બ્રિટનના 95 વર્ષીય મહારાણી એલિઝાબેથ -II કોરોના પોઝિટિવ થયાં છે.
બકિંગહામ પેલેસે રવિવારે આ માહિતી આપી હતી. શાહી મહેલે એક માહિતીમાં જણાવ્યું છે કે કોવિડ-19ને કારણે રાણીમાં શરદી જેવા સામાન્ય લક્ષણો જોવા મળી રહ્યા છે. 95 વર્ષીય રાણી હાલમાં તેમના વિન્ડસર પેલેસમાં છે અને આગામી થોડા દિવસો સુધી માત્ર સામાન્ય કામ કરશે.
શાહી મહેલનું કહેવું છે કે રાણી તબીબી સેવાઓ લેવાનું ચાલુ રાખશે અને ડૉક્ટરોની સલાહ મુજબ કામ કરશે. તે કોવિડ-19ની માર્ગદર્શિકાનું સંપૂર્ણ પાલન કરશે. હાલમાં, યુકે સરકારની કોવિડ નીતિ અનુસાર, જો કોઈ કોરોના વાયરસ પોઝિટિવ હોવાનું જણાય છે, તો તેણે પોતાને 10 દિવસ માટે આઈસોલેશનમાં રહેવું જરૂરી છે. છઠ્ઠા અને સાતમા દિવસે તેનો રિપોર્ટ નેગેટિવ આવે તો જ તે ક્વોરેન્ટાઈનમાંથી બહાર આવી શકશે. જો કે, બ્રિટિશ વડા પ્રધાન બોરિસ જ્હોન્સને રવિવારે કહ્યું હતું કે તેઓ આઈસોલેશનની આ નીતિને સમાપ્ત કરવાનું વિચારી રહ્યા છે અને રસીકરણ પર વધુ ધ્યાન આપવામાં આવશે. તેમણે કહ્યું કે આપણે કોવિડની સાથે સામાન્ય રીતે જીવન જીવવાનું શીખવું પડશે.
મહિનાની શરૂઆતમાં પ્રિન્સ ચાર્લ્સ અને તેની પત્ની કેમિલા પાર્કર થયાં હતા સંક્રમિત
રાણીનો પુત્ર અને તેના અનુગામી પ્રિન્સ ચાર્લ્સ અને તેની પત્ની કેમિલા પાર્કર પણ આ મહિનાની શરૂઆતમાં કોવિડ પોઝીટીવ હોવાનું જાણવા મળ્યું હતું. ઉલ્લેખનીય છે કે, બ્રિટનમાં મોટી સંખ્યામાં કોરોનાના કેસ સામે આવી રહ્યા છે. ડેલ્ટા વેરિઅન્ટ પછી ઓમિક્રોન વેરિઅન્ટે ત્યાં સંક્રમણ ફેલાવ્યું છે. ઉચ્ચ સુરક્ષાવાળા લોકો પણ આનાથી અછૂત નથી. બ્રિટનના વડાપ્રધાન બોરિસ જોનસન પણ કોવિડ પોઝીટીવ થઈ ગયા છે.