Good News! / મોદી કેબિનેટે BSNL ના ઈન્ટરનેટ સ્પીડ માટે લીધો મોટો નિર્ણય, જાણીને તમે પણ થઈ જશો ખુશ

• BSNL લાવી રહ્યું છે 4G
• થોડા સમયમાં કરવામાં આવશે લૉન્ચ
• કેન્દ્રીય મંત્રી અશ્વિની વૈષ્ણવે આપી માહિતી 

ટેલિકોમ ક્ષેત્રે હવે bsnl પણ અન્ય કંપનીઓની હરોળમાં આવવા તૈયારીઓ કરી રહી છે.  જી હા એટલે હવે બીએસએનલ પર તમને જલ્દીથી 4G સુવિધા મળી શકે છે. કારણ કે પીએમ મોદીની મેડ ઇન ઇન્ડિયા પહેલ હેઠળ ભારત સંચાર નિગમ લિમિટેડ  સ્વદેશી 4જી નેટવર્ક લાવી રહ્યું છે. આ અંગે  કેન્દ્રીય કેબિનેટે બે હજારથી પણ વધારે સાઇટસને મંજૂરી આપી છે.  કેન્દ્રીય માહિતી અને ટેકનોલોજી (IT) મંત્રી અશ્વિની વૈષ્ણવે શુક્રવારે આ  અંગે માહિતી આપી હતી. તેમણે કહ્યું, “BSNL આવનારા થોડા અઠવાડિયામાં સ્વદેશી 4G નેટવર્ક લોન્ચ કરશે. આ માટે સમગ્ર ભારતમાં 2,343 સ્થળોની ઓળખ કરવામાં આવી છે, જ્યારે કેબિનેટે તેમને આ કામ માટે પરવાનગી આપી છે.

45,000 કરોડ રૂપિયાની કરવામાં આવી છે જોગવાઇ

એવું કહેવામાં આવી રહ્યું છે કે 4G ટેલિકોમ નેટવર્ક ભારતીય એન્જિનિયર્સ અને વૈજ્ઞાનિકો દ્વારા વિકસાવવામાં આવી રહ્યું છે. આ સ્વદેશી 4G નેટવર્ક લાવવાની યોજના હેઠળ, BSNL સમગ્ર ભારતમાં 1.12 લાખથી વધુ ટાવર સ્થાપિત કરશે. સરકારે આ માટે 45,000 કરોડ રૂપિયાની જોગવાઈ કરી છે. કેન્દ્રીય મંત્રીએ લોકસભામાં જણાવ્યું હતું કે, "દેશી 4G ટેલિકોમ નેટવર્ક ટૂંક સમયમાં સમગ્ર ભારતમાં શરૂ કરવામાં આવશે, BSNL દેશભરમાં લગભગ 1.12 લાખ ટાવર સ્થાપિત કરવાની યોજના ધરાવે છે."

'2022ના અંતમાં 5G નેટવર્ક થશે તૈયાર'

ટેલિકોમ મંત્રીએ ગત મહિને જણાવ્યું હતું કે ભારતનું  સ્વદેશી 4G મોબાઈલ નેટવર્ક સૌથી ઓછા સમયમાં તૈયાર થઈ રહ્યું છે. આ સાથે તેમણે એ પણ માહિતી આપી કે 5G નેટવર્ક 2022ના અંત સુધીમાં તૈયાર થઈ જશે. અમારા 4G નેટવર્કના વિકાસની સમગ્ર વિશ્વમાં પ્રશંસા થઈ રહી છે અને તેમાં કોર નેટવર્ક, સંપૂર્ણ ટેલિકોમ્યુનિકેશન સાધનો સાથેનું રેડિયો નેટવર્ક છે.”

સરકાર સેટેલાઇટ સેવાઓ માટે 27.5-28.5 ગીગાહર્ટ્ઝનું સ્પેક્ટ્રમ રાખી શકે છે

આ દરમિયાન સરકાર  27.5-28.5 ગીગાહર્ટ્ઝની ફ્રીક્વન્સી રેન્જમાં સ્પેક્ટ્રમની હરાજી નહીં કરે તેવી શક્યતા છે. તે આ બેન્ડને સેટેલાઇટ સેવાઓ માટે રાખશે. સત્તાવાર સૂત્રોએ સમાચાર એજન્સી પીટીઆઈને જણાવ્યું કે DoT માત્ર 27.5 ગીગાહર્ટ્ઝ સુધીના સ્પેક્ટ્રમની હરાજી પર વિચાર કરી રહ્યું છે કારણ કે તેને બે સેવાઓ વચ્ચે વિભાજિત કરવું મુશ્કેલ હશે. જો કે  ટેલિકોમ વિભાગના એક વરિષ્ઠ અધિકારીએ કહ્યું કે વિભાગમાં ઘણી બાબતો પર ચર્ચા થઈ રહી છે અને હજુ સુધી કંઈ નક્કી કરવામાં આવ્યું નથી. હકીકતમાં, ટેલિકોમ રેગ્યુલેટરી ઓથોરિટી ઓફ ઈન્ડિયા (TRAI) એ આ ફ્રીક્વન્સી બેન્ડ માટે બેઝ પ્રાઇસની ભલામણ કરી છે. એ પણ સૂચવ્યું કે તેનો ઉપયોગ મોબાઈલ તેમજ સેટેલાઇટ સેવાઓ માટે થઈ શકે છે.