નાગૌરમાં એક પ્રેમીએ તેની પરિણીત પ્રેમિકાની નિર્દયતાથી હત્યા કરી મૃતદેહના ટુકડા કરી અલગ-અલગ જગ્યાએ ફેંકી દીધા
હૃદય હચમચાવી નાખે તેવી રીતે કરી હત્યા
યુટ્યુબમાં હત્યાની સજા જાણી કરી પ્રેમિકાની હત્યા
હત્યા કરી મહિલાના ટુકડા કરી અલગ-અલગ જગ્યાએ ફેંકી દીધા
રાજસ્થાનના નાગૌરમાં એક વ્યક્તિએ તેની પરિણીત પ્રેમિકાની નિર્દયતાથી હત્યા કરી નાખી હોવાની ઘટના પ્રકાશમાં આવી છે. 22 જાન્યુઆરીના રોજ પરિણીત મહિલા બાલાસરથી તેના સાસરે મુંડાસરમાં જવાનું કહીને તેના પ્રેમી સાથે ગઈ હતી. જ્યારે તેણી તેના સાસરિયાના ઘરે પહોંચી ન હતી, ત્યારે પરિવારજનોએ પોલીસ સ્ટેશનમાં ગુમ થયાની ફરિયાદ નોંધાવી હતી.
પોલીસને મળ્યા લોહીથી લથપથ ચંપલ
પોલીસ સ્ટેશનમાં ગુમ થયાની ફરિયાદ નોંધાતા પોલીસે મહિલાની શોધખોળ શરૂ કરી હતી. ત્યારે ગામના એક વ્યક્તિએ મહિલાને તેના પ્રેમી અનોપારામ સાથે મોટર સાઇકલ પર નાગૌર તરફ જતી જોઈ હતી. મહિલાનો ફોન પણ 22 જાન્યુઆરીએ બપોરે 3 વાગ્યા પછી બંધ થઈ ગયો હતો. અને 2 ફેબ્રુઆરીએ નાગૌર પોલીસને બાલવા રોડ પર કેન્દ્રીય વિદ્યાલયની પાછળની ઝાડીઓમાં માનવ જડબા, ઓઢણી, વાળ અને લોહીથી લથપથ ચંપલ મળ્યાં હતા.
હત્યારાએ લાશના ટુકડા કરી કર્યો નિકાલ
પોલીસે પરિવારના સભ્યોને બોલાવી કપડાં પરથી તેમની ઓળખ કરાવા જણાવ્યું હતું. ત્યારે પરિવારજનોએ પોલીસને જણાવ્યું કે આ કપડાં તેમની દીકરી ગુડ્ડીના છે. પરિવારજનોની ફરિયાદના આધારે પોલીસે અનોપારામ વિરુદ્ધ હત્યાનો ગુનો નોંધી પોલીસે અનોપારામની ધરપકડ કરી હતી. જોકે ઘટનાના ચાર દિવસ સુધી પોલીસ મહિલાની લાશ મેળવી શકી નથી. અત્યાર સુધીની તપાસમાં પોલીસને જાણવા મળ્યું છે કે હત્યારાએ લાશના અનેક ટુકડા કરી તેનો નિકાલ કર્યો છે. હત્યા કર્યા પહેલા પતિએ યુટ્યુબ માં હત્યાની સજા જાણી હત્યા કરી હોવાનું પોલીસ તપાસમાં ખુલ્યું છે.