ડ્રીમ પ્રોજેક્ટ / 2023 સુધીમાં અમદાવાદ-મુંબઇ વચ્ચે દોડતી થઇ જશે બુલેટ ટ્રેન, જાણો શું હશે ભાડું?

NHSRCLનાં ડાયરેકટરે કહ્યું કે,

'મુંબઈનાં છત્રપતિ શિવાજી ટર્મિનલથી અમદાવાદ (Ahmedabad) નાં સાબરમતી જંક્શન સુધી દોડનારી બુલેટ ટ્રેન (Bullet Train) નો કુલ ખર્ચ અંદાજે 1 લાખ કરોડથી પણ વધારે થશે. જેની અંદર જમીન સંપાદીત કરવા રૂ.17000 કરોડ ખર્ચ કરવામાં આવ્યાં છે. ગુજરાતમાં 158 જેટલાં ગામોની જમીન બુલેટ ટ્રેનનાં રૂટને લઇ સંપાદીત કરવામાં આવી છે. જેમાં માત્ર 15 ગામોની જમીનમાં જ જંત્રીનાં ભાવને લઈ તકલીફ ઉભી થઇ છે.

બુલેટ ટ્રેનનાં આ રૂટને લઇને વચ્ચે આવતા નાન્દેજ ગેરતપુર પાસેનાં ONGCનાં 5 કૂવાઓને પણ ખસેડી દેવામાં આવ્યાં છે. આ ઉપરાંત કુલ 1600 જેટલાં ઇલેક્ટ્રિક પોલ પણ ખસેડવામાં આવ્યાં છે. જેમાં કાલુપુર રેલ્વે સ્ટેશન પાસેથી પ્લેટફોર્મ નંબર 10, 11, 12 પર આવેલા સિગ્નલનાં 400 કરતા પણ વધુ કેબલો ખસેડવામાં આવ્યાં છે.'

અમદાવાદથી મુંબઈ સુધીનું બુલેટ ટ્રેનનું અંદાજીત ભાડું 3000 રૂપિયા

NHSRCLનાં ડાયરેકટરે વધુમાં કહ્યું કે, ટ્રેનનાં રૂટ માટે ગુજરાતનાં 5300થી વધુ પ્લોટની જમીન સંપાદીત કરવામાં આવશે, જેમાં 2600 જેટલા પ્લોટ એટલે કે અડધી જમીન સંપાદિત થઈ ગઈ છે. 2023 ડિસેમ્બર સુધીમાં બુલેટ ટ્રેનનો સમગ્ર પ્રોજેકટ પૂર્ણ થઈ જશે. તમને જણાવી દઇએ કે બુલેટ ટ્રેનનું સાબરમતીથી મુંબઈ સુધીનું અંદાજીત ભાડું રૂ.3000 જેટલું હોઇ શકે છે. આગામી ચાર પાંચ મહિના સુધીમાં ટેન્ડર પ્રક્રિયા પૂર્ણ થયા બાદ સિવિલ વર્ક કામગીરી શરૂ કરવામાં આવશે.

બુલેટ ટ્રેન માટે મુંબઈથી અમદાવાદ સુધી બનાવાશે 12 સ્ટેશન

વર્ષ 2017ની 14 સપ્ટેમ્બરનાં રોજ બુલેટ ટ્રેનનાં પ્રોજેક્ટનું ખાતમુહૂર્ત PM મોદી અને શિંઝો આબેએ કર્યું હતું. બુલેટ ટ્રેન માટે મુંબઈ (Mumbai) થી અમદાવાદ સુધીનાં 12 સ્ટેશનો બનાવવામાં આવશે. બુલેટ ટ્રેનની લંબાઈ અંદાજે 508 કિલોમીટર હશે અને તેની સ્પીડ 320 કિ.મી. પ્રતિ કલાક રહેશે. મુંબઈ અને અમદાવાદ વચ્ચેનું 508 કિ.મી.નું અંતર ટ્રેન માત્ર 2 કલાક 7 મિનિટમાં જ કાપશે. અમદાવાદનાં સાબરમતી ખાતે જ બુલેટ ટ્રેનનું સ્ટેશન બનાવાશે અને આ પ્રોજેકટ વર્ષ 2023માં પૂર્ણ થશે.