સાબરમતી રેલવે સ્ટેશન ખાતે બુલેટ ટ્રેન પ્રોજેક્ટની કરી સમીક્ષા
જાન્યુઆરી-ફેબ્રુઆરી સુધી કામગીરી પૂર્ણ થઇ જશે: રેલવે મંત્રી
કેન્દ્રીય રેલવે મંત્રી અશ્વિની વૈષ્ણવ આજે અમદાવાદની મુલાકાતે છે. તેઓએ આજે રાજ્ય સરકાર અને વેદાંત-ફોક્સકોન ગ્રુપ વચ્ચે થયેલા MoUના કાર્યક્રમમાં હાજરી આપી હતી. તદુપરાંત
બુલેટ ટ્રેન પ્રોજેક્ટની સમીક્ષા પણ કરી હતી. દરમ્યાન તેઓએ પ્રોજેક્ટને લઇ મોટું નિવેદન આપતા જણાવ્યું હતું કે, 'જાન્યુઆરી-ફેબ્રુઆરી સુધી કામગીરી પૂર્ણ થઇ જશે.'
આ પ્રોજેક્ટથી સાબરમતી-અમદાવાદને ઘણો ફાયદો થશે: અશ્વિની વૈષ્ણવ
તેઓએ આજે અમદાવાદની મુલાકાતે હોવાથી સાબરમતી રેલવે સ્ટેશન ખાતે બુલેટ ટ્રેન પ્રોજેક્ટની સમીક્ષા કરી હતી. એ દરમ્યાન તેઓએ બુલેટ ટ્રેન પ્રોજેક્ટને લઇને મહત્વનું નિવેદન આપ્યું હતું. તેઓએ કહ્યું કે, 'બુલેટ ટ્રેન પ્રોજેક્ટ ખૂબ મહત્વનો પ્રોજેક્ટ છે. સાબરમતી ખાતે મહત્વનો પ્રોજેક્ટ તૈયાર થઇ રહ્યો છે. આ પ્રોજેક્ટથી સાબરમતી-અમદાવાદને ઘણો ફાયદો થશે. જાન્યુઆરી-ફેબ્રુઆરી સુધીમાં આ કામગીરી પૂર્ણ થઇ જશે. વંદે ભારત ટ્રેનનું પણ સફળ પરીક્ષણ કરવામાં આવ્યું છે. ખૂબ જ ઝડપી સમયમાં વંદે ભારત ટ્રેન પણ દોડતી થઇ જશે. ગાંધીનગરથી મુંબઇ વચ્ચે આ પ્રથમ ટ્રેન દોડશે. જેનું 30 સપ્ટેમ્બરના રોજ PM મોદી લોકાર્પણ કરશે. સાબરમતી અને કાલુપુર રેલવે સ્ટેશનનું રી-ડેવલપમેન્ટ થશે. એકદમ મોર્ડન રેલવે સ્ટેશન તૈયાર કરવામાં આવશે. કાલુપુર રેલવે સ્ટેશનને સૂર્ય મંદિરની થીમ આપવામાં આવશે.'
બુલેટ ટ્રેનના પહેલા સ્ટેશનનું કામ લગભગ પૂર્ણતાના આરે
તમને જણાવી દઇએ કે, PM મોદીના ડ્રીમ પ્રોજેક્ટ મનાતા બુલેટ ટ્રેનનું કામ ગુજરાતમાં ગતિ પકડી ચૂક્યું છે. અમદાવાદમાં બુલેટ ટ્રેનને લઇ કામગીરી પૂર ઝડપે ચાલી રહી છે.અમદાવાદના વટવા ખાતે બુલેટ ટ્રેનના રૂટ પર સેગમેન્ટલ ગર્ડર ઇરેક્શનની કામગીરી શરૂ થઇ ચૂકી છે, તો બીજી તરફ અમદાવાદ-મુંબઇ હાઇસ્પીડ રેલ રૂટનું પહેલુ સાબરમતી રેલવે સ્ટેશનનું કામ પૂર્ણતાના આરે પહોંચી ચૂક્યું છે.
સાબરમતીમાં 80 હેક્ટર જમીનમાં અતિ આધુનિક જાપાન જેવો ડેપો બની રહ્યો છે
જેની રાહ ગુજરાત અને દેશના લોકો આતુરતાથી જોઇ રહ્યાં છે. તેવા બુલેટ ટ્રેન પ્રોજેકટનું કામ જેટ ગતિએ ચાલી રહ્યું છે. અમદાવાદના વટવા ખાતે બુલેટ ટ્રેનના રૂટ પર સેગમેન્ટલ ગર્ડર ઇરેક્શનની કામગીરીના શ્રી ગણેશ થયા છે. તો બીજી તરફ સાબરમતીમાં 80 હેક્ટર જમીનમાં અતિઆધુનિક જાપાન જેવો ડેપો બની રહ્યો છે. સાબરમતી ખાતે 1.36 લાખ વર્ગ મીટરમાં ફેલાયેલી 2 બ્લોકમાં 9 માળની બિલ્ડીંગ આકાર લઇ રહીં છે. સાબરમતી સ્ટેશન ખાતે મલ્ટિ મોડલ કનેક્ટિવિટી, હોટેલ્સ, રેસ્ટોરા, પ્લે-એરિયા, વિશાળ પાર્કિગ જેવી સુવિધાઓ પણ જોવા મળશે.
352 કિમીનો રૂટ ગુજરાતના 8 જિલ્લામાંથી પસાર થશે
તાજેતરમાં જ રેલ મંત્રાલયે પણ કહ્યું હતુ કે બુલેટ ટ્રેન માટે ફાઇનલ લોકશન માટે વન્ય જીવ, જમીન માપણી વિભાગ અને વન વિભાગ પાસેથી મંજૂરી પણ મળી ચૂકી છે. આ પ્રોજેક્ટ હેઠળ મુંબઇ અને અમદાવાદ વચ્ચે 508 કિમી લાંબી ભારતની પ્રથમ હાઇસ્પીડ રેલ લાઇન બનવા જઈ રહી છે. જેનો 352 કિમીનો રૂટ ગુજરાતના 8 જિલ્લામાંથી પસાર થશે. આ માટે ગુજરાતના 8 જિલ્લાઓમાં બુલેટ ટ્રેન પ્રોજેક્ટનું કામ પણ શરૂ થઇ ચૂક્યુ છે. આ પ્રોજેક્ટનો ખર્ચ 1.1 લાખ કરોડ રૂપિયાનો અંદાજાયો છે. બુલેટ ટ્રેનના પ્રોજેક્ટની ચર્ચા વચ્ચે જ હમણા થોડા દિવસ પહેલા જ મંત્રી અશ્વિની વૈષ્ણવે બાંદ્રા કુર્લા કોમ્પ્લેક્સ ખાતેની કામગીરીના ફોટો - વીડિયો પણ ટ્વિટ કર્યા હતા અને ચાલુ વર્ષે જૂનમાં જ અશ્વિની વૈષ્ણવે જાહેરાત કરી હતી કે 2026 સુધીમાં પ્રથમ ઓપરેશનલ બુલેટ ટ્રેન મળી જવાની શક્યતા છે.