આજકાલ લગ્નોમાં અનોખા એક્સપરિમેન્ટનો ટ્રેન્ડ ચાલે છે. ક્યાંક દુલ્હન બાઇક પર બેસીને આવે છે તો ક્યાંક વરરાજા બળદ ગાડા પર બેસીને આવે છે.
વીડિયો વાયરલ થતાં પોલીસે કરી કડક કાર્યવાહી
નવવધૂ સહિત અન્ય કેટલાક લોકો સામે નોંધાયો ગુનો
ડિઝાસ્ટર મેનેજમેન્ટ એક્ટના ભંગ અંગે કરાઇ કાર્યવાહી
મહારાષ્ટ્રના પૂણેની રહેવાસી શુભાંગીએ લગ્નમાં કંઇક અનોખો એક્સપરિમેન્ટ કરવાનો પ્રયત્ન કર્યો હતો પરંતુ આ પ્રયત્નથી તે મુશ્કેલીમાં મુકાઈ છે. પોલીસે દુલ્હન સામે મોટર વ્હીકલ એક્ટ હેઠળ ગુનો નોંધ્યો છે. આરોપી મહિલા કારના બોનેટ પર બેસીને લગ્ન કરવા માટે પહોંચી હતી. તેનો એક વીડિયો સોશ્યલ મીડિયા પર ખૂબ વાયરલ થયો રહ્યો છે. પોલીસે આ મહિલા સામે કાયદાનું ઉલ્લંઘન કરવાનો કેસ નોંધ્યો છે.
અન્ય કેટલાક લોકો પર થઈ કાર્યવાહી
પુણે પોલીસના એક અધિકારીએ જણાવ્યું કે 23 વર્ષીય શુભાંગી સામે મોટર વ્હીકલ એક્ટ હેઠળ કેસ નોંધવામાં આવ્યો છે. શુભાંગી ચાલતી S.U.V કારના બોનેટ પર બેસીને તેના લગ્ન સમારોહના સ્થળે ગઈ હતી. તેનો વીડિયો સોશ્યલ મીડિયા પર ખૂબ વાયરલ થયો હતો.
બાઇક પર બેસેલો વ્યક્તિ બનાવી રહ્યો હતો વિડિયો
અધિકારીએ જણાવ્યું હતું કે સવારે SUV કાર પૂણે-સાસવાડ રોડથી દિવે ઘાટ તરફ જઇ રહી હતી ત્યારે તેનો વીડિયો શૂટ કરવામાં આવ્યો હતો. તેમણે વધુમાં જણાવ્યું કે, મહિલા ચાલતી કારના બોનેટ પર બેસી હતી અને બાઇક પર બેસેલો એક વ્યક્તિ વીડિયો બનાવી રહ્યો હતો.
કોઈએ માસ્ક પહેર્યું નહોતું
આ ઘટનાની જાણ થતાં પોલીસે મોટર વ્હીકલ એક્ટ અને IPC કલમની જોગવાઈઓ હેઠળ મહિલા શુભાંગી સહિત વીડિયોગ્રાફર અને વાહનચાલક વિરુદ્ધ ગુનો નોંધ્યો છે. તે ઉપરાંત ડિઝાસ્ટર મેનેજમેન્ટ એક્ટ, મહારાષ્ટ્ર કોવિડ રેગ્યુલેશન એક્ટ હેઠળ પણ બધા સામે કાર્યવાહી કરવામાં આવી છે, કારણ કે કોઈએ માસ્ક પહેર્યું ન હતું.