સફળતા / કોરોનાથી બચાવી રહ્યું છે સોશિયલ બબલ મોડલઃ ન્યૂઝીલેન્ડે શરૂઆત કરી, હવે બ્રિટનમાં લાગુ કરાશે

શું છે સોશિયલ બબલ?
પરિવારના સભ્ય, દોસ્ત કે કલીગ જે લોકો હંમેશાં મળતા રહે છે તેમના સમૂહને બબલ કહેવાય છે. લોકડાઉન દરમિયાન તેમને મળવાની પરવાનગી આપવાની વાત કહેવાઇ છે. તેની શરૂઆત ન્યૂઝીલેન્ડથી થઇ છે. આ પ્રયોગ સફળ રહ્યો છે. મળવા દરમિયાન અંતર રાખવું જરૂરી છે. ઓક્સફોર્ડ યુનિવર્સિટીનું રિસર્ચ કહે છે કે, જો કોઇ નાનાં નાનાં ગ્રૂપમાં એક બીજાને મળે તો વાઇરસના સંક્રમણને ફેલાવાથી રોકી શકાય છે. 

સોશિયલ ડિસ્ટન્સિંગ અને સોશિયલ બબલનો ફરક

સંશોધકોના જણાવ્યા મુજબ, સોશિયલ ડિસ્ટન્સિંગમાં લોકોને ભીડ કે સમૂહમાં જવાની અનુમતિ હોતી નથી, જેથી લોકો એકબીજાના સંપર્કમાં ન આવે, સોશિયલ બબલમાં ઘરમાં જ ફેમિલી મેમ્બર્સ, મિત્રો કે કલીગને મળવાની પરવાનગી રહે છે, જોકે વાત કરતી વખતે તેમની વચ્ચે યોગ્ય અંતર જળવાયેલું હોય છે. 

ન્યૂઝીલેન્ડનો સક્સેસ મંત્ર 

ન્યૂઝીલેન્ડની વસ્તી ૫૦ લાખ કરતા પણ ઓછી છે. ફેબ્રુઆરીના અંતમાં અહીં કોરોનાની જાણ થઇ. સરકારે આ અદ્રશ્ય દુશ્મન સામે જંગની તૈયારી શરૂ કરી દીધી. મેડિકલ એક્સપર્ટ્સની સાથે ચાર સૂત્રિય કાર્યક્રમ બનાવાયો. તેમાં ૪૩ પોઇન્ટ રાખવામાં આવ્યા. તેમાં સોશિયલ બબલ મુખ્ય પોઇન્ટ હતો. અહીં સાત અઠવાડિયાનું સખત લોકડાઉન રહ્યું. દર અઠવાડિયે સમીક્ષા કરાઇ હતી. દેશમાં કુલ ૧,૧૫૪ કેસ સામે આવ્યા અને માત્ર ૨૨ લોકોનાં મોત થયાં હતાં.

શા માટે જરૂરી છે આ મોડલ?
લંડન સ્કૂલ ઓફ ઇકોનોમિક્સ એન્ડ પોલિટિકલ સાયન્સનું રિસર્ચ કહે છે કે, આ મોડલ એવા લોકો માટે રાહત આપનારું છે જેઓ સંક્રમણના હાઇ રિસ્ક ઝોનમાં છે અને જેને વધુ દેખભાળની જરૂર પડે છે. સંશોધકોના જણાવ્યા મુજબ કેટલાક લોકો એવા પણ છે જેઓ એકલા છે અને લોકડાઉનના કારણે તણાવમાં છે તેમને ફેમિલીનો સપોર્ટ મળે તો ફાયદો થઇ શકે છે.