ફલોર ટેસ્ટ / યેદિયુરપ્પાએ વિધાનસભામાં બહુમતિ સાબિત કરી

યેદિયુરપ્પા સરકાર ફલોર ટેસ્ટમાં પાસ થઇ ગઇ છે. વિપક્ષે મત વિભાજનની માગ કરી નહોતી અને યેદિયુરપ્પા સરકારે ફલોર ટેસ્ટમાં પાસ થઇ ગઇ છે. આ સાથે સરકાર પોતાના આગળના કામકાજમાં લાગી ગઇ છે. હાલમાં 207 ધારાસભ્યવાળી વિધાનસભા છે, જેમાં બહુમતિ માટે 104નો આંકડો જોઇતો હતો અને અને હાલમાં ભાજપ પાસે 105 ધારાસભ્ય છે. 

જ્યારે પૂર્વ મુખ્યમંત્રી એચડી કુમારસ્વામીએ કહ્યું હતું કે હવે તમે લોકો સરકારમાં છો, હવે ધારાસભ્યો પર દબાણ બનાવાનું બંધ કરો. કુમારસ્વામીએ કહ્યું કે જો સરકાર વિકાસલક્ષી કાર્યો કરે છે તો તેઓ સરકારને સમર્થન આપશે.

ઉલ્લેખનીય છે કે કર્ણાટક વિધાનસભામાં  યેદિયુરપ્પા બહુમત સાબિત કરે તે પહેલા વિધાનસભાનું ગણિત ઘણું મહત્વનું બની ચુક્યું હતું. કારણકે 224 બેઠકો ધરાવતી કર્ણાટક વિધાનસભામાં બહુમતનો આંકડો ઘટી ગયો હતો. ઉલ્લેખનીય છે કે કર્ણાટક વિધાનસભાના સ્પીકર આર. રમેશ કુમારે કુલ 17 ધારાસભ્યોને ગેરલાયક ઠેરવી દિધા હતા.

બહુમત પરીક્ષણ પહેલા ભાજપના ધારાસભ્યોના દળની એક બેઠક પણ યોજાઈ હતી. આ બેઠકમાં બહુમત પરીક્ષણને લઈને ચર્ચા કરવામાં આવી હતી.  બેંગાલુરૂની હોટલ ચાંસરી પવેલિયનમાં આ બેઠક યોજાઈ હતી. આખી રાત સુધી ભાજપના ધારાસભ્યો આ હોટલમાં રોકાયા હતા. બેઠક બાદ યેદિયુરપ્પાએ કહ્યુ, ધારાસભ્યોના દળની મળેલી બેઠકમાં શક્તિ પરીક્ષણને લઈને ચર્ચા થઈ હતી.