LoC પર તૈનાત સૈનિક સમયસર પોતાના જ લગ્નમાં પહોંચી શકે તે માટે BSFએ હેલિકોપ્ટર મોકલીને માનવતાનું ઉત્તમ ઉદાહરણ પૂરૂ પાડ્યું છે.
જવાન માટે બોર્ડર સિક્યુરિટી ફોર્સે કર્યું જોરદાર કામ
જવાને પોતાના જ લગ્નમાં સમયસર પહોંચવાનું હતું
BSFએ જવાન માટે હેલિકોપ્ટરની સેવા ઉપલબ્ધ કરાવી આપી
બોર્ડર સિક્યુરિટી ફોર્સ (BSF) એ ગુરુવારે જમ્મુ-કાશ્મીરમાં નિયંત્રણ રેખા (LoC) પર એક દૂરસ્થ ચોકી પર તૈનાત એક જવાનને એરલિફ્ટ કરવા માટે એક સ્પેશિયલ હેલિકોપ્ટરની ઉડાન ભરી હતી, જેથી તે 2500 કિમી દૂર ઓડિશા સ્થિત પોતાના વતન જઈ શકે. સીમા સુરક્ષા દળના એક સિનિયર અધિકારીએ જણાવ્યું કે, નિયંત્રણ રેખા પાસે માછિલ સેક્ટરમાં એક ઉંચાઇવાળી ચોકી પર તૈનાત 30 વર્ષના કોન્ટેબલ નારાયણ બેહરાના લગ્ન 2જી મેએ થવાના નક્કી છે.
માતા-પિતાને ચિંતા હતી કે, શું તેઓનો પુત્ર લગ્ન માટે સમયસર પહોંચી શકશે કે નહીં
તેઓએ જણાવ્યું કે, હાલમાં LoC ચોકી બરફથી ઢંકાયેલી છે અને કશ્મીર ઘાટીની સાથે તેના રસ્તાનો સંપર્ક પણ હાલ બંધ છે. આ સ્થળો પર તૈનાત સૈનિકો માટે પરિવહન માટેનું એક માત્ર સાધન સૈન્ય હવાઇ ઉડાન જ છે. અધિકારીએ જણાવ્યું કે, જવાનના માતા-પિતાએ તાજેતરમાં જ યુનિટ કમાન્ડરોનો સપંર્ક કર્યો હતો. તેઓ ચિંતામાં હતા, કારણ કે યોગ્ય તિથિને લઇને તમામ તૈયારીઓ કરી લેવાઇ હતી. તેઓને એવું લાગી રહ્યું હતું કે, તેઓનો પુત્ર લગ્ન માટે સમયસર નહીં પહોંચી શકે.
(પ્રતિકાત્મક તસવીર)
આ મામલો BSF ના મહાનિરીક્ષક રાજા બાબૂ સિંહના ધ્યાને લાવવામાં આવ્યો. તેમણે એવો આદેશ આપ્યો કે, શ્રીનગરમાં તૈનાત દળનું એક હેલિકોપ્ટર કે જેનું નામ ચિતા છે, બેહરાને તુરંત એરલિફ્ટ કરો. હેલિકોપ્ટર ગુરુવારે વહેલી સવારે બેહરાને શ્રીનગર લઇને આવી ગયું. તે હવે ઓડિશાના ઢેંકનાલ જિલ્લાના આદિપુર ગામમાં પોતાના ઘરે જઈ રહ્યો છે. સિંહે કહ્યું કે તેઓએ હવાઈ સેવાને મંજૂરી આપી કારણ કે સૈનિકોનું કલ્યાણ તેઓની "પ્રથમ અને મુખ્ય પ્રાથમિકતા" છે.
CAPF જવાનો માટે હવાઇ યાત્રા મંજૂર
કેન્દ્રીય ગૃહમંત્રાલયે CAPF (કેન્દ્રીય સશસ્ત્ર પોલીસ દળ) ના જવાનોને અનેક રૂટો પર હવાઇ યાત્રાની મંજૂરી આપી દીધી છે. ઇન્ડિગો એરલાઇન્સ કેન્દ્રીય સુરક્ષા દળોને લાવવા અને લઇ જવાની જવાબદારી સંભાળશે. એમાંય મહત્વની બાબત એ છે કે, CAPFને મળેલી હવાઇ સેવા 31 જુલાઇ 2023 સુધી શરૂ રહેશે. આ સર્વિસ માટે BSF ને નોડલ એજન્સી બનાવવામાં આવેલ છે. જો કે, આ પહેલાં પણ BSF જ હવાઇ સેવા માટે નોડલ એજન્સીની જવાબદારી નિભાવતું આવ્યું છે.