Friday, July 19, 2019
સબસ્ક્રાઈબ કરો VTVGujarati ન્યુઝ Whatsapp

અભિયાન / પાકિસ્તાન સરહદ પર ઘૂસણખોરી રોકવા માટે BSFનું સ્પેશિયલ મિશન 'સુદર્શન' શરૂ

પાકિસ્તાન સરહદ પર ઘૂસણખોરી રોકવા માટે BSFનું સ્પેશિયલ મિશન 'સુદર્શન' શરૂ

બોર્ડર સિક્ટોરિટી ફોર્સ (BSF)એ પંજાબ અને જમ્મુમાં પાકિસ્તાની સરહદ પર ઘૂસણખોરી વિરોધી કાર્યવાહી વધુ મજબૂત બનાવવા એક સ્પેશિયલ મિશનની શરૂઆત કરી છે. આ અભિયાન હેઠળ સરહદ પર તહેનાત બીએસએફના કાબેલ અધિકારીઓ, હજારો ટુકડીઓ અને મશીનરીને સક્રિય કરવામાં આવી છે.

આ મહિનાના પ્રારંભથી શરૂ કરવામાં આવેલા 'સુદર્શન' નામના આ મિશન હેઠળ એક હજાર કિલોમીટર લાંબી ભારત-પાકિસ્તાન ઈન્ટરનેશનલ બોર્ડરને હાલ સીલ કરી દેવામાં આવી છે. 485 કિલોમીટર લાંબી ઈન્ટરનેશનલ બોર્ડર જમ્મુ સાથે જોડાયેલી છે, જ્યારે 553 કિલોમીટર લાંબી પંજાબ સાથે જોડાયેલી છે. તેનાથી આગળ આ સરહદ ભારતના પશ્ચિમી રાજ્યો પંજાબ અને ગુજરાતમાંથી નીકળે છે.

સુરક્ષાદળોના ઉચ્ચસ્તરીય સૂત્રોના જણાવ્યા અનુસાર, ‘મિશન 'સુદર્શન'માં ભારે મશીનરી, કમ્યુનિકેશન પકડનારા ઉપકરણો અને મોબાઈલ બુલેટપ્રૂફ બંકરને પણ તૈયાર કરવામાં આવ્યા છે. આ અભિયાનમાં બીએસએફના હજારો કર્મચારીઓ પણ જોડાયા છે. 

અધિકારીઓએ જણાવ્યું કે, બીએસએફની અંદાજે 40 બટાલિયનોના ફ્રન્ટિયર અને બટાલિયન કમાન્ડર, તેમના સેકન્ડ ઈન કમાન્ડ અને કંપની (ટુકડી) કમાન્ડર બંને રાજ્યમાં મિશન માટે લગભગ બે સપ્તાહ સુધી કેમ્પ યોજશે.

આતંકવાદીઓની ઘૂસણખોરી, નશીલા પદાર્થોની ખેપ મોકલવા પર અંકુશ લગાવવા માટે અને પાકિસ્તાન તરફથી કોઈ પણ પ્રકારની ઉશ્કેરણી વગર કરવામાં આવેલા ફાયરિંગનો જડબાતોડ જવાબ આપવા માટે સરહદોને સીલ કરવાનો નિર્ણય લેવામાં આવ્યો છે. આ સરહદ પર હાલ કાર્યવાહી માટે ભારતીય સૈનિકોની પોઝિશન અને ઠેકાણાઓને વધુ મજબૂત બનાવવામાં આવી રહ્યા છે.

બીએસએફના અધિકારીઓના કહેવા અનુસાર, ભગવાન શ્રીકૃષ્ણના 'સુદર્શન ચક્ર' ના નામ પરથી આ મોટા અને અગત્યના મિશનનું નામકરણ કરવામાં આવ્યું છે. તેનો મુખ્ય હેતુ દુશ્મનનો સફાયો કરીને તાત્કાલિક પોતાની જગ્યાએ પરત ફરવાનો છે.

બીએસએફના ડીજી રજનીકાંત મિશ્ર અને અન્ય વરિષ્ઠ અધિકારીઓ આ મિશન પુરું થયા બાદ તેનાથી મળેલા પરિણામોની વિસ્તૃત સમીક્ષા કરશે અને ત્યારબાદ આ રિપોર્ટ કેન્દ્રિય ગૃહ મંત્રાલયને મોકલી દેવામાં આવશે. 

જોવા જેવું વધુ જુઓ

બ્રેકિંગ ન્યૂઝ