જાહેરાત / સરકાર પેટ્રોલ અને ડીઝલ પર તગડો સેસ વસૂલશે, ગ્રાહકો પર વધારાનો બોજ નહીં પડે

• બજેટમાં પેટ્રોલ પર પ્રતિ લીટરે રુ.2.5 અને ડીઝલ પર પ્રતિ લીટરે રુ.4 સેસ વસૂલવાની જાહેરાત
• નાણાપ્રધાને એવું પણ જણાવ્યું કે ગ્રાહકો પર તેનો વધારાનો કોઈ બોજો નહીં પડે
• કોરોના કાળમાં સરકારનો ખજાનો ખાલી, પૈસાની ખૂબ જરુર હોવાથી ફાર્મ સેસ લગાડાયો

એવે સમયે કે જ્યારે પહેલેથી જ પેટ્રોલ અને ડીઝલના ભાવ ઓલ ટાઈમ હાઈ છે તેથી આગામી સમયમાં મોંઘવારી વધવાના એંધાણ છે. મુંબઈમાં પેટ્રોલ 92.80 રુપિયા પ્રતિ લીટર અને ડીઝલ 83.30 રુપિયા પ્રતિ લીટરે વેચાઈ રહ્યું છે.

સેસ લગાડવાની સરકારની દરખાસ્ત

સીતારામણે કહ્યું કે પેટ્રોલ પર 2.5 પ્રતિ લીટર અને ડીઝલ પર 4 રુપિયા પ્રતિ લીટર ફાર્મ ઈન્ફ્રાસ્ટ્રક્ચર  એન્ડ ડેવલપમેન્ટ સેસ લગાડવાની સરકારની દરખાસ્ત છે. તેનાથી મોંઘવારી વધવાના એંધાણ છે કારણ કે તેનાથી ડીઝલના ભાવમાં વધારો થશે. જોકે નાણાપ્રધાને એવું પણ જણાવ્યું કે ગ્રાહકો પર તેનો વધારાનો કોઈ બોજો નહીં પડે.

સેસ દ્વારા 26,192 કરોડનું ફંડ એકત્ર કરવાની જોગવાઈ

કોરોના કાળમાં સરકારનો ખજાનો ખાલી છે અને આવક પર મોટી અસર પડી છે. તેથી સરકારને હાલમાં પૈસાની ખૂબ જરુર હોવાથી આ ટેક્સ લગાડાયો હોવાનું નિષ્ણાંતો માની રહ્યા છે. ચાલુ નાણાકીય વર્ષ 2020-21 માટે સરકારે હેલ્થ એન્ડ એજ્યુકેશન સેસ દ્વારા 26,192 કરોડનું ફંડ એકત્ર કરવાની બજેટમા જોગવાઈ રાખી હતી.