OMG / એકી ઝાટકે કરોડપતિ બની ગયુ આ કપલ, કિચન ફ્લોરના સમારકામ વખતે હાથ લાગ્યો સોનાના સિક્કાનો ખજાનો

• એકી ઝાટકે માલામાલ થયુ કપલ 
• મળ્યો 264 સોનાના સિક્કાનો ખજાનો 
• કિચન ફ્લોરના સમારકામમાં હાથ લાગ્યો ખજાનો 

બ્રિટનમાં એક કપલ રાતોરાત કરોડપતિ બની ગયું છે. તેમણે ક્યારેય વિચાર્યું પણ ન હતું કે તે એક દિવસમાં આટલા અમીર બની જશે. તેમના ઘરના સમારકામ દરમિયાન તેમને સોનાના સિક્કા મળ્યા છે. એક રિપોર્ટ અનુસાર બ્રિટિશ દંપતીને રસોડાના ફ્લોર નીચે 264 સોનાના સિક્કાઓનો ખજાનો મળ્યો. આ કપલ નોર્થ યોર્કશાયરમાં રહે છે. આ પ્રાચીન સિક્કાઓની કિંમત 250,000 પાઉન્ડ એટલે કે 2.3 કરોડ રૂપિયા આંકવામાં આવી રહી છે. હવે તેને હરાજી દ્વારા વેચવામાં આવશે.

10 વર્ષથી આ ઘરમાં રહેતા હતા 
કપલ આ ઘરમાં 10 વર્ષથી રહેતું હતું. પરંતુ તેમને ખ્યાલ પણ ન હતો કે તેમના ઘરની નીચે કરોડોનો ખજાનો છુપાયેલો છે. આ દંપતી હવે આ ખજાનો સ્પિંક એન્ડ સન સાથે હરાજી દ્વારા વેચવાની તૈયારી કરી રહ્યું છે. 

સોનાના સિક્કાનો ખજાનો 400 વર્ષથી વધુ જૂનો હોવાનું માનવામાં આવી રહ્યું છે અને 2019માં તેની શોધ થઈ હતી. દંપતીને આ સિક્કા ત્યારે મળ્યો જ્યારે તેઓએ સમારકામ દરમિયાન રસોડાના ફ્લોરને કઢાવ્યો. સિક્કા એક ધાતુની અંદરથી મળી આવ્યા. જે કોંક્રિટની નીચે માત્ર છ ઇંચ દટાયેલું હતું.

મળી આવ્યો સિક્કાનો ઢગલો 
કપલને પહેલા લાગ્યુ કે તેમણે એક વિજળીના કેબલ પર હિટ કર્યું છે. પરંતુ જ્યારે તેઓએ ફ્લોર ઊંચક્યું ત્યારે તેમને કપમાં સિક્કાઓનો ઢગલો મળ્યો. દંપતીએ કહ્યું કે તે કોકની બોટલ જેવું હતું. રિપોર્ટમાં વધુમાં જણાવવામાં આવ્યું છે કે જ્યારે કપલે તેને બહાર કાઢ્યું અને જોયું તો તેમને ખબર પડી કે આ સિક્કા 1610 થી 1727 ઈ.સ.ના છે. 

સિક્કા જેમ્સ અને ચાર્લ્સના શાસનના છે. એવું માનવામાં આવે છે કે તે કોઈ અમિર વ્યક્તિની સંપત્તિ હોવી જોઈએ. જે તેના ઘરની નીચે દફનાવવામાં આવી હોવી જોઈએ. અચાનક મળી આવેલા સોનાના સિક્કાથી કપલ રાતોરાત અમિર બની ગયા છે. 

સિક્કાઓની થશે હરાજી 
સ્પિંક એન્ડ સનના ગ્રેગરી એડમન્ડે જણાવ્યું હતું કે 'જાહેર બજારમાં તેની કિંમત કેટલી છે તે જોવું રોમાંચક રહેશે. એક સમયે આટલી મોટી સંખ્યામાં અંગ્રેજી સોનાના સિક્કાઓની હરાજી કરવાનું મેં ક્યારેય વિચાર્યું ન હતું.