તેણે 6 ચોગ્ગા અને 2 છગ્ગા ફટકાર્યા હતા. ફર્સ્ટ ક્લાસ ક્રિકેટમાં બુમરાહની આ પહેલી અડધી સદી છે. બુમરાહે 10 મી વિકેટ માટે મોહમ્મદ સિરાજ સાથે 71 રનની નિર્ણાયક ભાગીદારી કરી હતી.

ફ્લોપ શો

ટીમ ઈન્ડિયાનો મિડલ ઓર્ડરનો ફ્લોપ શો રહ્યો હતો. ભારતના 7 બેટ્સમેન ફક્ત 21 રન બનાવીને આઉટ થયાં. હનુમા વિહારીની વિકેટ 102 ના સ્કોર પર પડી હતી. આ પછી, 123 ના સ્કોર સુધી વિકેટો સતત પડતી રહી. અજિંક્ય રહાણે માત્ર 4 રને આઉટ થયો હતો. રિષભ પંત માત્ર 5 રને આઉટ થયો હતો. રિદ્ધિમાન શાહ ખાતું પણ ખોલાવી શક્યો નહીં. આ સિવાય નવદીપ સૈની અને મોહમ્મદ શમી પણ ખાતું ખોલાવી શક્યા નહીં. પરંતુ બાદમાં બુમરાહે ટીમ ઈન્ડિયાની લાજ બચાવવામાં મદદ કરી હતી.

નબળી શરૂઆત

ત્રણ દિવસની આ ડે-નાઈટ મેચમાં ભારતે ઑસ્ટ્રેલિયા-A સામે ટોસ જીતીને પ્રથમ બેટિંગ કરવાનો નિર્ણય લીધો છે. પરંતુ ટીમ ઈન્ડિયાની શરૂઆત સારી રહી નહોતી. ઓપનર મયંક અગ્રવાલ માત્ર 2 રને આઉટ થયો હતો. જ્યારે પૃથ્વી શો 40 રન બનાવીને આગળ વધતો રહ્યો. પૃથ્વી શોએ ફરીથી નિરાશ કર્યા હતા. જોકે, તેણે ભારતને ઝડપી શરૂઆત આપી હતી. પરંતુ તે ફક્ત 40 રન બનાવીને આઉટ થયો હતો. તેણે માત્ર 29 બોલમાં 40 રન બનાવતા શોએ 8 ચોગ્ગા ફટકાર્યા હતા. પરંતુ તે સારી શરૂઆતને મોટી ઇનિંગમાં પરિવર્તિત કરી શક્યો નહીં.