લોકડાઉનની પરિસ્થિતિએ તો એવી એવી ઘટનાઓનું સર્જન કર્યું છે કે સામાન્ય સમયમાં એ માનવી એ પણ મુર્ખામી ગણાય. કચ્છના ગાંધીધામમાં જ એક એવી દર્દનાક ઘટના બની છે કે જે લોકડાઉનની પરિસ્થિતિ સાથે ગેરસમજે ઉભી કરી છે. ગાંધીધામના સુંદરપુરી ગામમાં બીડી માંગવા મુદ્દે એક 26 વર્ષીય યુવકની કરપીણ હત્યા થઈ ગઈ છે.
કચ્છના ગાંધીધામમાં બીડી માગવા મુદ્દે યુવકની હત્યા
સુંદરપુરીમાં બીડી-સિગારેટ માંગવા મુદ્દે થઈ હતી બબાલ
ગત રાત્રે અથડામણમાં 25 વર્ષીય યુવકની હત્યા
કચ્છના ગાંધીધામની આ ઘટના કાળજું કંપાવી દે તેવી છે. શું તમે ક્યારેય વિચાર્યું પણ છે કે 2 રૂપિયાની બીડી માટે હત્યા થઈ જાય? ઘટના એવી બની કે ગાંધીધામ તાલુકામાં આવેલા સુંદરપુરી ગામમાં યુવાન દ્વારા બીડી- સિગારેટ માંગવા મુદ્દે ઉગ્ર બોલાચાલી બાદ બબાલ થઈ હતી.
બીડી- સિગારેટ માંગવા મુદ્દે ઉગ્ર બોલાચાલી
આ બબાલ એટલી ચરમસીમાએ પહોંચી કે બે જુથ વચ્ચે અથડામણ સર્જાયું. સુંદરપુરી ગામમાં બીડી લેવા મુદ્દે સર્જાયેલાં આ હથિયારધારી અથડામણમાં 26 વર્ષીય યુવકની હત્યા થઈ છે.
સમગ્ર ઘટનાનો ઘટનાક્રમ
ગાંધીધામમાં સુંદરપુરીમાં આર્ય સમાજવાડી પાસે ગત રાત્રે નવ વાગ્યાના અરસામાં કમલેશ, નાનો ભાઈ રાજુ, દિપક, મેઘજી તેમજ કાકા વગેરે આર્ય સમાજવાડીના ઓટલે બેઠા હતા. તે સમયે રમેશ નારાણભાઈ ધેડા અને નિખિલ રામજી વિગોરાએ કમલેશ પાસે આવી બીડી માંગી હતી. કમલેશે બીડી નથી તેમ કહેતાં રમેશે બોલાચાલી કરી કહ્યું કે, તારા ખિસ્સા બતાડ’ જેથી કમલેશના નાના ભાઈ રાજુએ તેને કહ્યું હતું કે ‘તને ખિસ્સા ચેક કરવાનો અધિકાર કોણે આપ્યો છે? બીડી નથી તો નથી’ જેથી રમેશ અને નિખિલ બન્ને જણાં ઉશ્કેરાઈને ગાળાગાળી-બોલાચાલી કરી ફોન કરીને તેમના સાગરિતોને બોલાવ્યાં હતા.
યુવકને છરીનો ઘા વાગતા ઢળી પડ્યો
આ બેઉ જણાં ઝઘડો કરવાના મૂડમાં હોઈ કમલેશ અને તેના ભાઈઓ બધાં ઉઠીને ઘરે ચાલ્યાં ગયા હતા. તેઓ ઘરે પહોંચ્યાં કે ત્યાં જ રમેશ અને નિખિલે પંદરેક જણનાં ટોળા સાથે આવીને તેમની સાથે ઝઘડો-મારામારી કરવાનું શરૂ કરી દીધું હતું. નરેશ નામના એક શખ્સે હાથમાં લોખંડનો પાઈપ લઈને રાજુને મારવા ઉગામ્યો હતો જેથી રાજુએ બંને હાથથી પાઈપ પકડી લીધો હતો. ત્યાં જ જીગર માતંગ નામના યુવકે છરી કાઢી રાજુના પેટમાં મારી દેતાં રાજુ સ્થળ પર જ ઢળી પડ્યો હતો. પેટના આંતરડા બહાર આવી ગયાં હતા. આરોપીઓએ રાજુના પરિવારજનો પર પથ્થરમારો પણ કર્યો હતો. હુમલામાં કમલેશ, તેના પિતા મહેશભાઈ, માતા કેશીબેન અને મોટી મા મીઠીબેન પણ ઘવાયાં હતા.
સારવાર દરમિયાન યુવકનું મોત
ગંભીર રીતે ઘાયલ રાજુને તાત્કાલિક ગાડીમાં નાંખીને હોસ્પિટલમાં સારવાર માટે લઈ જવાયો હતો. પરંતુ સારવાર દરમિયાન તેનું મોત નીપજ્યું હતું. 26વર્ષીય હતભાગી રાજુ ખાનગી બેન્કના લોન વિભાગમાં નોકરી કરતો હતો અને તેને રૂદ્ર નામનો નાનો દીકરો છે. મોટાભાઈ અને પિતાની નજર સમક્ષ રાજુની ઘાતકી હત્યા કરી દેવાઈ હતી. રાજુના મૃતદેહને મોડી રાત્રે પોસ્ટમોર્ટમ માટે રામબાગ ખસેડાયો હતો. ઘટનાના પગલે જૂની સુંદરપુરી અને હોસ્પિટલમાં લોકોના ટોળાં ઉમટ્યાં હતા. પરિવારજનોએ તમામ આરોપીઓની તાત્કાલિક ધરપકડ ના થાય ત્યાં સુધી રાજુનો મૃતદેહ સ્વિકારવાનો ઈન્કાર કરી દીધો છે. જેથી પોલીસ ખાતામાં દોડધામ મચી ગઈ છે. બનાવના પગલે મધરાત્રે જિલ્લા પોલીસ વડા સહિત ના પોલીસ કાફલો ઘટનાસ્થળે દોડી ગયો હતો અને બંદોબસ્ત ગોઠવી દીધો હતો.
સમગ્ર કચ્છમાં ચકચાર
હત્યાના બનાવ સંદર્ભે મોડી રાત્રે પોલીસે કમલેશની ફરિયાદ નોંધી જીગર રાયસી માતંગ, નરેશ પાલાભાઈ સીંચ, વિશાલ માલશી વિગોરા, મુકેશ રાણા માજીરાણા, સુનીલ ઊર્ફે અલુ શાંતિલાલ બારોટ, રમેશ નારાણભાઈ ધેડા અને નિખિલ રામજીભાઈ વિગોરા એમ સાત આરોપી સામે નામજોગ અને તેમની સાથે રહેલાં અન્ય અજાણ્યા સાત-આઠ સાગરિતો સામે વિવિધ કલમો તળે ગુનો નોંધ્યો છે. 7 આરોપીઓને ઝડપી લીધાં અને તેમના સાગરિતોને પણ પકડી પાડવા પોલીસ દોડધામ કરી રહી છે. ઉલ્લેખનીય છે કે અગાઉ પણ આદિપુરમાં ગુટખા મુદ્દે પિતાના ખિસ્સા ફંફોસી રહેલા શખ્સે તેનો વિરોધ કરનાર પુત્રને છરી મારી રહેંસી નાખ્યો હતો. ફરી એક વાર બીડી માંગવા બાબતે યુવાનની ઘાતકી હત્યાથી સમગ્ર કચ્છમાં ચકચાર મચી છે..